ChUQURLAShTIRILGAN TIBBIY KOʻRIK AHOLINING TIBBIY MADANIYaTINI OShIRISh IMKONINI BERMOQDA

Salomatlikdan ulugʻ davlat yoʻq, deyishadi. Chunki inson ham jismonan, jam aqlan sogʻlom boʻlsagina oʻz oldiga ezgu rejalar qoʻyadi, shirin orzular ogʻushida yashaydi. Oʻziga, sogʻligiga eʼtiborli boʻlgan odamlar uchun yangi-yangi rejalar, orzular ogʻushida yashash juda maroqli. Lekin koʻpchilik hollarda inson oʻzining beparvoligi, vujudidagi xastalikni pisand qilmay, “shunchaki shamolladim, oʻtib ketadi”, qabilida ish tutishi natijasida oʻz sogʻligiga jiddiy zarar yetkazayotganini, oqibatda tanasida shamollashning ogʻir oqibatlari bilan kurashib yashashga majbur boʻlib qolajagini juda kech anglab yetadi. Anglaganida esa xastalikni ancha oʻtkazib yuborgan boʻlishadi. Bekorga ulugʻ bobokalonimiz Abu Ali Ibn Sino hazratlari: “Agar shamollash kasalligi va changli, iflos havo boʻlmaganida inson ming yil umr koʻrardi”, demaganlar. Shuning uchun hamisha sogʻlom, baquvvat, jismonan va aqlan faol boʻlishni xohlagan odam, eng avvalo jism-u joni, yaʼni tanasi tarbiyasi bilan muntazam shugʻullanishi, sogʻlom turmush tarziga qatʼiy amal qilishi joiz.

Amudaryo tuman Tibbiyot birlashmasi shifokorlari tomonidan tuman ovul va mahallalari aholisini chuqurlashtirilgan tibbiy koʻrikdan oʻtkazish, onalar va bolalar reproduktiv salomatligini mustahkamlash, tibbiy koʻrik jarayonida aniqlangan kasalliklarga toʻgʻri tashxis qoʻyish, bemorlarga statsionar va ambulator davo choralarini qoʻllash orqali ularni sogʻlomlashtirish choralari koʻrilayotgani bois, soʻnggi yillarda aholining oʻrtacha umr koʻrish koʻrsatkichi sezilarli darajada oshdi. Bunga biz joriy yilning 28-yanvar sanasida tumanning Qilichboy mavzesidagi Toshqalʼa mahalla fuqarolar yigʻini aholisini chuqurlashtirilgan tibbiy koʻrikdan oʻtkazish boʻyicha amalga oshirilgan ishlar bilan tanishish asnosida yaqqol guvoh boʻldik.

Nukus shahridagi Ilmiy-amaliy markazdan tashrif buyurgan tor doiradagi malakali mutaxassislar va Amudaryo tuman Tibbiyot birlashmasi shifokorlari hamkorligida oʻtkazilgan tibbiy koʻrik jarayonida mobil poliklinika, mobil raqamli zamonaviy rentgen uskunalaridan samarali foydalanilgani bois, kasallikni aniqlash, toʻgʻri tashxis qoʻyish hamda davo choralarini belgilash muvaffaqiyatli tarzda amalga oshirilmoqda.

Chuqurlashtirilgan tibbiy koʻrik jarayoniga 3 ming 59 nafar aholi jalb qilindi. Tibbiy koʻrikning ilk kunida 468 nafar fuqaroning sogʻligi qatʼiy tekshiruvdan oʻtkazilib, ulardan 76 nafarida turli xil kasalliklar borligi aniqlandi va 1 nafar bemorga statsionar, 75 nafariga esa ambulator davo choralari belgilandi.

Tadbir boshlanganidan beri hudud aholisining 1787 nafari chuqurlashtirilgan tibbiy koʻrikdan oʻtkazildi. Ulardan 270 nafarida turli toifadagi kasalliklar aniqlanib, sogʻlomlashtirish choralari koʻrildi. 61 nafar shaxsga esa mutaxassis shifokorlarning tibbiy koʻrsatmalariga asosan bepul dori vositalari taqdim etildi.

Ayni kunlarda mahalla aholisini chuqurlashtirilgan tibbiy koʻrikdan oʻtkazish tadbirlari davom etmoqda. Amalga oshirilayotgan chora-tadbirlardan koʻzlangan maqsad esa xalqimizning har tomonlama sogʻlom va oʻz hayotidan rozi yashashlariga, aholi oʻrtasida sogʻlom turmush tarzini qaror toptirishga hissa qoʻshishdir. Bundan ham muhimi, aholining oʻz sogʻligi uchun eʼtiborli boʻlishi borasidagi zarur tushunchalarni, sogʻlom turmush tarziga amal qilish bilan bogʻliq maʼlumotlarni taqdim etish orqali ularning tibbiy madaniyatini oshirishga yaqindan yordam berish. Zero, xalq sogʻlom va oʻtayotgan har bir kunidan rozi boʻlsagina mamlakatimiz yuksak taraqqiyot sari yuz tutadi.

ROBIYa YOʻLDOShEVA.