27-sonli davlat maktabgacha taʼlim tashkilotida Navroʻz bayrami keng nishonlandi
Aslida taqvimlarda qizil doiracha bilan belgilanib turadigan har bir bayramning oʻziga xos tomonlari, fayz-u, tarovati bor. Biroq, qadimiy bayramlarimizdan biri hisoblangan Navroʻzi olam tabiatga uygʻonish, dehqonlarning ishiga ishtiyoq va baraka, borliqqa yangilanish olib kirgani uchun barchamizga birdek qadrli. Yosh-u, qari fevral oʻtar-oʻtmasdanoq bahorni, Navroʻzni kuta boshlaydi, sogʻinib entikadi…
Navroʻzi olam yaqinlashishi bilan milliy atlas va adras koʻylaklar kiygan qiz-kelinchaklar bayramga taraddud koʻrib, hovlilarga, koʻcha yuzlariga suvlar sepishib, ariq boʻylariga yalpiz va rayhonlar ekishadi. Mahalla ahlini doshqozon atrofida jamlagan sumalak sayllari bayram shodiyonalariga ulanib ketadi.
Manbalarga koʻra, ulugʻ alloma Abu Rayhon Beruniy “Qadimiy xalqlardan qolgan yodgorliklar” kitobida Quyosh yili hisobida yilning dastlabki oyi toʻgʻrisida soʻzlab: “Bu oyning birinchi kuni – Navroʻzdir”, deya taʼkidlagan. Ha, Navroʻz azaldan xolis niyatli kishilarning sevimli ayyomi boʻlib kelgan. Ushbu bayram kunlarida urush-janjallar ham toʻxtagan, gina-kuduratlar kechirib yuborilgan. Shohlar el ichidan eng munosib kishilarni taqdirlagan, ayrim mahbuslarning gunohidan oʻtilgan.
Yaqinda Amudaryo tumanining Qilichboy ovulida joylashgan 27-sonli davlat maktabgacha taʼlim tashkilotida ham “Assalom, Navroʻz!” nomli bayram tadbiri boʻlib oʻtdi.
Qilichboy Madaniyat markazi binosida boʻlib oʻtgan tadbirida tashkilot tarbiyalanuvchilari, tarbiyalanuvchilarning ota-onalari, tashkilot xodimlari hamda ovuldagi faxriy onaxonlar Roʻzibika Asqarova, Qurbonoy Jumamurodova, Bibijon Tajibayeva, Zulayho Eshimova, Tatyana Rahimova, Amina Yusupovalar qatnashdilar.
Tadbirni tashkilot rahbari Muhabbat Raximova ochib berdi va barchani bahor bayrami bilan muborakbod etdi. Shundan soʻng, mahallaning faol onaxonlaridan Amina Yusupova, Roʻzibika Asqarova, Oqiljon Yoʻldoshevalar soʻzga chiqib, davradoshlarga bayram tabriklarini yoʻlladilar.
Bayram tadbiri kichkintoylarning va tarbiyachilarning bir-biridan qiziqarli chiqishlari bilan davom etdi. Xususan, katta guruhlar tarbiyalanuvchi qizlari “Bahor valsi”ga raqsga tushgan boʻlsa, oʻgʻil bolalar “Andijon polkasi”ga oʻynab, oʻz mahoratlarini namoyon qildilar. Oʻrta guruh tarbiyalanuvchilari esa “Tulpor” qoʻshigʻi raqs ijro qilishdi. Ayniqsa, katta guruh tarbiyalanuvchilarining “Lazgi” kuyiga tushgan raqsi hamda Navroʻz haqidagi kuy-qoʻshiqlari yigʻilganlarga bayramona kayfiyat ulashdi. Bayram kechasi bogʻcha tarbiyachilarining “Boychechak” qoʻshigʻi va xodimlar tomonidan ijro etilgan sahna koʻrinishi bilan davom etdi.
Ha, bayram munosabati bilan tashkil qilinadigan bu kabi tadbirlar nafaqat bolajonlarning qobiliyatlarini shakllantiradi, balki tashkilot xodimlarining ham faolligini oshirib, jamoaga ahillik, tadbir mehmonlariga koʻtarinki kayfiyat baxsh etadi.
Shu oʻrinda, ushbu bayram kechasini tashkil qilishda va oʻtkazishda oʻz hissalarini qoʻshgan tajribali tarbiyachilardan Dilorom Oʻrazmetova, Dilbar Haitova, Oygul Ortiqova, Sohiba Rahimova, Dilrabo Bazarbayeva, Zebo Tilavova, Shoira Oʻrazbayeva, Shahlo Jumamurodova, Gulzebo Qilichbekova, Gulmira Qosimova, musiqa rahbari Ozod Raximov, yordamchi tarbiyachilar Qutlibika Ataboyeva, Saida Safarbayeva, Mohinur Bobojonova, Zulfiya Sobirovalarning mehnatini eʼtirof etish joiz.
Bayram kechasi milliyligimizni, azaliy urf-odatlarimizni targʻib qilgani va jajji avlodlar qalbida Navroʻz bayrami haqidagi dastlabki tasavvurlarni uygʻotgani bilan ahamiyatli boʻldi.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
