Ovqatdan zaharlanish – botulizm kasalligi boʻyicha maxsus amaliy-taktik oʻquv mashgʻuloti oʻtkazildi

Qoraqalpogʻiston Respublikasi Vazirlar Kengashining Raisi – Fuqaro muhofazasi boshligʻining 2024-yil 24-yanvar kungi “Respublika aholisini va hududlarni favqulodda vaziyatlardan muhofaza qilish boʻyicha 2024-yilda bajarilgan tadbirlar yakuni va 2025-yildagi vazifalar toʻgʻrisida”gi tegishli buyrugʻiga asosan Amudaryo tumanida amaliy-taktik oʻquv mashqi oʻtkazildi.

19-noyabr kuni “Oziq-ovqat mahsulotlaridan ommaviy zaharlanishlar bilan bogʻliq kasalliklarning oldini olishda favqulodda vaziyatlar davlat quyi tuzilmasi xizmatlarining hamkorlikdagi harakatlari” mavzusida tashkil etilgan mazkur tadbir avvalida tumandagi 38-sonli maktabning majlislar zalida seminar tashkil etildi.

Seminarni Amudaryo tuman Favqulodda vaziyatlar boʻlimi tezkor boʻlinmasi boshligʻi, kapitan Axan Utebayev ochdi va kun tartibidagi masala yuzasidan batafsil maʼlumotlar berdi.

Seminar davomida tuman Sanitariya-epidemiologik osoyishtalik va jamoat salomatligi boʻlimi sanitariya vrachi Darmonjon Boltaboyeva va boʻlim mudiri Gulshod Tajiboyevalar botulizm kasalligining kelib chiqish sabablari hamda belgilari, uni davolash usullari toʻgʻrisida seminar ishtirokchilariga zarur tushunchalar berdilar.

Shuningdek, yil davomida ovqatdan zaharlanish holatidan shikoyat qilgan bemorlar orasida voyaga yetmagan yosh oʻsmirlar koʻpchilikni tashkil qilishi, bozorlardagi konserva mahsulotlarini xarid qilishda saqlanish muddati oʻtgan-oʻtmaganligini tekshirish, uyda qoʻlbola usulda pomidor va bodringlardan banka yopishda sanitariya qoidalari va ozodalikka rioya qilish, ularni isteʼmol qilishdan oldin suvi, taʼmi va hidi oʻzgarmaganligiga asosiy eʼtiborni qaratish, oʻzgargan mahsulotlarni isteʼmol qilmaslik toʻgʻrisida hayotiy misollar orqali maʼlumotlar taqdim etilib, oʻquv mashqi ishtirokchilariga mavzuga oid eslatmalar tarqatildi.

Oʻquv mashqining amaliy qismida tuman Tez tibbiy yordam boʻlimiga Boʻston mahallasining Gulzor koʻchasida joylashgan uylardan biridan shartli chaqiruv kelib tushdi. Shifokorlar oʻz uyida qoʻlbola usulda tayyorlangan tuzlangan mahsulotlarni isteʼmol qilgan oila aʼzolaridan birining sogʻligi yomonlashgani sababli shartli bemorni botulizm kasalligiga chalingan deb gumon qilib, tuman Tibbiyot birlashmasiga olib ketishdi. Soʻngra oʻquv mashqi ishtirokchilari shartli bemorga tibbiy muolaja qilish jarayoni bilan yaqindan tanishib, amaliy koʻrsatmalar oldilar.

Oʻquv mashqi davomida tuman Sanitariya-epidemiologik osoyishtalik va jamoat salomatligi boʻlimi xodimlari voqea joyini oʻrganishdi va qoʻlbola usulda tayyorlangan konserva mahsulotlaridan namunalar olib, laboratoriyada tekshirishdi. Shundan soʻng Boʻston mahallasi hududidagi xonadonlarda yashovchi aholi ishtirokida profilaktik suhbatlar oʻtkazilib, botulizm kasalligidan saqlanish yuzasidan eslatmalar tarqatildi.

Oʻquv mashqiga jami 60 nafarga yaqin aholi, 4 ta maxsus texnikalar jalb qilindi. Oʻtkazilgan tadbir natijalariga koʻra, fuqaro muhofazasi guruhlarining holati favqulodda vaziyatlarga “cheklangan tayyor”, deb baholandi.

Amudaryo tuman Favqulodda vaziyatlar boʻlimi