Qoraqalpogʻiston Respublikasi Prokuraturasi tomonidan tuzilgan ishchi guruh Amudaryo tumanida boʻldi

Bugun Yangi Oʻzbekistonda jamiyatdagi mavjud har bir soha va ana shu sohadagi har qanday kamchilik yoki yutuq doimiy eʼtiborda va nazoratda. Boisi, har qanday sohada erishilayotgan yutuq eʼtirof etilsa, sohaning kelgusidagi istiqboliga xizmat qiladi. Kamchiliklarni joyiga chiqqan holda oʻrganish va muammolarga barham berish esa kechiktirib boʻlmas vazifa sanaladi. Zero, bugun “galstukni yechib, oyoqqa suv etikni kiyadigan vaqt keldi...”

Yaqinda Qoraqalpogʻiston Respublikasi Prokuraturasi tomonidan tuzilgan ishchi guruh Amudaryo tumanida boʻlib, ijtimoiy-iqtisodiy sohalarda amalga oshirilayotgan ishlarning borishi va mavjud muammolarni oʻrgandi.

Dastlab, ishchi guruh aʼzolari Majburiy ijro byurosi Amudaryo tumani boʻlimi hamda Amudaryo tumani Ichki ishlar boʻlimining Yoʻl harakati xavfsizligi boʻlinmasi xodimlari ishtirokida yoʻl harakati qoidalarini buzib, maʼmuriy huquqbuzarlik sodir qilgan va tayinlangan jarimalarni toʻlashdan boʻyin tovlab yurgan avtotransport vositalari haydovchilarini aniqlash boʻyicha reyd tadbirlarini amalga oshirishdi.

Darhaqiqat, harakat qatnashchisiga aylanar ekanmiz, xoh ulovda boʻlaylik, xoh piyoda barcha birdek yoʻl harakati qoidalariga amal qilishga majburmiz. Sababi birgina beparvolik natijasida butun boshli inson taqdiri oʻzgarishi mumkin. Qoidalarni chetlab oʻtish esa albatta yaxshilikka olib kelmasligi aniq. Huquqbuzarlik natijasida tayinlangan jarimani toʻlashdan boʻyin tovlash esa nafaqat huquqbuzarning oʻziga, balki jamiyatga ham salbiy taʼsirini tekizishi mumkin. Sababi, maʼlum muddatdan keyin jarimani toʻlashning chegirmali muddati oʻtib, majburiy undirishga qaratilishi natijasida qoʻshimcha toʻlov hisoblanishi huquqbuzarning oʻziga moliyaviy zarar keltirsa, ushbu toʻlanajak jarima hisobidan shakllanadigan byudjetdan aholining ehtiyojmand qatlamlariga ijtimoiy yordam koʻrsatish ham kechikishi mumkin. Shu sababli masʼullar ushbu masala boʻyicha haydovchilar bilan tushuntirish-targʻibot ishlarini olib bordilar.

Shundan soʻng, ishchi guruh aʼzolari Amudaryo tumanida qishloq xoʻjaligi sohasida amalga oshirilayotgan ishlar bilan yaqindan tanishdi. Jumladan, fermer va dehqon xoʻjaliklarida yerdan samarali foydalanish holati, chorvachilik, baliqchilik, parrandachilikni rivojlantirish boʻyicha qilinayotgan ishlar va kelgusidagi rejalar bilan tanishib, fuqarolarni, ayniqsa yoshlarni tadbirkorlikka jalb qilish boʻyicha targʻibot ishlarini olib bordilar.

Qishloq xoʻjaligi oziq-ovqat xavfsizligini taʼminlashda hal qiluvchi ahamiyatga ega. Dehqonlarimiz yetishtirayotgan meva-sabzavot va poliz ekinlari, chorvadorlar va parrandachilar, baliqchilik bilan shugʻullanuvchi tadbirkor va fermerlar tomonidan yetkazib berilayotgan oziq-ovqat mahsulotlari hajmining ortishi bozorlarda narx-navo barqarorligining muhim omilidir. Shu sababli ishchi guruh aʼzolari tomorqachilar, dehqon va fermer xoʻjaliklari rahbarlari bilan uchrashib, qishloq xoʻjaligi mahsulotlarini yetishtirish borasida uchrayotgan muammolarini oʻrgandilar va ularni hal qilish boʻyicha choralar beligilab oldilar.

