TUMAN OILA VA XOTIN-QIZLAR BOʻLIMI FAOLIYaTIGA BIR NAZAR

Ayol bilan olam munavvar, degan iborani juda koʻp ishlatamiz. Ayolga, onaga mehr va ehtiromimizni ifodalash uchun soʻzlar xazinasidan eng goʻzal marjonlar tizishga harakat qilamiz. Baribir koʻnglimiz toʻlmaydi, axir balandparvoz gaplar bilan uni baxtiyor qilishning iloji ham yoʻq-da. Baribir ayolning hayotini yaxshi va nurli tomonga oʻzgartirish maqsadida uning ogʻirini yengil, mushkulini oson qilgimiz kelaveradi. Buning uddasidan goho chiqsak, goho ayolni qiynayotgan muammolar yechimini topishda davlatimiz gʻamxoʻrligiga suyanamiz.

Amudaryo tumanida istiqomat qiluvchi 215 ming nafardan ziyod aholining deyarli teng yarmini — 104 ming 534 nafarini ayol-qizlar tashkil etadi. Tuman Oila va xotin-qizlar boʻlimi faoliyatining mazmun-mohiyatida ham ana shu ayollar uchun yengilliklar yaratish, muammolarini joyiga chiqqan holda tizimli hal etish, sektorlar rahbarlarining takliflari asosida mahallabay ishlash, ayollarning ijtimoiy faolligini oshirishga qaratilgan chora-tadbirlar mujassam.

Oʻtgan 2024-yil davomida 5-bosqich “Ayollar daftari” roʻyxatiga jami 5 ming 600 nafar xotin-qizlar kiritilib, ulardan 5 ming 525 nafari turli toifadagi ijtimoiy yordamlar bilan qamrab olindi.

Prezidentimizning 2024-yil 7-mart kungi “Xotin-qizlarning tadbirkorligini yoʻlga qoʻyish va rivojlantirishni qoʻllab-quvvatlashga oid qoʻshimcha chora-tadbirlar toʻgʻrisida”gi Qarori asosida aprel oyida barcha mahalla va ovullarda xatlov oʻtkazildi. Xatlov natijasiga koʻra, 5 ming 841 nafar xotin-qizlar ishsizligi aniqlandi. Olib borilgan amaliy chora-tadbirlar tufayli hozirgi kunga qadar 5 ming 778 nafar xotin-qizlarning bandligi taʼminlandi.

Oila, deb atalmish moʻʼjaz vatanning har tomonlama gullab-yashnashi, oila aʼzolarining oʻzaro mehr-oqibatli, totuvlikda yashashlari koʻp jihatdan oila bekalariga bogʻliq.

Shu bois, tumanda oilaviy qadriyatlarni yanada mustahkamlash, ayolning jamiyatdagi nufuzini oshirish, el-yurtda katta hurmat va eʼtiborga munosib oilalar bekalarining katta hayotiy tajribalarini yosh oilalar oʻrtasida keng ommalashtirish maqsadida “Oila va xotin-qizlar maskani” faoliyati yoʻlga qoʻyildi.

Donishmand xalqimiz zakosi tufayli yaralgan durdona hikmatlardan biri ayol-qizlarni bilimli, kasb-korli qilishning jamiyat ravnaqi uchun mislsiz ahamiyatiga qaratilgani ayolga eʼti­bor va ehtiromning yorqin ifodasidir. Unga koʻra, “Bir yigitning bilim olishi bitta oila­ning, bir ayol-qizning ilmli boʻlishi — butun jamiyatning oʻqimishli va maʼnan boy boʻlishining kafolatidir.” Bu borada Amudaryo tuman Oila va xotin-qizlar boʻlimi tomonidan amalga oshirilayotgan ishlar ibratga, eʼtiborga munosib. Xususan, oʻtgan 2024-yil davomida Prezident Farmonlari hamda Oʻzbekiston Respublikasi Vazirlar Mahkamasining tegishli Qaroriga koʻra, jami 260 nafar xotin-qizlarga OTMga kirish uchun tavsiyanomalar berildi.

