Tuman Prokuraturasi tomonidan Tibbiyot birlashmasi faoliyati oʻrganildi

Mamlakatimizda aholi salomatligi, onalik va bolalikni muhofaza qilish, maʼnan yetuk, jismonan sogʻlom yosh avlodni voyaga yetkazish alohida eʼtibordagi, davlat siyosati darajasidagi masala hisoblanadi. Ayniqsa, aholining barcha qatlamlari, onalar va bolalar sogʻligini muhofaza etishga, xalqimizning oʻrtacha umr koʻrish davomiyligini oshirish, sogʻlom bolalar tugʻilishi masalalariga ustuvor ahamiyat berilmoqda.

Amudaryo tumanida ham tibbiyot tizimida xizmatlar sifati va qulayligini yaxshilash, aholiga tibbiy xizmat koʻrsatishni jahon andozalari darajasiga koʻtarish, sohada joriy etilayotgan islohotlarni amaliyotga tatbiq etish orqali onalar va bolalar salomatligini mustahkamlash, aholi oʻrtasida sogʻlom turmush tarzini ommalashtirish borasida davlatimiz tomonidan belgilab berilgan vazifalar izchil amalga oshirilmoqda.

Yaqinda Amudaryo tuman prokuraturasi tomonidan tuman Tibbiyot birlashmasi va birlashma tasarrufidagi tibbiy muassasalarda aholiga namunali tibbiy xizmat koʻrsatish borasidagi ishlar oʻrganilib, tahlil qilindi.

Bugungi kunda aholi salomatligini mustahkamlash yoʻlida Amudaryo tuman Tibbiyot birlashmasi tarkibida 415-oʻrinli Markaziy shifoxona, 36-oʻrinli xoʻjalik hisobidagi reabilitatsiya boʻlimi, jami 1455 qatnov-quvvatga ega boʻlgan 14 ta ambulatoriya-poliklinika muassasalari, Koʻp tarmoqli markaziy poliklinika, 9 ta oilaviy poliklinikalar hamda 4 ta oilaviy shifokorlik punkti orqali tibbiy xizmatlar koʻrsatilmoqda. Shuningdek, 11 ta mahallada tibbiyot punktlari faoliyat koʻrsatadi. Ushbu tibbiyot muassasalarida jami 800 nafardan ortiq salomatlik posbonlari xizmat koʻrsatib kelishmoqda.

2024-yil davomida tugʻish yoshidagi ayol-qizlardan 53 ming 241 nafari tibbiy koʻrikdan oʻtkazilib, ulardan 3 ming 910 nafarida ekstragenital kasalliklar aniqlandi va ularni sogʻlomlashtirish choralari koʻrildi.

Tibbiyot birlashmasining moddiy-texnik bazasini yaxshilashga qaratilgan eʼtibor tufayli 2024-yilda 14,4 mlrd soʻmlik keng miqyosli qurilish-taʼmirlash ishlari olib borilib, 4 qavatli, 90-oʻringa moʻljallangan zamonaviy tugʻruq majmuasi foydalanishga topshirildi va mazkur majmua 10ta zamonaviy tibbiy anjomlar bilan taʼminlandi. Birlashma tasarrufidagi 6-sonli oilaviy poliklinika binosi mukammal taʼmirlanib, tomiga quvvati 10 kVt boʻlgan quyosh paneli oʻrnatildi va zarur ichki jihozlar bilan jihozlandi. Shuningdek, investitsiya dasturi doirasida Kuyuk koʻpir ovulidagi 5-sonli oilaviy poliklinika binosi 3 mlrd 251 million soʻm mablagʻ hisobiga yangidan qurildi.

Tumanning olis hududlaridagi aholiga namunali tibbiy xizmat koʻrsatishni yaxshilash maqsadida Tibbiyot birlashmasi tasarrufidagi barcha oilaviy poliklinikalar, oilaviy shifokorlik va tibbiyot punktlarining moddiy-texnik holatini yaxshilash, shifokorlar, umumiy amaliyot shifokorlari, tibbiy hamshiralar hamda tibbiy birodarlar, patronaj xizmati shifokorlari va hamshiralarining malakalarini oshirish masalasiga ham alohida eʼtibor qaratilmoqda.

Oʻrganishlar davomida Tibbiyot birlashmasi faoliyatida erishilayotgan yutuqlar bilan birga ayrim kamchiliklar ham mavjudligi qayd qilindi. Xususan, aholi murojaatlari bilan ishlash, nogironligi boʻlgan fuqarolarni alohida tizimga olish orqali ularning shart-sharoitlari yanada yaxshiroq tibbiy muassasalarda davolanishlari uchun imkoniyatlar yaratish, OIV (Odamning immunitet tanqisligi virusi)ga chalingan bemorlarni alohida reabilitatsiya qilish, bolalarda silga qarshi emlash ishlarini tashkil etish borasida baʼzi kamchiliklar mavjudligi aytib oʻtildi.

Ayniqsa, aholi murojaatlari bilan ishlash, shifoxona ichi infektsiyasiga qarshi profilaktik chora-tadbirlarni amalga oshirish, shuningdek, tibbiyot xodimlarining soha vazirliklari tomonidan amaliyotga joriy etilishi koʻzda tutilgan buyruqlar va ulardan kelib chiqadigan vazifalar yuzasidan bilimlarini oshirib borish boʻyicha sustkashlikka yoʻl qoʻyilgani, bir necha holatda xodimlarga mehnat taʼtili berish boʻyicha mehnat qonunchiligi talablariga rioya etilmagani tanqid qilindi.

Ishonamizki, “Yutuq ham, kamchilik ham – oʻzimizniki, uni bartaraf etish – burchimiz” tamoyili asosida ish yuritishga odatlangan Amudaryo tuman Tibbiyot birlashmasi mehnat jamoasi, oʻzlarining hamjihatliklari bilan yuqorida qayd etilgan kamchiliklarni bartaraf etish boʻyicha yakdil harakat qiladilar va aholi salomatligini muhofaza qilishda katta muvaffaqiyatlarga erishadilar. Chunki hamjihatlik bilan qilingan har qanday saʼy-harakat nafaqat mehnat jamoasi, balki xalqimiz uchun ham manfaatlidir.