Туман Пенсия жамғармасида ҳисобда турувчи 24 минг 204 нафар пенсионерларга ҳар ойда жами 26,1 млрд сўмлик пенсия пуллари ўз вақтида тўланмоқда
Мамлакатимизда ҳалол ва фидойи меҳнат қилган инсонларнинг ҳамиша қадри баланд. Ҳатто маълум сабабларга кўра, вақтида ишлай олмаган, оиласидаги меҳнатга лаёқатсиз фарзанди, ота-онаси ёки умр йўлдошининг парвариши билан машғул бўлган, шунингдек, пенсия ёшига етганида талаб қилинадиган иш стажига эга бўлмаган шахслар ҳам қариганларида пенсия олиш, пенсионерлар учун яратилган шароитлар, ғамхўрликлардан баҳраманд бўлиш ҳуқуқига эгадирлар. Уларнинг бу ҳуқуқлари Бош Қомусимизда ва “Фуқароларнинг давлат пенсия таъминоти тўғрисида”ги Ўзбекистон Республикаси Қонунида мустаҳкамлаб қўйилган.
Бугунги кунда мамлакатимизда 4 млн 539 минг нафар пенсионерлар кексалик гаштини суришмоқда. Улардан 215 минг 679 нафари Қорақалпоғистон Республикасида истиқомат қиладилар. Пенсионерларнинг пенсияларини ўз вақтида, ҳеч қандай қийинчиликларсиз олишларини таъминлашга қаратилган чора-тадбирлар ижроси эса давлатимиз томонидан доимий назоратда.
Фуқароларнинг пенсия таъминоти борасидаги янгиликлар ва ўзгаришларни амалиётга жорий этиш, пенсионерларни қизиқтирган саволларга аниқ ва пухта жавоб бериш, соҳага татбиқ этилаётган янгилик ва ўзгаришлардан халқимизни вақтида хабардор қилиб бориш мақсадида ОАВ орқали малакали мутахассислар томонидан мунтазам равишда тушунтириш-тарғибот ишлари амалга оширилиб келинмоқда.
Бу борада Амударё тумани Пенсия жамғармаси бўлими фуқароларга хизмат кўрсатиш шўъбаси мутахассисларининг “Фуқароларнинг давлат пенсия таъминоти тўғрисида”ги Ўзбекистон Республикаси Қонуни ва ушбу Қонунга турли саналарда киритилган ўзгартиш ва қўшимчалар, шунингдек, соҳага оид Президент Қарорларининг мазмун-моҳияти юзасидан пенсионерлар ҳамда пенсия ёшига етган фуқаролар иштирокида ўтказаётган давра суҳбатлари, учрашувлари муҳим аҳамият касб этмоқда.
Айни пайтда Амударё тумани Пенсия жамғармасида ҳисобда турувчи 24 минг 204 нафар пенсионерларнинг ҳар ойда жами 26,1 млрд сўмлик пенсия пулларини ҳеч қандай тўсиқларсиз, ўз вақтида олишлари учун зарур имкониятлар яратилган. Шундан 17 минг 935 нафар фуқарога 18,5 млрд сўм пластик карталар орқали, 6 минг 269 нафар фуқарога 7,6 млрд сўм нақд пул кўринишида беминнат етказиб берилмоқда.
Жорий йилнинг 9 июль санасида Бюджетдан ташқари Пенсия жамғармаси Амударё туман бўлимида тизимдаги янгиликлар ва ўзгаришларни амалиётга татбиқ этиш ҳамда бу ҳақда пенсия олувчиларга зарур тушунчалар бериш мақсадида бўлимнинг етакчи мутахассислари иштирокида мажлис ўтказилиб, унда 2021-2022 ҳамда 2023 йиллар давомида соҳага татбиқ этилган янгиликлар ва “Фуқароларнинг давлат пенсия таъминоти тўғрисида”ги Ўзбекистон Республикаси Қонунига киритилган ўзгартиш ва қўшимчаларнинг пенсия олувчилар ҳаётида тутган ўрни, уларнинг моддий-ижтимоий фаровонлигини таъминлашдаги аҳамияти алоҳида эътироф этилди.
Мажлисда Бюджетдан ташқари Пенсия жамғармаси Амударё туман бўлими бошлиғи Улуғбек Тоиров сўнгги йилларда амалиётга жорий этилган соҳага оид бир қатор Қонун ҳужжатлари, хусусан, 2021 йил 4 майдаги “Фуқароларга давлат пенсияларини тайинлаш жараёнини соддалаштириш ҳамда пенсияни етказиш тизимини янада такомиллаштириш чора-тадбирлари тўғрисида”ги Президент Қарори ва “Фуқароларнинг давлат пенсия таъминоти тўғрисида”ги Ўзбекистон Республикаси Қонунига пенсия тайинлаш тартибини такомиллаштиришга қаратилган ўзгартиш ва қўшимчалар киритиш ҳақида”ги Ўзбекистон Республикаси Қонуни талабларидан келиб чиқиб амалга оширилган кенг қамровли ишлар хусусида батафсил тўхталди. Шу билан бирга 2023 йил 1 ноябрдаги “Аҳолига пенсия тайинлаш бўйича давлат хизматлари сифатини янада оширишга қаратилган қўшимча чора-тадбирлар тўғрисида”ги Президент Қарорининг мазмун-моҳияти ҳақида сўз юритиб, ушбу Қарор билан давлат пенсияларини тайинлашда бюрократик тўсиқларга барҳам берилгани, бу эса фуқароларга қулайлик яратганини алоҳида таъкидлади.
Шунингдек, мажлисда Пенсия жамғармаси туман бўлими бошлиғининг ўринбосари, фуқароларга хизмат кўрсатиш шўъбаси мудири Азамат Кенжаев, бўлимнинг бош мутахассиси Нафиса Бобожоновалар ҳам сўзга чиқишиб, “Аҳолига пенсия тайинлаш бўйича кўрсатиладиган давлат хизматлари сифатини янада оширишга қаратилган қўшимча чора-тадбирлар тўғрисида”ги Президент Қарори билан 2025 йил 1 мартдан бошлаб фуқароларга ёшга доир пенсияларни “Фуқароларнинг давлат пенсия таъминоти тўғрисида”ги Ўзбекистон Республикаси Қонунининг 7-моддасида белгиланган ёшга тўлиши муносабати билан алоҳида мурожаат талаб этмаган ҳолда проактив шаклда тайинлаш тартиби жорий қилингани ва бу тартиб-қоиданинг афзаллик томонлари ҳақида кенг тўхталиб, айни пайтда пенсия ёшига етган фуқаролар бу имкониятлардан самарали фойдаланишаётганларини мамнуният билан таъкидладилар.
Муҳими, фуқароларга пенсия тайинлаш, фарзанд туғилганда бериладиган бир марталик нафақа, дафн маросими учун нафақа тайинлаш, пенсия ва нафақа олувчилар рўйхатида мавжудлиги ҳақида маълумотнома, пенсия ва нафақа миқдори тўғрисидаги маълумотномаларни бериш эндиликда жуда осонлашгани, бюрократик тўсиқларга барҳам берилиб, бу каби маълумотлар Давлат хизматлари маркази ёки Ягона интерактив давлат хизматлари портали орқали олиш белгилангани тизимдаги қоғозбозликка барҳам берди ва соҳа мутахассислари учун қулай шароитлар яратди. Буни мажлисда бўлим мутахассислари ўз иш фаолиятларидаги самарадорлик, сифат кўрсаткичлари билан алоҳида эътироф этдилар.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
