1-sonli maktabda “Taʼzim Sizga, mehridaryo ustozlar!” deb nomlangan tadbir oʻtkazildi

Oʻqituvchi va murabbiylar inson kamolotida muhim oʻrin tutadi. Ular avvalo, yoshlarga bilim berish orqali ularning aqliy salohiyatini oshiradi. Bilimli insonlar jamiyatning rivojlanishiga hissa qoʻshadi, yangi texnologiyalar va innovatsiyalarni yaratishda faol ishtirok etadi. Oʻqituvchilarning vazifasi faqatgina dars berish emas, balki oʻquvchilarning mustaqil fikrlash qobiliyatini rivojlantirish, ularni tanqidiy fikrlashga oʻrgatishdir. Shu sababli ham mamlkatimizda oʻqituvchi va murabbiylarga Uchinchi Renessans poydevorini barpo qilishda hal qiluvchi kuch sifatida eʼtibor qaratiladi, ehtirom koʻrsatiladi.

1997-yildan buyon har yili 1-oktyabr sanasida nishonlab kelinayotgan Oʻqituvchi va murabbiylar kuni bayrami Amudaryo tumanidagi 1-sonli umumtaʼlim maktabida ham esda qolarli voqea va tassurotlarga boy tarzda oʻtdi. Sana munosabati bilan tashkil qilingan “Taʼzim Sizga, mehri daryo ustozlar” deb nomlangan tadbirni maktab direktori Dilrabo Sherboyeva ochib berdi va barcha ustozlarni bayram bilan muborakbod etdi.

Tadbir maktabning 5-a sinf oʻquvchilarining oʻzlari tayyorlagan sovgʻa va gullarini ustozlariga taqdim qilish marosimi bilan yuqori kayfiyatda boshlandi. 5-b sinf oʻquvchilarining “Taʼzimdamiz, ustozlar” qoʻshigʻiga raqsi esa bayram tadbiri ishtirokchilariga yanada koʻtarinkilik baxsh etdi. Ustozlarni ulugʻlovchi sheʼrlari bilan 7-a va 5-a sinf oʻquvchilari ham bayram tadbirida faol ishtirok qilishdi. 8-a, 6-v va 8-b sinf qizlari ijro qilgan raqs esa ishtirokchilar qalbiga bahoriy iliqlik olib kirdi.

Aytish joizki, oʻqituvchi va murabbiylar yoshlarning maʼnaviy rivojlanishiga katta taʼsir koʻrsatadi. Ular yoshlarga axloqiy qadriyatlar, vatanparvarlik va insonparvarlik kabi tushunchalarni singdiradi. Bu esa yoshlarning jamiyatda munosib oʻrin egallashlariga yordam beradi. Oʻqituvchi va murabbiylarning mehnati juda qadrlidir.

Tadbir davomida yosh avlodning intellektual va maʼnaviy salohiyatini yuksaltirish, ularni ona Vatanga muhabbat, istiqlol gʻoyalariga sadoqat ruhida tarbiyalash ishlariga qoʻshgan salmoqli hissasi, taʼlim-tarbiya tizimidagi samarali mehnati hamda ijtimoiy hayotdagi faol ishtiroki uchun maktabning bir guruh oʻqituvchilari, xususan, rus tili oʻqituvchisi Muhabbat Ishimbetova, qoraqalpoq tili oʻqituvchisi Dildora Kuchkarova, ingliz tili oʻqituvchisi Barno Eshimbetova, geografiya fani oʻqituvchisi Dilfuza Oʻrazboyeva, boshlangʻich sinf oʻqituvchisi Xosiyat Xudaybergenovalar Amudaryo tumani Maktabgacha va maktab taʼlimi boʻlimi maʼmuriyati tomonidan faxriy yorliq hamda esdalik sovgʻalari bilan taqdirlandi.

Dildora Qoʻchqarova, maktabning qoraqalpoq tili fani oʻqituvchisi