11-SONLI MAKTABDA “EZGULIK, BILIM VA MAʼRIFATNI QUROL QILIB, JAHOLAT VA YoVUZLIK YOʻLINI TOʻSAYLIK!” ShIORI OSTIDA OTA-ONALAR IShTIROKIDA TADBIR OʻTKAZILDI

Bilim, yuksak maʼnaviyat va maʼrifat har qanday yovuzlikning, jaholatning yoʻlini toʻsuvchi qudratli quroldir. Shu bois, hayotini ezgu maqsadlar roʻyobi uchun bagʻishlagan, kuchli bilim va salohiyatga ega boʻlgan insonlar yovuzlikka, jaholatga tik qarashdan, bu illatlarga qarshi kurashishdan aslo qoʻrqmaydilar va ortga chekinmaydilar. Shu bois oʻsib kelayotgan yosh avlodni ezgulikka yoʻldosh va kamarbasta, yuksak maʼnaviyatli, bilimdon, aqlan va jismonan yetuk insonlar qilib tarbiyalash msaqsadida Amudaryo tumanidagi 11-sonli umumtaʼlim maktabida boʻlib oʻtgan tadbirda ilmning, yuksak maʼnaviyatning bebaho ahamiyati alohida eʼtirof etildi.

“Ezgulik, bilim va maʼrifatni qurol qilib, jaholat va yovuzlik yoʻlini toʻsaylik!” shiori ostida 150 nafardan ziyod ota-onalar ishtirokida oʻtkazilgan maʼnaviy-maʼrifiy tadbirda Qipchoq shaharcha fuqarolar yigʻini raisi Nuraddin Xolboyev, "Milliy gvardiya xodimi Islombek Yemberganov, hudud boʻyicha profilaktika inspektori Ulugʻbek Yuldashev, “Hoji Eshon bobo” jomʼe masjidi imom-xatibi Rajabboy Habibullayevlar ishtirok etdilar.

Tadbir ishtirokchilari maktab musiqa toʻgaragi aʼzolari tomonidan kattalar va yoshlarni ezgulik sari ruhlantiruvchi adabiy-musiqiy dastur va koʻrgazmali chiqishlar bilan kutib olindi.

Shundan soʻng mehmonlar maktab foyesida tashkil etilgan oʻquvchilarning qoʻl mehnati bilan yaratgan ajoyib buyumlari, rang-tasvir sanʼati namunalari, oʻqishda, sportda erishgan yutuqlari haqida hikoya qiluvchi koʻrgazma bilan tanishdilar.

Tadbirni maktab direktori Ulugʻbek Mamutov ochdi va bugungi globallashuv jarayonida oila va maktab-mahalla hamkorligining ahamiyati, yosh avlod taʼlim-tarbiyasida kechiktirib boʻlmaydigan muhim masalalar, xususan, yosh avlodni milliy oʻzlikni anglash, anʼana va qadriyatlarga chuqur hurmat ruhida tarbiyalash, ularning qiziqish va intilishlarini qoʻllab-quvvatlash borasida oilaning tutgan oʻrni muhimligini taʼkidladi.

Tadbir davomida maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmurodova maktab pedagogika jamoasining “Ezgulik, bilim va maʼrifatni qurol qilib, jaholat va yovuzlik yoʻlini toʻsaylik!” shiorini oʻzida mujassam etgan ota-onalarga Murojaatini oʻqib eshittirdi.

Shundan soʻng maktab psixologi Dilnoza Shomurodova mazkur Murojaatning mazmun-mohiyati, unda ilgari surilgan daʼvatkor gʻoyalar yuzasidan ota-onalar bilan psixologik trening oʻtkazdi. Tadbirda ishtirok etayotgan barcha ota-onalar treningda faol ishtirok etdi. Psixologik trening qizgʻin bahs-munozaralar, qiziqarli savol-javoblarga boy boʻldi.

Tadbirning adabiy-badiiy qismida maktabning “Turon” havaskorlik teatr jamoasi aʼzolari tomonidan sahnalashtirilgan “Zumrad va Qimmat” ertagi hamda “Alpomish” dostonidan parcha namoyish etildi. Shuningdek, musiqa toʻgaragi aʼzolari joʻr boʻlib kuylagan dilrabo ashulalar, ayniqsa, maromiga yetkazib ijro etilgan mashhur “Sartarosh” qoʻshigʻi tadbir ishtirokchilari tomonidan davomli qarsaklar bilan olqishlandi.

Ezgulik, tinchlik, millatlararo totuvlik, bagʻrikenglik va ona Vatanni madh etuvchi sheʼrlar, kuy va qoʻshiqlar, raqs toʻgaragi aʼzolari tomonidan ijro etilgan oʻzbek va jahon xalqlari raqslari tadbir ishtirokchilariga zavq-shavq bagʻishladi.

Robiya Yoʻldosheva.