Амударё тумани Адлия бўлимида “Зукко китобхон” танловининг туман босқичи ўтказилди

Мамлакатимизда ёшлар орасида китобга бўлган қизиқишни ошириш, уларнинг дунёқарашини кенгайтириш, жамиятда китобхонликни ривожлантириш, шу билан бирга, кенг жамоатчиликка зиё улашиш мақсадида тегишли ташкилотлар томонидан бир қатор маданий-маърифий тадбирлар ва интеллектуал танловлар ташкил қилиняпти.

Хусусан, жорий йилнинг 15 июль куни Амударё тумани Адлия бўлими томонидан “Зукко китобхон” танловининг саралаш босқичи ўтказилиб, туманимиздаги ёш китобхонларнинг энг билимлари эътироф этилди.

Мазкур танловининг саралаш босқичида иштирок этган ёш китобхонларнинг билимлари туман Адлия бўлими Юридик хизмат кўрсатиш маркази бошлиғи Шавкат Ваисниязов, Давлат хизматлари маркази директори Саид Султанов, ФҲДЁ бўлими мудираси Роҳатой Полвонова ҳамда Давлат хизматлари маркази бўлим бошлиғи Сарвар Хайтбаевлардан таркиб топган ҳакамлар ҳайъати томонидан адолатли баҳолаб борилди.

Дастлаб ҳакамлар ҳайъати раиси Шавкат Ваисниязов сўзга чиқиб, мамлакатимизда ёш китобхонлар қатламини қўллаб-қувватлаш, уларни китобхонликка янада кенг жалб қилиш, жамиятимизда китобхонлар ва зиёлилар мавқейини кўтаришга қаратилган чора-тадбирлар ва интеллектуал танловларнинг аҳамияти тўғрисида фикр-мулоҳазаларини билдирди ва барча иштирокчиларга ғолиб бўлишларида тилакдош бўлди.

Шундан кейин тадбирга бошловчилик қилувчи “Тараққиёт кўзгуси” газетаси таҳририяти махсус мухбири Шоҳзод Қурбонбоев томонидан иштирокчиларга танлов низоми, жавоблар учун ажратилган вақт, саволлар сони ва баҳолаш мезони ҳақида маълумотлар берилди.

Низомга кўра, танловнинг биринчи бошқичи ўзбек ва жаҳон адабиёти намуналаридан тузилган 25та саволдан иборат интеллектуал ўйин шаклида ўтказилди. Ташкилотчилар томонидан барча иштирокчиларга жавобларни ёзиш учун махсус варақалар тарқатилди. Ҳар бир савол ўқиб эшиттирилганидан сўнг жавоб ёзиш учун 1 дақиқа вақт ажратилди ҳамда ҳар бир тўғри жавоб учун 1 баллдан баҳоланди. Ҳакамлар ҳайъати томонидан танлов адолатли ўтказилиши таъминланиб, жараён давомида барча иштирокчилар узлуксиз равишда кузатиб борилди.

Маълумот ўрнида, “Зукко китобхон” танловининг биринчи босқичида тумандаги 33-, 36-, 40- ва 84-сонли умумтаълим мактабларининг энг китобхон 7-10 синф оралиғидаги ўқувчилари ўзаро билимларини синашди. Мазкур босқичда 1-ўринни эгаллаган китобхон Қорақалпоғистон Республикаси босқичига йўлланма олади. Танловнинг якуний ­– мамлакат босқичида 1-ўринни эгаллаган иштирокчи 20 млн сўм миқдорда пул мукофоти билан тақдирланиши белгиланган.

Ҳакамлар ҳайъати тақдим этган натижаларга кўра, иштирокчилардан 3 нафарининг тўплаган баллари тенг келганлиги сабаб улар ўртасида қўшимча савол-жавоб шарти ўтказилди. Қўшимча шарт натижаларига кўра иштирокчилар орасидан энг билимдони аниқланди.

Умимий йиғилган балларга кўра, ҳакамлар ҳайъати томонидан ғолиб ва совриндор иштирокчилар эълон қилинди. “Зукко китобхон” танловининг туман босқичида 3-ўрин билан Миржалол Фарҳодовга, 2-ўрин Баҳорой Собировага ҳамда 1-ўрин билан Юлдуз Турсунбоеваларга насиб қилди. Қолган иштирокчиларга эса “Энг яхши нотиқ”, “Энг ёш китобхон” ҳамда “Энг фаол иштирокчи” номинациялари соҳиб ва соҳибалари бўлишди.

Тадбир якунида ташкилотчилар томонидан ғолиб ва совриндор иштирокчилар диплом ва эсдалик совғалари билан тақдирланди.

Таъкидлаш жоизки, мамлакатимизда китобхонликка берилаётган эътибор ва тегишли ташкилотлар томонидан ўтказилаётган мана шундай интеллектуал танловлар натижасида бугунги кунда ёшлар орасида китобхонлар сафи йил сайин ошиб бормоқда. Умид қиламизки, китобларга ташна бўлган ватанпарвар ёшлар ўз билим ва тафаккури билан Учинчи Ренессанс бунёдкорлари бўлишади.

Шоҳзод Қурбонбоев