Қулай ишбилармонлик муҳити яратилаётгани туфайли тадбиркорлар фаолияти янада ривожланмоқда

Ўзбекистон Республикаси Президентининг Қорақалпоғистонга ташрифи мобайнида ҳудудни комплекс ижтимоий-иқтисодий ривожлантириш борасида қатор ислоҳотлар илгари сурилди. Хусусан, тадбиркорларни ҳар томонлама қўллаб-қувватлаш, уларнинг фаолиятларини янада ривожлантириш мақсадида имзоланган “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида” ҳамда “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги Президент фармонлари соҳадаги ишларда муҳим дастуруламал бўлиб хизмат қилмоқда.

Амударё туманидаги тадбиркорлар ҳам бу каби имкониятлардан самарали фойдаланиб, ўз фаолиятларини янада кенгайтирмоқдалар. “Тилаумуратов Шукрулло” кўп тармоқли хусусий фирмаси раҳбари Жасур Тилаумуратов ҳам ана шундай илғор тадбиркорлардан биридир.

Тадбиркор билан суҳбатлашар эканмиз, ўз фаолиятини 1996 йилда бошлаганини, қарийб 30 йиллик тажрибасида бугунги кунда тадбиркорлар учун берилаётган имкониятлар чексиз эканлигини, улардан унумли фойдаланиш зарурлигини таъкидлайди. 2010 йилда Манғит шаҳрида 2 қаватли “Орзу” тўйхонасини очган ҳамда халқимизнинг тўй-тантаналарида хизмат қилиб келаётган тадбиркор Жасур Тилаумуратовга Ўзбекистон Республикаси Президентининг “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги 129-сонли фармонига асосан қўшимча 16,4 сотих ер майдони ажратилиб, бугунги кунда қурилиш ишлари жадал суръатларда олиб борилмоқда. Қурилиш ичларига 10 нафар қурувчилар жалб қилинган бўлиб, улар қурилишни тез фурсатларда якунлаш учун тинимсиз меҳнат қилишмоқда.

Таъкидлаш жоизки, Қорақалпоғистон Республикасида тадбиркорлик фаолиятини ташкил этишни ва юқори қўшилган қийматли рақобатбардош маҳсулотлар ишлаб чиқаришни рағбатлантириш орқали ҳудудга инвестицияларни жалб қилиш учун қулай шароитлар яратиш, шунингдек, тадбиркорларнинг таклифларини бевосита ўрганиш асосида келгуси етти йилда ривожлантиришнинг белгиланган пировард натижаларига эришиш мақсадида қабул қилинган Президент Фармони билан қатор янги имкониятлар эшиклари очилмоқда.

Берилаётган имкониятлардан оқилона фойдаланаётган илғор ва ташаббускор тадбиркорлардан яна бири Саид Қиличевга ушбу фармон асосида ер майдони ажратилиб, фаолияти янада ривожланмоқда. Тадбиркор Саид Қиличев “Султон-Кумуш” МЧЖ раҳбари, бир қанча овқатланиш марказлари эгаси бўлиб, хусусан, унинг бошқарувчидаги “Нурота” кафесида аҳолига сифатли хизмат кўрсатиш йўлга қўйилган. Халқимизнинг тўй-тантаналари, байрам, маросимларида, қувончли кунларида мазкур умумий овқатланиш муассасалари одамлар билан гавжум.

Эндиликда тадбиркор Президент фармони асосида 4 млрд сўм инвестиция киритиш эвазига ўзига ажратилган 26 сотих ер майдонида болалар учун аттракцион, электромобилларни зарядлаш станцияси, музлаткичли сиғим ташкил этишни мақсад қилган. Ҳозирда ажратилган ер майдонида қурилиш ишлари ярмига етиб қолди.

Қайд этиш жоизки, фармон билан яратилган чексиз имкониятлар тадбиркорларимиз учун имконият эшиларини очмоқда. Жумладан, фармонда тадбиркорлик субъектларининг лойиҳаларига 2025 йил 1 январга қадар “Тадбиркорликни ривожлантириш компанияси” акциядорлик жамияти томонидан, истисно тариқасида, инвестиция лойиҳаларини молиялаштириш ҳамда айланма маблағларни шакллантириш мақсадларига миллий ва хорижий валютада ажратиладиган кредит миқдорининг 75 фоизигача, бироқ 5 млрд сўмдан ортиқ бўлмаган миқдорда, кафиллик шартномасини бир томонлама бекор қилмаслик шарти билан кафиллик тақдим этилиши белгилаб берилган.

Шунингдек, оилавий тадбиркорликни ривожлантириш дастурлари доирасида янгидан ташкил этилган, ҳисоб рақамида маблағ етарли даражада айланмаган тадбиркорлик субъектларига, молиявий қўллаб-қувватлаш учун гаров таъминотидан келиб чиқиб, базавий ҳисоблаш миқдорининг минг бараваригача бўлган миқдорда кредит ажратиш тизими йўлга қўйиш каби кенг имкониятлар кўзда тутилган.

Қолаверса, ҳужжатда ҳудудлардаги оммавий савдоларда турган давлат мулки объектлари 3 ой муддатда сотилмаган тақдирда уларни электрон танлов асосида энг яхши таклиф билдирган талабгорга инвестиция киритиш мажбурияти билан бериш тартиби жорий қилиниши ҳам кўзда тутилган.

Бу каби имконият ва имтиёзлар Қорақалпоғистон Республикасида тадбиркорликни янада ривожлантириш, аҳоли бандлигини таъминлаш ва ҳудуднинг иқтисодий потенциалини оширишда муҳим аҳамият касб этиши шубҳасиз.

Чарос Арслонова, туман ҳокимлигининг Ахборот хизмати раҳбари.