Umumtaʼlim maktablarining yangi oʻquv yiliga qanday tayyorlangani va sinf xonalarining sanitariya-gigiyenik holati oʻrganildi

Amudaryo tumani Sanitariya-epidemiologik osoyishtalik va jamoat salomatligi boʻlimi xodimlari tumandagi umumtaʼlim maktablari maʼmuriyatlari tomonidan 2024-2025 oʻquv yiliga qanday tayyorgarlik koʻrilganini tekshirish maqsadida nazorat tadbirlarini oʻtkazdi.

Tadbirlar davomida maktablar hududida olib borilgan obodonlashtirish, koʻkalamzorlashtirish ishlari, shuningdek, sinfxonalar, fan-laboratoriya xonalari hamda sport zali va oshxonalarning sanitariya-gigiyenik holati oʻrganib chiqildi.

Tuman Sanitariya-epidemiologik osoyishtalik va jamoat salomatligi boʻlimi xodimlari tegishli muassasalar hududida sanitariya-gigiyenik holatni saqlash yuzasidan masʼullarga tavsiyalar berishdi.

Bundan tashqari, umumtaʼlim maktablarining yoritish tizimi holati, muassasaning kuz-qish mavsumga tayyorgarligi, sinfxonalar, fan-laboratoriya xonalarida oʻquv jihozlarining “Umumtaʼlim maktablari, oʻrta maxsus taʼlim muassasalarida sinf xonalariga qoʻyiladigan gigiyenik talablar” nomli uslubiy qoʻllanmada koʻrsatilgan qoidalarga mos ravishda joylashtirilishi koʻzdan kechirildi.

Taʼkidlash joizki, Vazirlar Mahkamasining tegishli qarori bilan tasdiqlangan “Umumiy oʻrta taʼlim toʻgʻrisida”gi Nizom va Adliya vazirligi roʻyxatidan oʻtgan “Umumtaʼlim muassasalarida sinflarni komplektlash hamda tarifikatsiya roʻyxatlarini shakllantirish tartibi toʻgʻrisida”gi Nizomning tegishli bandlarida bitta sinfda oʻquvchilar soni koʻpi bilan 35 nafar boʻlishi lozimligi qayd etilgan. Shunga koʻra, sinfxonalarda oʻquvchilar uchun yaratilishi lozim boʻlgan sharoitlar va bir nafar bolaga toʻgʻri keluvchi xona maydoni belgilangan.

Bundan tashqari “Umumtaʼlim maktablarining saqlanishi va oʻquvchilarni oʻqitilishiga qoʻyiladigan sanitariya-epidemiologik talablar”ga asosan bir nafar oʻquvchiga kamida 2 kvadrat metr sinf maydoni toʻgʻri kelishi kerak. Ushbu normativ hujjatning 4- va 5-boʻlimlarida sinfxonalar, informatika va tabiiy fanlar xonasi, mehnat ustaxonalarida bir nafar oʻquvchiga toʻgʻri kelishi lozim boʻlgan sinf maydoni oʻlchami ham koʻrsatilgan. Agar 35 nafar oʻquvchi bir sinfxonada oʻqitiladigan boʻlsa, eng kamida 70 kvadrat metr maydonga ega xona talab etiladi. Ushbu sinfda birinchi parta va sinf doskasi oʻrtasidagi, oxirgi partadan sinf doskasigacha, sinf yon devori va parta orasidagi, ikki oʻrinli parta qatorlari orasidagi, oxirgi parta va devor orasidagi masofalar belgilangan talablarga muvofiq joylashtirilishi lozim.

Hozirda aksariyat maktablarda sinfxonalar maydoni 24dan 50 kvadrat metrgacha boʻlib, bir sinfda 35 nafardan ortiq oʻquvchi tahsil olishiga toʻgʻri kelgan holatlar ham kuzatiladi.

Tadbirlar davomida oʻquvchilarning shaxsiy gigiyenaga rioya qilishi, ular oʻrtasida yuqumli va parazitar kasalliklarning, shuningdek yuqumli boʻlmagan kasalliklarning oldini olish yuzasidan tegishli tavsiyalar berildi.

Nigora Eshimova, Amudaryo tumani SEO va JSB sanitariya vrachi