Tumanda oilalar mustahkamligini taʼminlash, oilaviy kelishmovchiliklarning oldini olish, begunoh bolalarning arzimagan sabablar bilan yarim yetim boʻlib qolishlarining oldini olishga qaratilgan saʼy-harakatlar tufayli 2024-yil davomida “Oilaviy qadriyatlarni mustahkamlash” komissiyalari tomonidan ajrashish yoqasiga kelib qolgan 113ta oila yarashtirilishiga erishildi.

Ayni paytda Amudaryo tuman Oila va xotin-qizlar boʻlimi tomonidan 2025-yil uchun belgilangan ulugʻvor rejalarni bajarish borasidagi ishlarga dadillik bilan kirishilmoqda. Unga koʻra, 2025-yilda 4073 nafar xotin-qizlarning bandligini taʼminlashga koʻmaklashiladi.

Sayhunobod tajribasi boʻyicha 1065 nafar xotin-qizlar asalarichilik, parrandachilik, issiqxona, baliqchilik va boshqa yoʻnalishlarda kasb-hunarga oʻqitiladi. Shuningdek, lider tadbirkor ayollarga 385 nafar ehtiyojmand xotin-qizlarni biriktirish orqali daromad topishga oʻrgatiladi.

Biznesini kengaytirishga koʻmaklashish orqali 1295 nafar xotin-qizlar tomonidan 2590ta yangi ish oʻrinlari yaratiladi. Yil davomida 20ta xonadonda meva, sabzavotlar, sut mahsulotlarini qayta ishlash, mato toʻqish, tikish va boshqa yoʻnalishlardagi kichik ishlab chiqarish tsexlarini tashkil etish, mehnat muhojirligidan qaytgan 140 nafar xotin-qizlarning bandligini taʼminlash choralari koʻriladi. Shuningdek, ipakchilik sohasida 6210 nafar xotin-qizlar band qilinib, oʻrmon xoʻjaligi mutaxassislari koʻmagida daraxt, gul koʻchatlari yetishtirish boʻyicha 70 nafar xotin-qizlar kasb-hunarga oʻqitiladi.

Boquvchisini yoʻqotgan 950 nafar ehtiyojmand xotin-qizlarga ijtimoiy koʻmak koʻrsatiladi. Bundan tashqari, 3ta mahallada boʻsh bino yoki 3 sotixli yer maydonida “Xotin-qizlar bandligini taʼminlash va salomatligini mustahkamlash markazlari” tashkil etilib, nizoli 5ta oila bilan manzilli ishlash, 4ta mahallada “Sogʻlom oila maslahat markazi” faoliyatini yoʻlga qoʻyish orqali oilani ixtiyoriy rejalashtirish, sogʻlom ovqatlanish, sogʻlom turmush tarzi talablari boʻyicha oʻqitish ishlari tashkil etiladi va profilaktik hisobda turgan 125 nafar xotin-qizlar bilan alohida ishlar olib boriladi.

Tumanda xotin-qizlar tadbirkorligini yanada rivojlantirish maqsadida 455 nafar ayol-qizlarni tadbirkorlik koʻnikmalariga oʻqitish orqali isteʼmol bozorida xaridorgir boʻlgan mahsulotlar ishlab chiqarish va ushbu yoʻnalishda savdo-sotiq faoliyatini rivojlantirish koʻzda tutilgan.

Tuman Oila va xotin-qizlar boʻlimi tomonidan 2025-yilda amalga oshirilishi rejalashtirilayotgan keng koʻlamli chora-tadbirlarning barchasi oila institutini yanada rivojlantirish, ayollarning ijtimoiy faolligini yuksaltirish, ularning nafaqat oilada, balki jamiyatdagi nufuzini mustahkamlashga qaratilgan. Chunki ayolning koʻngli xotirjam boʻlsa, oila baxtli, jamiyatimiz tinch, osuda, mamlakatimiz tobora farovonlashib boraveradi. Zotan, ayol mehri-muhabbati bilan nainki oila, butun olam munavvar!

Robiya Yoʻldosheva.