Oʻquvchi-yoshlar oʻrtasida kitobxonlik madaniyatini rivojlantirishga qaratilgan tashabbus

Bugungi kunda yoshlarning boʻsh vaqtlarini axborot texnologiyalari va turli media resurslarga sarflayotgani ularning kitobga boʻlgan qiziqishini oshirish boʻyicha yangicha yondashuvlarni talab etmoqda. Shu maqsadda Oʻzbekiston Yoshlar ishlari agentligi tomonidan “Mutolaa” loyihasi yoʻlga qoʻyilgan boʻlib, mazkur loyihadan yoshlar oʻrtasida kitobxonlik madaniyatini shakllantirish va intellektual rivojlanishni ragʻbatlantirish maqsad qilingan. Loyiha doirasida oʻzbek va jahon adabiyotining sara asarlari audio va elektron formatlarda keng ommaga taqdim etilmoqda. Shuningdek, kitobxonlikni ragʻbatlantirish maqsadida intellektual musobaqalar, tanlovlar va turli tadbirlar oʻtkazilmoqda.

Yaqinda Amudaryo tumanining Arna boʻyi mahallasi yoshlar yetakchisi Shahzod Nuratdinov tashabbusi bilan 27-sonli maktabda oʻquvchi-yoshlar oʻrtasida kitobxonlikni keng targʻib qilish va “Mutolaa” loyihasi imkoniyatlaridan samarali foydalanish maqsadida “Zakovat” intellektual oʻyini tashkil etildi.

Tadbirda maktab direktori Quvat Joʻrayev, tuman Yoshlar ishlari boʻlimi bosh mutaxassisi Davron Bozorboyev, Milliy gvardiya xodimi Islambek Yembergenovlar ishtirok etishdi. Tadbirga ona tili va adabiyot fani oʻqituvchilari Zaynab Matchanova va Zaynab Ibragimovalar boshlovchilik qilishdi.

Intellektual musobaqa maktabning yuqori sinf oʻquvchilaridan iborat 6 ta jamoa oʻrtasida oʻtkazildi. Bahs uchun savollar “Mutolaa” ilovasida mavjud boʻlgan badiiy durdonalar – Abdulhamid Choʻlponning “Kecha va kunduz”, Abdulla Qahhorning “Dahshat”, Oʻtkir Hoshimovning “Dunyoning ishlari”, Xudoyberdi Toʻxtaboyevning “Sariq devni minib” va Paulo Koeloning “Alkimyogar” asarlari asosida tuzildi.

Jamoalar ushbu asarlarning mazmuni, qahramonlari, gʻoyasi va tarixiy jihatlari boʻyicha bilimlarini sinovdan oʻtkazishdi. Bellashuv qizgʻin va bahsli tarzda oʻtdi, kitob mutolaasiga qiziquvchan yoshlar oʻz bilimlarini namoyon etishdi.

Mahalladagi yoshlar yetakchisi Shahzod Nuratdinov intellektual oʻyinlar yoshlarni kitob mutolaasiga undashda samarali vosita boʻlib, ularning bilim doirasini kengaytirish, tafakkurini yuksaltirish va oʻz ustida ishlashga ragʻbatlantirishda muhim oʻrin tutishini taʼkidladi. Shuningdek, u maktab kutubxonasi bilan hamkorlikda oʻquvchilarni muntazam kitob oʻqishga jalb qilish maqsadida bu kabi tashabbuslarni doimiy ravishda amalga oshirish niyatida ekanini bildirdi. Taʼkidlash joizki, intellektual musobaqa oʻquvchilarning maktab kutubxonasidan faolroq foydalanishiga va kitobxonlar safi ortishiga xizmat qildi.

20 raunddan iborat bellashuv natijalariga koʻra, 9-"B" sinf jamoasi 14 ta toʻgʻri javob bilan 1-oʻrin sohibi boʻldi. Faxrli oʻrinlarni egallagan jamoalar yoshlar yetakchisi tomonidan kitob jamlanmalari hamda pul mukofoti bilan taqdirlandi. Shuningdek, oʻquvchilarning tarixiy-madaniy bilimlarini boyitish maqsadida gʻolib va sovrindor jamoalar Xiva shahriga sayohat qilish imkoniga ega boʻlishdi.

Bunday loyihalar yoshlar oʻrtasida intellektual muhitni shakllantirib, ularni bilimga oshno etishga xizmat qiladi. “Mutolaa” loyihasi va “Zakovat” intellektual oʻyini yosh avlodning tafakkurini charxlab, mustaqil fikrlash qobiliyatini rivojlantirishga katta hissa qoʻshadi.

Shohzod Qurbonboyev.