Amudaryo tuman ixtisoslashtirilgan maktabida "Kasbiy rivojlanish kuni" va "Kasbiy rivojlantirish soati" tadbirlari oʻtkazildi

Zamonaviy taʼlim tizimida pedagoglarning uzluksiz kasbiy rivojlanishi muhim ahamiyat kasb etadi. Oʻqituvchilarning malakasini oshirish, ularni innovatsion metodlar bilan tanishtirish va amaliy koʻnikmalarini rivojlantirish bugungi kunda ustuvor yoʻnalishlardan biridir. Shu maqsadda 2024-yil 21-iyun kuni davlat rahbari tomonidan qabul qilingan "Maktabgacha va maktab taʼlimi tashkilotlari xodimlarini uzluksiz kasbiy rivojlantirish tizimini takomillashtirish boʻyicha qoʻshimcha chora-tadbirlar toʻgʻrisida"gi Qarori va Maktabgacha va maktab taʼlimi vazirining tegishli buyrugʻi bilan Prezident, ijod va ixtisoslashtirilgan maktablar hamda umumiy oʻrta taʼlim muassasalari oʻqituvchilari uchun "Kasbiy rivojlanish kuni" va "Kasbiy rivojlantirish soati" tadbirlari muntazam oʻtkazib kelinmoqda.

Amudaryo tuman Ixtisoslashtirilgan maktabida ham ingliz tili oʻqituvchilari uchun "Kasbiy rivojlantirish soati" tashkil qilinib, tadbir doirasida maktabning 8-sinf oʻquvchilari uchun "Spending money" (Pul sarflash)  mavzusida tajriba-sinov darsi tashkil etildi.

Mashgʻulotlar ingliz tili fani mentor-oʻqituvchilari Mohira Shomurotova va Fariza Rajapovalar tomonidan oʻtkazildi. Dars jarayonida Bilim va malakalarni baholash agentligi Qoraqalpogʻiston Respublikasi boʻlimi boshligʻi Muzaffar Abdullayev, maktab maʼmuriyati va ingliz tili metodbirlashma raisi Shohzod Ismoilovlar ishtirok etishdi. Ochiq dars davomida innovatsion pedagogik yondashuvlar hamda interfaol metodlar qoʻllanildi.

Dars yakunida ishtirokchilar tomonidan fikr-mulohazalar bildirilib, ochiq darsning yutuqlari hamda takliflar muhokama qilindi. Muzaffar Abdullayev tomonidan darsning zamonaviy talab va standartlarga mosligi, qoʻllanilgan innovatsion metodlar mavzuni toʻliq ochib berganligi eʼtirof etildi.

Kunning ikkinchi qismida "Kasbiy rivojlanish kuni" doirasida Amudaryo tuman Ixtisoslashtirilgan maktabining oʻquv ishlari boʻyicha direktor oʻrinbosari, trener Ravshan Xalmuratov va mentor-oʻqituvchilar Mohira Shomurotova hamda Fariza Rajapovalar tomonidan umumtaʼlim maktablari ingliz tili fani oʻqituvchilari ishtirokida yuqoridagi mavzuda amaliy seminar-trening mashgʻulotlari oʻtkazildi. Ushbu mashgʻulotlarda umumtaʼlim maktablaridan 150 nafar ingliz tili fani oʻqituvchilari ishtirok etishdi.

Seminar-trening davomida zamonaviy pedagogik va innovatsion taʼlim texnologiyalaridan foydalanish, interfaol metodlar yordamida oʻquvchilarni faollikka chorlash hamda kreativ va tanqidiy fikrlashni rivojlantirish boʻyicha amaliy tajribalar oʻrganildi. Ochiq darsning har bir bosqichida qoʻllanilgan interfaol metodlar mavzu bilan uygʻunligi, oʻquvchilarning dars jarayoniga faol jalb qilingani hamda pedagoglarning innovatsion metod va texnologiyalarni oʻzlashtirish imkoniyatlari eʼtirof etildi. Shuningdek, mutaxassislar tomonidan seminar-treningda ishtirok etgan yosh pedagoglarning faoliyati tahlil qilinib, ularga tegishli tavsiyalar va maslahatlar berildi.

Tadbir yakunida ishtirokchilar zamonaviy pedagogik va innovatsion taʼlim texnologiyalarini oʻrganishga qaratilgan amaliy seminar-trening tashkil etilganidan mamnunliklarini bildirishdi. Bunday tadbirlarning muntazam tashkil etilishi oʻqituvchilarning kasbiy mahoratini oshirishga hamda taʼlim sifati yuksalishiga xizmat qilishi alohida taʼkidlandi.

Ravshan Xalmuratov,  Amudaryo tuman Ixtisoslashtirilgan maktabi direktorining oʻquv ishlari boʻyicha oʻrinbosari.