Qulay ishbilarmonlik muhiti yaratilayotgani tufayli tadbirkorlar faoliyati yanada rivojlanmoqda

Oʻzbekiston Respublikasi Prezidentining Qoraqalpogʻistonga tashrifi mobaynida hududni kompleks ijtimoiy-iqtisodiy rivojlantirish borasida qator islohotlar ilgari surildi. Xususan, tadbirkorlarni har tomonlama qoʻllab-quvvatlash, ularning faoliyatlarini yanada rivojlantirish maqsadida imzolangan “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida” hamda “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi Prezident farmonlari sohadagi ishlarda muhim dasturulamal boʻlib xizmat qilmoqda.

Amudaryo tumanidagi tadbirkorlar ham bu kabi imkoniyatlardan samarali foydalanib, oʻz faoliyatlarini yanada kengaytirmoqdalar. “Tilaumuratov Shukrullo” koʻp tarmoqli xususiy firmasi rahbari Jasur Tilaumuratov ham ana shunday ilgʻor tadbirkorlardan biridir.

Tadbirkor bilan suhbatlashar ekanmiz, oʻz faoliyatini 1996-yilda boshlaganini, qariyb 30-yillik tajribasida bugungi kunda tadbirkorlar uchun berilayotgan imkoniyatlar cheksiz ekanligini, ulardan unumli foydalanish zarurligini taʼkidlaydi. 2010-yilda Mangʻit shahrida 2 qavatli “Orzu” toʻyxonasini ochgan hamda xalqimizning toʻy-tantanalarida xizmat qilib kelayotgan tadbirkor Jasur Tilaumuratovga Oʻzbekiston Respublikasi Prezidentining “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi 129-sonli farmoniga asosan qoʻshimcha 16,4 sotix yer maydoni ajratilib, bugungi kunda qurilish ishlari jadal surʼatlarda olib borilmoqda. Qurilish ichlariga 10 nafar quruvchilar jalb qilingan boʻlib, ular qurilishni tez fursatlarda yakunlash uchun tinimsiz mehnat qilishmoqda.

Taʼkidlash joizki, Qoraqalpogʻiston Respublikasida tadbirkorlik faoliyatini tashkil etishni va yuqori qoʻshilgan qiymatli raqobatbardosh mahsulotlar ishlab chiqarishni ragʻbatlantirish orqali hududga investitsiyalarni jalb qilish uchun qulay sharoitlar yaratish, shuningdek, tadbirkorlarning takliflarini bevosita oʻrganish asosida kelgusi yetti yilda rivojlantirishning belgilangan pirovard natijalariga erishish maqsadida qabul qilingan Prezident Farmoni bilan qator yangi imkoniyatlar eshiklari ochilmoqda.

Berilayotgan imkoniyatlardan oqilona foydalanayotgan ilgʻor va tashabbuskor tadbirkorlardan yana biri Said Qilichevga ushbu farmon asosida yer maydoni ajratilib, faoliyati yanada rivojlanmoqda. Tadbirkor Said Qilichev “Sulton-Kumush” MChJ rahbari, bir qancha ovqatlanish markazlari egasi boʻlib, xususan, uning boshqaruvchidagi “Nurota” kafesida aholiga sifatli xizmat koʻrsatish yoʻlga qoʻyilgan. Xalqimizning toʻy-tantanalari, bayram, marosimlarida, quvonchli kunlarida mazkur umumiy ovqatlanish muassasalari odamlar bilan gavjum.

Endilikda tadbirkor Prezident farmoni asosida 4 mlrd soʻm investitsiya kiritish evaziga oʻziga ajratilgan 26 sotix yer maydonida bolalar uchun attraktsion, elektromobillarni zaryadlash stantsiyasi, muzlatkichli sigʻim tashkil etishni maqsad qilgan. Hozirda ajratilgan yer maydonida qurilish ishlari yarmiga yetib qoldi.

Qayd etish joizki, farmon bilan yaratilgan cheksiz imkoniyatlar tadbirkorlarimiz uchun imkoniyat eshilarini ochmoqda. Jumladan, farmonda tadbirkorlik subʼektlarining loyihalariga 2025-yil 1-yanvarga qadar “Tadbirkorlikni rivojlantirish kompaniyasi” aktsiyadorlik jamiyati tomonidan, istisno tariqasida, investitsiya loyihalarini moliyalashtirish hamda aylanma mablagʻlarni shakllantirish maqsadlariga milliy va xorijiy valyutada ajratiladigan kredit miqdorining 75 foizigacha, biroq 5 mlrd soʻmdan ortiq boʻlmagan miqdorda, kafillik shartnomasini bir tomonlama bekor qilmaslik sharti bilan kafillik taqdim etilishi belgilab berilgan.

Shuningdek, oilaviy tadbirkorlikni rivojlantirish dasturlari doirasida yangidan tashkil etilgan, hisob raqamida mablagʻ yetarli darajada aylanmagan tadbirkorlik subʼektlariga, moliyaviy qoʻllab-quvvatlash uchun garov taʼminotidan kelib chiqib, bazaviy hisoblash miqdorining ming baravarigacha boʻlgan miqdorda kredit ajratish tizimi yoʻlga qoʻyish kabi keng imkoniyatlar koʻzda tutilgan.

Qolaversa, hujjatda hududlardagi ommaviy savdolarda turgan davlat mulki obʼektlari 3 oy muddatda sotilmagan taqdirda ularni elektron tanlov asosida eng yaxshi taklif bildirgan talabgorga investitsiya kiritish majburiyati bilan berish tartibi joriy qilinishi ham koʻzda tutilgan.

Bu kabi imkoniyat va imtiyozlar Qoraqalpogʻiston Respublikasida tadbirkorlikni yanada rivojlantirish, aholi bandligini taʼminlash va hududning iqtisodiy potentsialini oshirishda muhim ahamiyat kasb etishi shubhasiz.

Charos Arslonova, tuman hokimligining Axborot xizmati rahbari.