“Salomatlik uchun 5000 qadam” aktsiyasi va yugurish marafoni boʻlib oʻtdi

Sogʻlom turmush tarzini keng targʻib etish, aholi oʻrtasida jismoniy faollikni oshirish hamda ommaviy sportni rivojlantirish borasida soʻnggi yillarda mamlakatimizda keng qamrovli islohotlar amalga oshirilmoqda. Xususan, Oʻzbekiston Respublikasi Prezidentining 2021-yil 5-noyabrdagi “Yurish, yugurish, minifutbol, badminton, stritbol va vorkaut sport turlarini rivojlantirish chora-tadbirlari toʻgʻrisida”gi Qarori ijrosini taʼminlash maqsadida yurtimiz boʻylab turli sport tadbirlari tashkil etilmoqda.

Bu kabi tashabbuslar aholining barcha qatlamlarini qamrab olgan holda jismoniy faollikni ragʻbatlantirish, sogʻlom hayot tarzini keng joriy etishga xizmat qilmoqda. Mazkur qaror ijrosi doirasida respublikamizning barcha hududlarida ommaviy sport tadbirlari muntazam ravishda oʻtkazib kelinmoqda.

Jumladan, 7-may kuni Amudaryo tumanida Xotira va qadrlash kuni munosabati bilan aholi salomatligini mustahkamlashga qaratilgan “Salomatlik uchun 5000 qadam” aktsiyasi va yugurish marafoni boʻlib oʻtdi. “Salomatlik uchun 5000 qadam” aktsiyasi tumanning Doʻstlik mahallasida joylashgan Bolalar va oʻsmirlar sport maktabining markaziy oʻyingohida oʻtkazildi. Unda nuroniylar, jamoatchilik vakillari, turli sohalarda faoliyat yuritayotgan xodimlar, yoshlar hamda sportchilar faol ishtirok etdilar.

Shu kuni ertalabki badantarbiya mashgʻulotlari ham tashkil etildi. Ushbu tadbirlar orqali jismoniy faollikni oshirish, aholini har kunlik faol hayot tarziga chorlash, sogʻlom turmush tarzini hayot mezoni sifatida joriy etish maqsad qilingan.

Shuningdek, Xotira va qadrlash kuni munosabati bilan “Vatan ravnaqi, tinchligi va himoyasi yoʻlidagi qahramonlik unutilmaydi” shiori ostida 3 km masofaga yugurish marafoni ham tashkil etildi. Vatan himoyasi yoʻlida jon fido qilgan mard oʻgʻlonlar xotirasiga bagʻishlangan ushbu tadbir sport orqali yurtga muhabbat va qadriyatlarini ulugʻlash bilan birga, aholi oʻrtasida sogʻlom raqobat va hamjihatlik ruhini kuchaytirishga xizmat qildi.

Marafonning start nuqtasi Doʻstlik mahallasi va Oʻrta qalʼa ovulini bogʻlovchi chorrahada belgilangan boʻlib, finish chizigʻi tuman hokimligi binosi oldida joylashtirildi. Musobaqa yuqori tashkilotchilik darajasida oʻtkazildi. Unda 210 nafar ishtirokchi, jumladan 70 nafar ayol-qiz sportchilar qatnashdi. Musobaqa davomida ishtirokchilar oʻrtasida sogʻlom raqobat muhiti yaratildi.

Erkaklar oʻrtasida boʻlib oʻtgan marafon musobaqalari yakuniga koʻra, Xolimbeg ovulidan kelgan Alibek Oʻrazmetov 1-oʻrinni egallab, oʻz mahallasining ishonchini oqladi. 2-oʻrinni Alibekning hamqishlogʻi, xolimbeglik Javohir Tohirboyev egallagan boʻlsa, Toʻlqin ovulidan Renat Gʻaipov 3-oʻrin sohibi boʻldi.

Ayollar oʻrtasidagi bellashuvlar ham jonli ruhda, oʻzaro hurmat va raqobat muhitida kechdi. Unda Mangʻit shahrining Oybek mahallasidan Dinora Ozodova barcha raqiblarini ortda qoldirib, faxrli birinchilikni qoʻlga kiritdi. 2-oʻrin Xolimbeg ovuli vakili Dinora Matyakubovaga nasib etdi, 3-pogʻonani esa Kuyuk koʻpir ovulidan Gulbonu Oʻrinboyeva egalladi.

Tadbir yakunida barcha gʻoliblar va faol ishtirokchilar tuman hokimligi va mutasaddi tashkilotlar tomonidan esdalik sovgʻalari hamda diplomlar bilan taqdirlandi.

Mazkur tadbirlar aholi, ayniqsa yoshlar oʻrtasida sogʻlom turmush tarzi, sport va jismoniy faollikning hayotiy ahamiyatini targʻib etishda muhim ahamiyat kasb etmoqda. Bunday loyihalar orqali sport madaniyatini shakllantirish, milliy va jahon miqyosida raqobatbardosh sportchilarni tayyorlash uchun mustahkam zamin yaratiladi.

Yugurish faqat masofani bosib oʻtish emas, balki iroda, barqarorlik, birdamlik va sogʻlom hayot sari tashlangan qatʼiy qadamdir. Shu bois, bunday ommaviy tadbirlarning kelgusida ham davom ettirilishi — sogʻlom jamiyat barpo etish yoʻlidagi muhim qadamdir.

Shohzod Qurbonboyev.