Bayram arafasida fidoyi ayollarga ehtirom koʻrsatildi

Oila – jamiyatning asosiy tayanchi. Uning mustahkamligi, farzandlarning toʻgʻri tarbiyasi va hayot yoʻlidan adashmasligi koʻp jihatdan ayollarning matonati, sabr-toqati va mehnatiga bogʻliq. Har bir oilada oʻz hayotini umr yoʻldoshi va farzandlariga bagʻishlagan, ularga madadkor boʻlgan ayollar bor. Ayniqsa, harbiy xizmatchi yoki urush qatnashchisining turmush oʻrtogʻi boʻlish – alohida sabr, jasorat va fidoyilik talab etadi.

Shu bois, 8-mart – Xalqaro xotin-qizlar kuni munosabati bilan Oʻzbekiston jangchi-faxriy va nogironlari Birlashmasi tomonidan Afgʻon urushi qatnashchilarining oila aʼzolari taqdirlandi. Bu eʼtirof – ularning oilasi va jamiyatga qilgan beqiyos xizmatiga berilgan yuksak bahodir.

Afgʻon urushi qatnashchisi Maqsad Karimovning turmush oʻrtogʻi Dilbar Saidova umr yoʻldoshiga hamisha sadoqat va matonat bilan yelkadosh boʻlib kelgan. Oilaning mustahkamligi va farzandlarning toʻgʻri tarbiyasi bevosita ona mashaqqati va fidoyiligi bilan bogʻliq. Shuning uchun uning “Vafo va sadoqati uchun” koʻkrak nishoni bilan taqdirlanishi – nafaqat turmush oʻrtogʻiga, balki oilaga va jamiyatga boʻlgan cheksiz fidokorligining eʼtirofidir.

1982-yilda Maqsad Karimov bilan oila qurgan Dilbar Saidova rus tili filologiyasi boʻyicha tahsil olgan va koʻp yillar davomida 7-sonli maktabda yoshlarga bilim berdi. Oilasi uchun mustahkam tayanch boʻlish bilan birga, ilm-maʼrifat yoʻlida ham xizmat qildi. Bugun fidoyi ona 4 nafar farzandni vatanparvar va foydali insonlar qilib voyaga yetkazgan, 10 nafar nabiraning mehribon buvisidir.

Maqsad Karimovning kelini, 32-sonli maktab oʻqituvchisi Nazokat Qodirova esa “Yoshlarni harbiy vatanparvarlik ruhida tarbiyalash uchun” medali bilan taqdirlandi. U 2009-yildan buyon ona tili va adabiyot fani oʻqituvchisi sifatida yosh avlodga taʼlim-tarbiya berib kelmoqda.

Bunday fidoyi ayollarning eʼtirof etilishi – jamiyatda oilaning oʻrni va ahamiyatiga berilgan yuksak bahodir. Ular nafaqat oila mustahkamligini taʼminlaydi, balki yosh avlod tarbiyasi, maʼrifat taraqqiyoti va milliy qadriyatlarning avloddan-avlodga oʻtishiga beqiyos hissa qoʻshadi. Ana shunday ayollarning mehnati va sadoqati munosib qadrlangan jamiyat esa mustahkam poydevorga ega boʻladi.

Shohzod Qurbonboyev.