DAVLAT KADASTRLARI PALATASI QORAQALPOGʻISTON RESPUBLIKASI BOShQARMASI BOShLIGʻINING SAYYoR QABULI TAShKIL QILINDI
Mamlakatimizda fuqarolarning uy-joyga boʻlgan shaxsiy huquqlarini himoya qilish, yillar davomida peshona teri evaziga bunyod etilgan bino va inshootlarining huquqiy jihatdan daxlsizligini taʼminlashga qaratilgan chora-tadbirlar tufayli soʻnggi yillarda koʻplab fuqarolarning oʻzboshimchalik bilan egallab olgan yer uchastkalarida bunyod etilgan uy-joylari, maishiy bino va inshootlariga boʻlgan mulk huquqlari eʼtirof etilib, davlat roʻyxatidan oʻtkazilmoqda.
Maʼlumki, “Oʻzboshimchalik bilan egallab olingan yer uchastkalariga hamda ularda qurilgan bino va inshootlarga boʻlgan huquqlarni eʼtirof etish toʻgʻrisida”gi Qonunga asosan uy-joylar va inshootlarni bosqichma-bosqich xatlovdan oʻtkazish boʻyicha mahallalar kesimida rejaviy jadval ishlab chiqilib, ushbu jadval asosida Kadastr agentligining hududiy boʻlimlari mutaxassislari tomonidan samarali ishlar amalga oshirilmoqda. Shuningdek, soha mutaxassislari fuqarolarning murojaatlari boʻyicha bevosita mahallalarga chiqqan holda sayyor qabullar oʻtkazish orqali ularning murojaatlarini oʻrganib, muammolarni joylarida hal etishayotgani aholining mushkulini oson, ogʻirini yengil qilish imkonini bermoqda.
Amudaryo tumanida Davlat Kadastrlari palatasi Qoraqalpogʻiston Respublikasi boshqarmasi boshligʻi Sardar Urinbayev rahbarligida aholining kadastr sohasidagi murojaatlarini oʻrganish va ularni qonuniy hal qilish maqsadida oʻtkazilgan sayyor qabulda ham tuman aholisini qiynab kelayotgan kadastr sohasiga oid bir qator muammolar koʻrib chiqildi.
Sayyor qabul jarayonida Sardar Urinbayev tadbir ishtirokchilariga koʻchmas mulk obʼektlariga boʻlgan huquqlarni davlat roʻyxatidan oʻtkazish boʻyicha ariza yuborish, bino va inshootlarga boʻlgan ashyoviy huquqlar ipotekasi toʻgʻrisidagi shartnomalarni davlat roʻyxatidan oʻtkazish, obʼektni qayta ixtisoslashtirish va reklama qilish uchun ruxsatnoma rasmiylashtirish, shuningdek, kadastr pasportini shakllantirish yuzasidan amaldagi qonunchilik hujjatlari hamda ularga rioya qilish qoidalari boʻyicha zarur tushuncha va maʼlumotlar berdi.
Shundan soʻng sayyor qabul davomida yuridik va jismoniy shaxslar tomonidan kelib tushgan 50 dan ortiq murojaatlar koʻrib chiqildi. Xususan fuqarolar tomonidan oʻzboshimchalik bilan egallab olingan yer uchastkalarida bunyod etilgan yashash xonadonlarini, qoʻshimcha bino va inshootlarni, yuridik shaxslar tomonidan oʻzboshimchalik bilan egallab olingan yer uchastkalari va ularda qurilgan, qurilayotgan turli toifalardagi bino va inshootlarni davlat roʻyxatidan oʻtkazish, obʼektni qayta ixtisoslashtirish, kadastr pasportini rasmiylashtirish bilan bogʻliq murojaatlar shaxsan murojaatchilar ishtirokida batafsil oʻrganilib, 30ga yaqin murojaat joyida ijobiy hal etildi. 20 tadan ortiq murojaat esa alohida nazoratga olinib, tegishlicha mutasaddi tashkilotlar masʼullariga topshiriqlar berildi.
Sayyor qabul jarayonida kadastr sohasiga doir qonunchilik hujjatlari, fuqarolarning koʻchmas mulk obʼektlariga boʻlgan huquqlarini qonuniy rasmiylashtirish, bu borada qonun buzilish holatlari sodir etilganida oʻz huquqlarini himoya qilish borasida ham masʼullar tomonidan kerakli maʼlumotlar, tushunchalar taqdim etildi. Shuningdek, fuqarolarni qiziqtirgan savollar yuzasidan soha masʼullari va mutaxassislari atroflicha tushunchalar berish orqali tadbir ishtirokchilarining bu boradagi huquqiy madaniyatini oshirishga hissa qoʻshdilar.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
