DXX Chegara qoʻshinlariga qarashli harbiy qismda “Ochiq eshiklar kuni” oʻtkazildi
Jahonda yuz berayotgan murakkab siyosiy jarayonlar, turli xil tahdidlar har bir mamlakatni Qurolli kuchlar salohiyatini oshirishga, mudofaa ishlarini isloh qilishga va eng avvalo tinchlik neʼmatining qadriga yetishga hamda uni asrab-avaylashga daʼvat etadi. Yurtimizda ham bu borada olib borilayotgan islohotlar kun kelib oʻzining ijobiy samarasini berishi shubhasiz.
2025-yilga moʻljallangan davlat dasturi loyihasida umumtaʼlim tashkilotlarida chaqiruvga qadar boshlangʻich tayyorgarlik fanini oʻquv-uslubiy va dasturiy jihatdan takomillashtirib borish, fan oʻqituvchilarining faoliyatini yanada qoʻllab-quvvatlash, shuningdek, belgilangan tartibda bosqichma-bosqich moddiy-texnik jihatdan taʼminlab borish belgilab qoʻyilgan. Maʼlumki, maktablarda oʻtilayotgan chaqiruvga qadar boshlangʻich tayyorgarlik fani oʻquvchi yoshlarda Armiya haqidagi dastlabki, nazariy tasavvurlarni uygʻotsa, DXX chegara qoʻshinlariga qarashli harbiy qismlarda oʻtkazilib kelinayotgan “Ochiq eshiklar kuni” tadbirlari oʻquvchilarda bu boʻyicha amaliy koʻnikmalarni shakllantiradi. Yaʼni oʻquvchilar harbiy qismga tashrif barobarida askarlarimizning harbiy hayoti bilan yaqindan tanishadilar.
Yaqinda Amudaryo tumani DXX Chegara qoʻshinlariga qarashli harbiy qismlardan birida “Ochiq eshiklar kuni” tadbiri oʻtkazildi. Tadbirda masʼul ofitser Otabek Madolimov, DXX chegara qoʻshinlari harbiy xizmatchisi Mirjahon Majidov, tuman Mudofaa ishlari boʻlimi boshligʻi, mayor Shuhrat Mamatov, Nukus harbiy Prokuraturasining prokuror yordamchisi Ulugʻbek Daubayev hamda tumanimizdagi 4-, 22-, 36-sonli umumtaʼlim maktablari va ixtisoslashtirilgan maktab oʻquvchilari ishtirok etdilar.
Tadbirning asosiy maqsadi yoshlarni vatanparvarlik ruhida kamol toptirish, ularda shu yurt taqdiriga va kelajagiga daxldorlik tuygʻusini uygʻotish hamda chinakam vatan himoyachilarini kashf etishdan iborat boʻlib, oʻquvchilar tadbir davomida muddatli harbiy xizmatni oʻtayotgan askarlarimizning yashash joylari, ularga yaratilgan sharoitlar bilan yaqindan tanishdilar. Shu bilan birga, ular harbiy texnikalardan, qurol-aslahalardan, xizmat otlari va xizmat itlaridan foydalanish, ular bilan qay tartibda ishlash boʻyicha maʼlumotga ega boʻldilar.
Joriy yilda Oʻzbekiston armiyasi dunyoning eng kuchli armiyalari reytingida 145 mamlakat ichida 58-oʻrinni egalladi. Shuningdek, Oʻzbekiston mazkur natija bilan oʻtgan yilgi koʻrsatkichidan 7 pogʻona yuqorilagan. Albatta, bu yurtimizda Qurolli kuchlarga qaratilayotgan eʼtiborning yorqin namunasidir.
Armiya safida yigitlik burchini aʼlo darajada oʻtayotgan, vataniga sidqidildan xizmat qilayotgan oʻgʻlonlarimizni ragʻbatlantirib borish, ularning safini kengaytirish ham muhim oʻrin tutadi. Tadbir davomida Fargʻona viloyatining Soʻx tumanida harbiy xizmatni oʻtayotgan, xizmat davomida safdoshlariga namuna boʻlayotgan amudaryolik yigitlar – oddiy askarlar Shohrux Axmatov hamda Abror Madatovlarning ota-onalariga Chegara Qoʻshinlari Qoʻmondoni tomonidan minnatdorchilik xatlari topshirildi.
“Ochiq eshiklar kuni”da maktab oʻquvchilariga ona yurt sarhadlarida sobit qadam boʻlib, oʻzi tugʻilib oʻsgan diyorning tinchligi va osoyishtaligini saqlash har bir farzandning muqaddas burchi ekanini alohida taʼkidlandi. Shuningdek, vatan tinchligi yoʻlida fidokorona xizmat qilib, mardlarcha halok boʻlgan bir qator harbiylarimizning sharafli umr yoʻlini oʻquvchilarga ibrat sifatida keltirib oʻtildi. Jarayon davomida tadbir ishtirokchilari harbiylardan oʻzlarini qiziqtirgan savollarga tegishlicha javoblar oldilar.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
