36-sonli maktabda Xalqaro xotin-qizlar kuni munosabati bilan bayram tadbiri oʻtkazildi

Taʼlim jarayonida oʻquvchilarning ustozlaridan olayotgan nazariy bilimlari bilan bir qatorda maktablarda oʻtkazilayotgan turli xil maʼnaviy-maʼrifiy tadbirlarning ham oʻrni alohida. Sababi, oʻquv darsliklaridagi murakkab mavzular, ularni oʻz vaqtida oʻzlashtirish, har kungi uy vazifalari oʻquvchilarni biroz charchatib, maʼnaviy hordiq olishga ehtiyoj uygʻotadi. Maʼlum sana yoki bayramlar munosabati bilan oʻtkaziladigan tadbirlar, undagi badiiy chiqishlar esa, oʻquvchilarga bayramona kayfiyat ulashibgina qolmasdan, yoshlarning jamoat ishlaridagi faolligini oshiradi, maktabning maʼnaviy-maʼrifiy hayotiga daxldorlik tuygʻusini uygʻotadi.

Bahor fasli esa ana shunday goʻzal tadbirlarni tashkillashtirish, milliyligimizni, urf-odatlarimizni keng targʻib qilish va bu jarayonga oʻquvchi yoshlarni keng jalb qilishda ayni muddaodir. Mart oyining ilk kunlarida Xalqaro xotin-qizlar bayrami yurtimiz boʻylab keng nishonlanadi. Sana munosabati bilan hududlardagi barcha taʼlim maskanlarida, muassasa va tashkilotlarda turli xil badiiy kechalar, tadbirlar, “Balli qizlar” singari koʻrik-tanlovlar oʻtkaziladi.

Yaqinda Amudaryo tumanidagi 36-sonli maktabda ham ayollar bayrami koʻtarinki ruhda nishonlandi. Bayram munosabati bilan tashkil qilingan tadbir avvalida maktabning ingliz tili fani oʻqituvchilari ishtirokida “Kasbiy rivojlanish kuni” doirasida yigʻilish oʻtkazildi. Unda mazkur fan oʻqituvchilarining dars oʻtish mahorati tahlil qilinib, kasbdoshlar dars oʻtishning yangi metodlari boʻyicha oʻzaro tajriba almashdilar.

Soʻngra, “Qizlarjonlar” bellashuviga navbat berildi. Mazkur tadbir maktabning 9-“A” va 9-“B” sinflari rahbarlari Dilnura Babaniyozova hamda Mevagul Qayipnazarovalar tomonidan tashkil qilindi.

Tadbirni maktab direktorining maʼnaviy-maʼrifiy ishlar boʻyicha oʻrinbosari Sarvar Qutlimuratov kirish soʻzi bilan ochib berdi hamda barchani xotin-qizlar bayrami, bahor bayrami bilan qizgʻin muborakbod etdi.

Shundan soʻng 9-“A” sinfning “Boychechak” guruhi va 9-“B” sinf qizlaridan tarkib topgan “Bahor” guruhi bir qator shartlar boʻyicha bellashish uchun davraga taklif etildi. Har bir guruhda olti nafar qizdan, jami 12 nafar qiz mahorat, epchillik, pazandalik boʻyicha kuch sinashdilar.

Birinchi shart “Tanishtiruv” sharti boʻlib, unda qizlar oʻzlarini tanishtirib oʻtdilar. Ikkinchi – “Salat tayyorlash” shartida qizlar oʻzlarining pazandachiligini namoyon qilib, turli xildagi bahoriy salatlar tayyorladilar. Uchinchi shartda oʻquvchi qizlarning stilist sifatida oʻz mahoratlarini namoyish qilishdi. Yaʼni, shart davomida qizlarning goʻzallik yaratib, soch turmaklashiga baho berildi. Toʻrtinchi va beshinchi shartlarda ham qizlarning pazandalik qobiliyati, epchilligi sinovdan oʻtkazildi. Bunda ular dastlab chuchvara tugishdagi ustaligini namoyon qilishgan boʻlsa, keyin xamirdan unoshi qirqish boʻyicha mahoratlarini sinovdan oʻtkazdilar. Tadbir soʻngida qizlarning mehnati, harakati odilona baholandi va durang natija qayd etildi.

Shu bilan birga, maktabning 6-“A”, 7-“A” sinf qizlari tadbirga oʻzgacha kayfiyat olib kirib, bayramona raqsga tushdilar. 4-“B” sinf qizlari esa ona haqidagi yod olgan sheʼrlarini aytib berdilar. Tadbir davomida faol ishtirok etgan qizlarga bayram sovgʻalari topshirildi.

Shu kuni maktabga DXX chegara qoʻshinlariga qarashli harbiy qism xodimlari ham tashrif buyurib, maktabning “Yosh chegarachi” klubi aʼzolari bilan uchrashuv oʻtkazdi. Jarayon davomida maktab direktori Oʻktam Bidashevga DXX chegara qoʻshinlariga qarashli harbiy qism nomidan tashakkurnoma topshirilib, oʻzaro hamkorlikda olib borilayotgan ishlar eʼtirof etildi.

Shuningdek, DXX chegara qoʻshinlari qism komandirining tarbiyaviy va mafkuraviy ishlari boʻyicha oʻrinbosari Mirjahon Majidov ishtirokida maktabning “Yosh chegarachilar” klubi aʼzolari bilan koʻrgazmali mashgʻulotlar ham oʻtkazildi.

Aziza Madrahimova