Koʻchangizni asfalt qilish, stadion, bolalar maydonchasi qurish kerakmi? “Tashabbusli byudjet”ga loyiha kiritishga shoshiling!

Keyingi yillarda aholini byudjet jarayoniga keng jalb qilish, fuqarolarning oʻzi yashayotgan hududidagi muammolarning hal etilishi boʻyicha oʻz tashabbusi bilan takliflar kiritishi, shuningdek, byudjet mablagʻlarining bir qismini jamoatchilik fikri asosida yoʻnaltirish boʻyicha bir qancha ishlar amalga oshirilmoqda. Bu borada “Tashabbusli byudjet” loyihasi yaqindan yordam bermoqda.

Xabaringiz bor, “Tashabbusli byudjet”ning 2025-yilgi 1-mavsumi 1-fevraldan boshlanib, 20-martga qadar davom etadi. Eslatib oʻtamiz, bunda loyiha kiritish bosqichi 1–20-fevral kunlari boʻlib oʻtadi. Saralash bosqichi esa 21-fevral – 7-mart kunlari oʻtkaziladi. Shuningdek, targʻibot bosqichi 8–10-mart, ovoz berish bosqichi esa 11–20-mart kunlari oʻtkaziladi. Shu tariqa, 1-mavsum gʻoliblari 21-mart — Navroʻz bayrami kuni eʼlon qilinadi.

Loyihalarni moliyalashtirish uchun ushbu mavsumga 2 trillion 271 milliard soʻm ajratilgan. Shuningdek, har yili tuman va shahar byudjetidan 10 tadan kam boʻlmagan, koʻpi bilan 30 ta loyiha uchun yetarli mablagʻ ajratilishi belgilangan. Bunda 10 tadan ortiq loyiha uchun mablagʻlar tuman yoki shahar aholisining tegishli hududdagi ulushidan kelib chiqib taqsimlanadi. Shu bilan birga, Prezidentning 2024-yil 25-dekabrdagi qaroriga asosan Tashabbusli byudjet jarayoni uchun tuman (shahar)larda ajratiladigan mablagʻlar miqdorini rejalashtirishda hududdagi aholi sonidan kelib chiqib taqsimlash nazarda tutilgan.

Hozirgi kunda loyihalarning eng yuqori chegaraviy qiymati 1,5 milliard soʻmni tashkil etadi. Shunga koʻra, tuman va shahar byudjetidan ajratiladigan mablagʻlarning eng kam miqdori 15 milliard soʻm, eng yuqori miqdori esa 45 milliard soʻm etib belgilandi.

Yon-atrofdagi kamchiliklarga koʻz yummaslik, jamiyat hayotiga, islohotlarga dahldorlik hissi, oʻz hududidagi muammolarning hal boʻlishida faol ishtirok etish har bir inson uchun muhim vazifa. Shunday ekan, siz ham “Tashabbusli byudjet” jarayonlarida tashabbus koʻrsating, faol boʻling!

Manba: daryo.uz