Shuningdek, ishchi guruh aʼzolari tuman hokimligi binosida ovul va mahallalarda faoliyat yuritayotgan hokim yordamchilari, tijorat banklari masʼullari bilan ham uchrashdilar.

Uchrashuvlarda hududlarni jadal ijtimoiy-iqtisodiy rivojlantirish, yangi ish oʻrinlarini yaratish, aholi bandligini taʼminlash orqali doimiy daromad manbalarini yaratish, ayollar va yoshlarni ish bilan taʼminlash, oilaviy tadbirkorlik, hunarmadchilik va tomorqa xoʻjaligini rivojlantirish, oʻzini-oʻzi band qilganlar sonini koʻpaytirib, yoshlarni kasb-hunarga oʻqitish, bu maqsadlar uchun kreditlar va subsidiyalar ajratish masalalarida hokim yordamchilari tomonidan amalga oshirilayotgan ishlar muhokama markazida boʻldi. Qolaversa, tijorat banklari tomonidan aholiga va yuridik shaxslarga kreditlar ajratish, kreditlardan maqsadli foydalanish jarayonini monitoring qilish, muammoli kreditlarni aniqlab, ularning undirilishini taʼminlash masalalari ham muhokama qilindi.

Shundan soʻng, ishchi guruh aʼzolari joylarga chiqib, yoshlarning muammolari bilan yaqindan tanishdilar. Yoshlar bilan uyma-uy yurib oʻtkazilgan suhbatlar davomida ularni qiynab kelayotgan muammolar oʻrganilib, muammolarni hal qilish boʻyicha tegishli choralar belgilandi. Uchrashuvlarda yoshlarning bandligini taʼminlash, ularning doimiy daromadga ega boʻlishiga imkoniyat yaratish maqsadida tadbirkorlikka keng jalb qilish, kasb-hunarga oʻrgatish, oʻzini-oʻzi band qilish tamoyili asosida subsidiya hisobidan ish qurollari, texnika vositalari bilan taʼminlash boʻyicha koʻrilayotgan choralar oʻrganildi. Bu borada yechimini kutayotgan muammolar tahlil qilinib, tegishli choralar belgilandi.

Ishchi guruh aʼzolari Byudjetdan tashqari pensiya jamgʻarmasi Amudaryo tumani boʻlimi binosida mutasaddi tashkilotlar ishtirokida yigʻilish oʻtkazib, pensiya tayinlashda uchrayotgan muammolarni bartaraf qilish, bu boʻyicha aholining murojaatlarini oʻrganish va unga oʻz vaqtida ijobiy yechim topish, sohada samaradorlikni yaxshilash, korruptsiyaning oldini olish, fuqarolarning murojaatlari bilan ishlash holatini oʻrganib, bu borada uchrayotgan kamchiliklarni hal qilish boʻyicha mutasaddi rahbarlarga tegishli tavsiyalar berdi.

Mamlakatimizda amalda boʻlgan “Davlat organlari xalqqa xizmat qilishi kerak” degan tamoyil davlat boshqaruvidagi eng asosiy demokratik va insonparvarlik printsiplaridan biridir. Bu tamoyilning mazmun-mohiyati shundaki, davlat organlari va ularning xodimlari xalqning manfaatlari, huquqlari va qonuniy talablarini taʼminlash uchun ishlashi, ularga xizmat qilishda ochiq va masʼuliyatli boʻlishi shart. Ushbu tamoyilning amaldagi ijrosi davlat organlari faoliyatida shaffoflik va hisobdorlikni oshirish, fuqarolarning davlat organlariga boʻlgan ishonchini yanada kuchaytirish va xalq hamda davlat oʻrtasidagi hamkorlikni mustahkamlashda muhim omil boʻlmoqda.

Qoraqalpogʻiston Respublikasi Prokuraturasi tomonidan oʻtkazilgan oʻrganishlar ham davlat boshqaruvi tizimida xalq manfaatlarini ustuvor qilib, xalqimizga yanada adolatli, sifatli va samarali xizmat koʻrsatishni yoʻlga qoʻyishdek xayrli maqsadlarga xizmat qilishi shubhasiz.

Aziza Madrahimova