Tafakkur va kasbiy tajriba uygʻunligi: tuman Tibbiyot birlashmasi xodimlari oʻrtasida shaxmat musobaqalari oʻtkazildi

Shaxmat – aql va strategik tafakkurni rivojlantiruvchi eng goʻzal sport turlaridan biri hisoblanadi. Bu oʻyin nafaqat bolalar va yoshlar, balki kattalar, turli kasb egalari uchun ham foydalidir. Ayniqsa, shifokorlar uchun shaxmat eʼtibor, xotira va tahliliy fikrlash qobiliyatlarini shakllantiruvchi muhim vosita sanaladi. Shu sababli, yaqinda Amudaryo tumani Tibbiyot birlashmasi bosh shifokori kubogi uchun tibbiyot xodimlari oʻrtasida shaxmat boʻyicha musobaqalar tashkil etildi.

Tadbirda Joʻqorgʻi Kenges raisining shaxmat sporti boʻyicha maslahatchisi Muftulla Qutibayev, Qoraqalpogʻiston Respublikasi shaxmat federatsiyasi ijrochi direktori Ziyadulla Abipov, FIDE arbitri Rustam Davlatov va tibbiyot xodimlari ishtirok etishdi. Musobaqani tuman sport maktabi shaxmat murabbiyi Zafar Qurbonov boshqarib bordi.

Tadbir davomida Rustam Davlatov va Muftulla Qutibayevlar soʻzga chiqib, mamlakatimizda shaxmat sportiga qaratilayotgan eʼtibor, sportchilar uchun yaratilayotgan zamonaviy sharoitlar hamda yurtimiz shaxmatchilarining xalqaro maydondagi yutuqlari haqida soʻz yuritdi. Ayniqsa, amudaryolik yosh shaxmatchi Shohjahon Mamatsoliyevning muvaffaqiyatlari alohida eʼtirof etildi. U joriy yil yanvar oyida maktab oʻquvchilari oʻrtasida oʻtkazilgan Oʻzbekiston chempionatida 15 yosh toifasida blits yoʻnalishida gʻoliblikni qoʻlga kiritib, sport ustaligiga nomzod koʻrsatkichini bajargan edi. Bundan tashqari, tuman Tibbiyot birlashmasi shifokori Jahongir Erimbetov 2024-yilda shaxmat boʻyicha tibbiyot xodimlari oʻrtasida oʻtkazilgan musobaqada mamlakat miqyosida 2-oʻrinni egallagan edi.

Bugungi kunda shaxmat sportini ommalashtirish boʻyicha mahallalar va taʼlim muassasalarida, shuningdek, turli tashkilotlarda ham keng qamrovli ishlar olib borilmoqda. Shaxmat insonning aqliy va psixologik holatini mustahkamlovchi samarali mashgʻulot hisoblanadi. Ayniqsa, shifokorlar doimiy ravishda katta hajmdagi tibbiy maʼlumotlarni yodda saqlashi, murakkab vaziyatlarni tahlil qilishi va aniq tashxis qoʻyishi talab etiladi. Shaxmat esa xotirani mustahkamlab, tahliliy fikrlashni rivojlantiradi.

Shaxmat oʻyinida har bir yurish oldindan puxta rejalashtirilishi zarur boʻlgani kabi, tibbiy muolaja va jarrohlik amaliyotlarida ham diqqat-eʼtibor va muvofiqlashtirish muhim ahamiyatga ega. Shifokorlar muvaffaqiyatga erishish uchun bemorlar va hamkasblar bilan samarali muloqot oʻrnatishi, muammolarni sabr bilan hal qilishi lozim. Tibbiyot sohasidagi mutaxassislarning shaxmat bilan shugʻullanishi ularning shaxsiy rivoji va kasbiy samaradorligiga ham ijobiy taʼsir koʻrsatadi.

Shaxmat tibbiyot xodimlari uchun hordiq chiqarish vositasi, shu bilan birga, kasbiy mahorat va aqliy salohiyatni oshirishga xizmat qiluvchi samarali sport turi hamdir.

21-fevral kuni tuman Tibbiyot birlashmasi bosh shifokori Faxriddin Abdullayev ishtirokida musobaqada yuqori natijalarni qayd etgan xodimlarni taqdirlash marosimi boʻlib oʻtdi. Tadbirda soha masʼullari, boʻlim shifokorlari va boshqa ishchi xodimlar qatnashdi. Bosh shifokor Faxriddin Abdullayev musobaqa yuqori saviyada oʻtkazilganligi uchun tashkilotchilar va barcha ishtirokchilarga minnatdorchilik bildirib, shaxmatning tibbiyot xodimlari faoliyatidagi ahamiyatini taʼkidladi.

Shundan soʻng, tuman Tibbiyot birlashmasi sport targʻibotchisi Ibodulla Nurimbetov musobaqaning yakuniy natijalarini eʼlon qildi. Faxrli oʻrinlarni egallagan ishtirokchilar Qoraqalpogʻiston Respublikasi shaxmat federatsiyasi va tuman Tibbiyot birlashmasi tomonidan kubok, medal va esdalik sovgʻalari bilan taqdirlandi.

Shohzod Qurbonboyev.