Томорқа ва деҳқон хўжаликларида янги заҳираларни ишга солиш мавзусида кўргазмали семинар ўтказилди

Оилалар иқтисодини ва аҳоли турмуш фаровонлигини юксалтириш масаласи бугунги кунда нафақат ҳар бир оила соҳибининг зиммасидаги, балки давлат аҳамияти даражасидаги энг долзарб вазифага айланди. Бу борада мамлакатимизда зарур қонуний асослар яратилган. Хусусан, аҳолига деҳқончилик қилиш, оиласи эҳтиёжлари учун зарур маҳсулотларни етиштириш ва шу орқали ўзини ўзи банд қилиш тамойили асосида узоқ муддатга ерларни ижарага бериш, томорқа хўжалигида чорва моллари, қўй, эчки боқиш ҳамда асаларичилик ва паррандачилик билан шуғулланишлари учун кенг имкониятлар яратиб берилмоқда.

Ўзбекистон Республикаси Президентининг 2024 йил 5 мартдаги “Аҳоли хонадонларида саноат усулида маҳсулот ишлаб чиқаришни қўллаб-қувватлаш ҳамда томорқа ва деҳқон хўжаликларида янги заҳираларни ишга солишга доир чора-тадбирлар тўғрисида” ги Қарори аҳоли фаровонлигини таъминлаш борасидаги саъй-ҳаракатларни янада яхши ва ижобий томонга йўналтиришда муҳим туртки бўлди.

Ушбу Қарор ижросини таъминлаш мақсадида Амударё туман Фермер, деҳқон хўжаликлари ва томорқа ер эгалари Кенгаши томонидан фуқаролар йиғинлари масъуллари билан ҳамкорликда самарали ишлар амалга оширилмоқда. Унга кўра, жорий йил учун аниқ режа ишлаб чиқилиб, тумандаги 30 та овул ва маҳаллаларнинг ҳар биридан 10тадан, туман бўйича жами 300та хонадонни паррандачиликка ихтисослаштириш чоралари кўрилди ҳамда ушбу хонадонларга маҳаллий инкубаторларда етиштирилган парранда жўжалари етказиб берилди.

Шуниси эътиборга моликки, Амударё туман Фермер, деҳқон хўжаликлари ва томорқа ер эгалари Кенгаши ходимлари томонидан айни пайтда фуқаролар йиғинлари масъуллари билан ҳамкорликда ишлаб чиқилган манзилли режага асосан Президент Қарорида белгиланган устувор вазифалардан келиб чиқиб, келгуси йилларда туман бўйича 26 минг 557 та хонадонни паррандачиликка ихтисослаштириш ва шу орқали уларнинг бандлигини, фаровонлигини таъминлаш мақсадида рўйхат шакллантирилмоқда.

Жорий йилнинг 5 июнь санасида туманнинг Дўрман овулида бўлиб ўтган “Аҳоли хонадонларида саноат усулида маҳсулот ишлаб чиқаришни қўллаб- қувватлаш ҳамда томорқа ва деҳқон хўжаликларида янги заҳираларни ишга солишга доир чора-тадбирлари тўғрисида”ги Президент Қарори ижросига бағишланган семинар Кенгашида ҳам иштирокчилар томонидан аҳоли фаровонлигини ошириш, уларнинг иш билан бандлигини таъминлашда томорқа хўжалиги имкониятлари жуда муҳим аҳамиятга эгалиги қайд этилди.

Семинарда иштирок этган Ўзбекистон Фермер, деҳқон хўжаликлари ва томорқа ер эгалари Кенгаши бўлим бошлиғи Зайниддин Файзуллаев ҳамда Кенгаш ходими Илҳом Солиевлар хонадонларни паррандачиликка ихтисослаштириш орқали томорқа хўжалигини ривожлантириш истиқболлари хусусида сўз юритдилар. Айниқса, томорқаларда такрорий экинлар экиш, хусусан, маккажўхори, сули, арпа, шунингдек, бошқа дуккакли ва илдиз мевали экинлар экиш паррандачиликда жуда асқотишини таъкидладилар.

Семинар-кенгашда Амударё туман Фермер, деҳқон хўжаликлари ва томорқа ер эгалари Кенгаши ходимлари, фуқаролар йиғинлари раислари, ҳоким ёрдамчилари “Томорқа хизмати” МЧЖ раҳбарлари ҳамда Дўрман овули ҳудудидаги томорқа ер эгалари ўзаро фикр ва тажриба алмашдилар ҳамда масъулларга ўзларини қизиқтирган саволлар билан мурожаат қилдилар.

Хусусан, такрорий экинларнинг турлари, уларни парваришлаш, паррандалар учун озиқлик даражалари, шунингдек, такрорий экин сифатида танланадиган сабзавотларнинг тезпишар ва серҳосил навлари юзасидан берилган саволларга соҳа масъуллари батафсил маълумотлар тақдим этдилар.

Семинар якунида иштирокчилар Дўрман овулидаги намунали томорқа ер эгаларининг тажрибалари билан яқиндан танишдилар.

Робия Йўлдошева.