21-apreldan 27-aprelga qadar “Kitobxonlik haftaligi” oʻtkazilmoqda

Yurtimizda kitobga boʻlgan eʼtibor, kitobxonlik madaniyatini rivojlantirish va ommalashtirishga qaratilgan keng koʻlamli ishlar izchillik bilan amalga oshirilmoqda. Xususan, 2021-yildan buyon har yili aprel oyida oʻtkazib kelinayotgan “Kitobxonlik haftaligi” mutolaaga oshno millionlab yurtdoshlarimizni bir maqsad atrofida jipslashtirib, ularning maʼnaviy dunyoqarashini yuksaltirishga xizmat qilmoqda.

Joriy yilda “Oʻzbekiston – kitobxonlar yurti” shiori ostidagi V Respublika “Kitobxonlik haftaligi” 21-apreldan 27-aprelga qadar mamlakatimizning barcha hududlarida oʻtkaziladi. Bu yilgi haftalik tadbirlari yanada keng qamrovli va mazmun jihatdan boy tarzda tashkil etilmoqda.

21-aprel kuni Amudaryo tuman Axborot-kutubxona markazida maʼrifiy haftalikning tantanali ochilish marosimi boʻlib oʻtdi. Tadbir tuman Madaniyat boʻlimi, amudaryolik ijodkorlar, Koʻzi ojizlar maxsus kutubxonasi, “Barkamol avlod” bolalar markazi, 9-sonli Bolalar musiqa va sanʼat maktabi hamda 3-sonli umumtaʼlim maktabi hamkorligida oʻtkazildi.

Tadbirni tuman Madaniyat boʻlimi xodimi, “Vatan fidoyisi” koʻkrak nishoni sohibi Oybekjon Begimov kirish soʻzi bilan ochib berdi va kitob insonning eng sodiq hamrohi ekanligi, uning hayotdagi oʻrni beqiyosligi, kitob orqali kelajakka parvoz qilish mumkinligini alohida taʼkidladi. Shu bilan birga, kitob tarbiya vositasi sifatida beqiyos ahamiyatga egaligi qayd etildi.

Tadbirda soʻzga chiqqanlar tomonidan kitob inson maʼnaviyatining koʻzgusi ekanligi, uning tafakkur va dunyoqarashni boyitishdagi oʻrni haqida fikrlar bildirildi. Maʼruzachilar yoshlarni kitob bilan doʻstlashishga, maʼnaviy yetuklik sari intilishga chorladilar.

Maʼlumot oʻrnida taʼkidlash joizki, Oʻzbekiston Respublikasi Vazirlar Mahkamasining 2020-yil 14-dekabrda qabul qilingan “2020–2025-yillarda kitobxonlik madaniyatini rivojlantirish va qoʻllab-quvvatlash milliy dasturi” doirasida ana shunday haftaliklar muntazam oʻtkazib kelinmoqda. Bu esa aholi, ayniqsa, yoshlar oʻrtasida kitobga boʻlgan qiziqishni oshirish, maʼnaviy-intellektual salohiyatni yuksaltirishga xizmat qilmoqda.

“Kitobxonlik haftaligi” doirasida mamlakatimiz boʻylab 1000 dan ortiq maʼnaviy-maʼrifiy tadbirlar, jumladan, Toshkent shahridagi “Dream Park” istirohat bogʻida, Qoraqalpogʻiston Respublikasi va viloyatlar markazlaridagi madaniyat va istirohat bogʻlarida “Noshirdan kitobxonga” tamoyili asosida kitob yarmarkalari tashkil etilishi koʻzda tutilgan.

Tadbir doirasida yangi adabiyotlar koʻrgazmasi tashkil etilib, Shahnoza Ollaberganova va Intizor Yoʻldoshevalar tomonidan ishtirokchilarga yangiliklar boʻyicha batafsil maʼlumotlar berildi. Shuningdek, Tazaxan Qidirniyazova va Shohida Ollaberganova kutubxonaga esdalik sifatida kitoblar sovgʻa qildilar.

Faol kitobxonlar, 3-sonli va 55-sonli umumtaʼlim maktablari oʻquvchilari, 9-sonli Bolalar musiqa va sanʼat maktabi hamda “Barkamol avlod” markazi oʻquvchilarining badiiy chiqishlari tadbirga koʻtarinki kayfiyat bagʻishladi. Isteʼdodli yoshlar tomonidan xalq qoʻshiqlari ijro etildi, taniqli shoirlar sheʼrlari ifodali oʻqildi.

Tadbir yakunida Axborot-kutubxona markazi xodimi Maqsuda Bekasheva haftalik davomida oʻtkaziladigan tadbirlar haqida ishtirokchilarga maʼlumot berib, kitobxonlarni faol ishtirok etishga chorladi.

Ayniqsa, soʻnggi yillarda kitob mahsulotlarini nashr etish va tarqatish tizimini takomillashtirish, oʻzbek va jahon adabiyotining sara namunalarini internet tarmoqlarida joylashtirish, ularni keng ommaga yetkazish boʻyicha amalga oshirilayotgan ishlar koʻlami kengayayotgani alohida taʼkidlandi.

Haftalik doirasida yoshlar oʻrtasida viktorinalar, sheʼriyat kechalari, mahalliy yozuvchi va shoirlar bilan ijodiy uchrashuvlar tashkil etiladi. Ushbu tashabbuslar orqali “Kitobxonlik haftaligi”ning har bir xonadonga kirib borishiga erishish, kitobni aholi va yoshlar hayotining ajralmas qismiga aylantirish maqsad qilingan.

Rohatoy Romanova, tuman Axborot-kutubxona markazi bibliografiya xizmati rahbari.