“Agro-dizel” nomli yangi savdo shoxobchasi oʻz faoliyatini boshladi

Qishloq xoʻjaligi mamlakat iqtisodiyotining eng muhim tarmoqlaridan biri hisoblanadi. Yerga urugʻ qadash, uni parvarish qilish va moʻl hosil yetishtirishda zamonaviy texnikalarning oʻrni beqiyos. Har bir mavsumda dehqon va fermer xoʻjaliklari uchun texnika vositalariga boʻlgan ehtiyoj ortadi. Ayniqsa, bahorgi ekin mavsumi yaqinlashar ekan, qishloq xoʻjaligi texnikalarini tayyor holga keltirish muhim vazifa hisoblanadi. Bunday sharoitda sohaga ixtisoslashgan savdo shoxobchalari dehqon va tadbirkorlar uchun katta imkoniyat yaratadi. Yaqinda shunday qulayliklardan biri – Amudaryo tumanining Yangiobod mahallasida “Agro-dizel” nomli yangi savdo shoxobchasi foydalanishga topshirildi.

Tadbirda “Nuroniy” jamgʻarmasining tuman boʻlimi raisi Bekman Allaberganov, mahalla faollari, “Yusuf Eshon bobo” jome masjidi imom-xatibi, tadbirkorlar va keng jamoatchilik vakillari ishtirok etishdi. Soʻzga chiqqanlar bu kabi loyihalarning ahamiyatini taʼkidlab, mamlakatimizda amalga oshirilayotgan islohotlar xalq farovonligini oshirishga xizmat qilishi eʼtirof etishdi.

Tantanali ochilish marosimidan soʻng nuroniylar ramziy tasmani kesib, savdo shoxobchasidagi sharoitlar bilan tanishdilar. Doʻkon zamonaviy jihozlangan boʻlib, mijozlarga qulaylik yaratish uchun barcha shart-sharoitlar bilan taxminlangan. Mahsulotlarning keng assortimenti, sifatli xizmat va qulay joylashuv doʻkonni hudud uchun muhim savdo nuqtasiga aylantiradi.

Mazkur loyiha tadbirkor Rahmatillo Yoqubovning oʻz mablagʻlari hisobidan bunyod etildi. Doʻkon 2 qavatdan iborat boʻlib, 1-qavatda savdo faoliyati olib boriladi, 2-qavat esa ofis sifatida xizmat qiladi. Savdo shoxobchasi faoliyati natijasida 6 nafar yosh ish bilan taʼminlandi.

Bugungi kunda qishloq xoʻjaligi sohasida texnika va ehtiyot qismlarining sifatli hamda kafolatli boʻlishi dehqon va fermer xoʻjaliklari uchun katta ahamiyatga ega. Xususan, ishlab chiqarish jarayonida texnika uzluksiz ishlashi hosildorlik va mehnat samaradorligiga bevosita taʼsir koʻrsatadi. Shu bois zamonaviy talablarga javob beradigan, ishonchli va uzoq muddat foydalanish imkoniyatiga ega ehtiyot qismlarini taklif qiladigan savdo shoxobchalarining koʻpayishi sohaning yanada rivojlanishiga xizmat qiladi.

Yangi “Agro-dizel” nomli savdo shoxobchasining faoliyati nafaqat tadbirkorlar va fermerlar, balki butun tumanning iqtisodiy rivojiga hissa qoʻshadi. Zamonaviy va talabgir mahsulotlar bilan taʼminlaydigan bunday maskanlar dehqonlar mehnatini yengillashtirib, texnika va qishloq xoʻjaligining rivojiga xizmat qiladi. Eng asosiysi, bu kabi tashabbuslar aholi turmush darajasini yaxshilab, yangi ish oʻrinlari yaratilishiga hissa qoʻshadi.

Qishloq xoʻjaligi – mamlakatimiz iqtisodiyotining tayanchi. Ushbu soha rivoji yoʻlidagi bunday tashabbuslar fermer va tadbirkorlar uchun yangi imkoniyatlar eshigini ochishi shubhasiz.

Shohzod Qurbonboyev