1-SONLI MAKTABDA “NAVOIY VA BOBUR – QALBIMIZDA” MAVZUSIDA TADBIR OʻTKAZILDI

Tilimiz, milliy madaniyatimiz va maʼnaviyatimiz koʻzgusiga aylangan Mir Alisher Navoiy hamda Zahiriddin Muhammad Bobur hayoti va ijodi xalqimiz uchun chinakam ibrat maktabidir. Chunki Navoiy va Bobur asarlaridagi ezgulik, yaxshilik va halollik kabi umuminsoniy fazilatlar barcha davr uchun birday qadrli va el-u elatlarni, millatlarni, xalqlarni bir-biriga yaqinlashtiruvchi, tarbiyalovchi, ulugʻvor ishlarga ilhomlantiruvchi taʼlimiy qudratga ega. Shu bois, ikki buyuk daho yaratgan durdona asarlar hamon sevib oʻqiladi.

Amudaryo tumanidagi 1-sonli umumtaʼlim maktabida boʻlib oʻtgan “Navoiy va Bobur – qalbimizda” deb nomlangan adabiy-musiqiy, maʼnaviy-maʼrifiy tadbirda bu haqda oʻquvchilar faxrlanib soʻz yuritdilar. Maktabning ona tili va adabiyot fani oʻqituvchilari rahbarligida oʻquvchilar tomonidan maktab sahnasi Navoiy va Bobur asarlari, ikki buyuk shoir hayotiga oid suratlar, ularning zamondoshlari hamda olimlar tomonidan bildirilgan durdona fikrlar bitilgan lavhalar, maktab oʻquvchilarining eng sara insholari bilan bezatildi.

Tadbirni maktabning 6-a sinf oʻquvchilari gʻazalxonlik mushoirasi bilan boshlab berdilar. Unda Navoiy va Bobur gʻazallarini eng koʻp yod olgan oʻquvchilar Charos Yangiboyeva, Durdona Qurbonboyevalar oʻzlarining gʻazalni ifodali oʻqish sanʼatlari bilan tadbir ishtirokchilariga lirik kayfiyat bagʻishladilar. 9-sinf oʻquvchilari Kumushoy Gulmurodova, Hulkaroy Qurbonboyeva, Durdona Mahmudova hamda Sevinchoy Kamolovalar ijrosidagi Navoiy va Bobur gʻazallariga bastalangan mumtoz navolar joʻrligidagi raqslar esa tadbirning fayziga fayz qoʻshdi.

Adabiy-musiqiy tadbirning dramatik qismi maktab oʻquvchilarining ikki buyuk daho hayoti va ijodi oʻzlari uchun juda katta taʼlimiy va tarbiyaviy ahamiyatga egaligining amaliy ifodasi boʻldi. Unda oʻquvchilar toʻgʻrilik va egrilik, oliyjanoblik va saxiylik mavzularida sahna koʻrinishlarini mahorat bilan namoyish etishdi.

Tadbir davomida Soʻgʻdiyona Madaminova, Tursunoy Bahromovalar tomonidan ijro etilgan dilrabo raqslar, “Navoiy va Bobur – qalbimizda” shiori ostida yangragan sheʼr-u gʻazallar tadbirga yanada ulugʻvorlik, ishtirokchilarga buyuk ajdodlarimizdan faxrlanish tuygʻularini baxsh etdi.

ROBIYa YOʻLDOShEVA.