Yoshlarni kasbga yoʻnaltirish maqsadida tadbirlar tashkil etildi

Joriy oʻquv yilining yakunlanishi arafasida Amudaryo muhandislik texnologiyalari texnikumida aholini ish bilan taʼminlash, yoshlarni kasbga yoʻnaltirish, taʼlim va mehnat bozori oʻrtasida samarali hamkorlikni taʼminlash maqsadida qator muhim tadbirlar tashkil etildi. “Ochiq eshiklar kuni” tadbiri hamda tuman Kambagʻallikni qisqartirish va bandlikka koʻmaklashish boʻlimi hamkorligida oʻtkazilgan “Karera kuni” hamda boʻsh ish oʻrinlari mehnat yarmarkasi shular jumlasidandir.

Tadbirda Bosh prokuratura huzuridagi Majburiy ijro byurosi Amudaryo tuman boʻlimi davlat ijrochisi, 3-darajali yurist Quanish Qurbanaliyev, tuman Maktabgacha va maktab taʼlimi boʻlimi boshligʻi Yalgʻash Shomurodov, tuman Kambagʻallikni qisqartirish va bandlikka koʻmaklashish boʻlimi boshligʻi Maʼmurjon Temirboyev, texnikum direktori Shuxrat Matirzayev, Amudaryo tumani IIB huzuridagi Probatsiya boʻlimi boshligʻi Ruslan Iskandarov hamda boshqa hamkor tashkilotlar va tijorat banklari vakillari faol ishtirok etdi.

Mehnat yarmarkasida tumandagi 34 ta korxona va tashkilot 176 ta boʻsh ish oʻrni bilan qatnashdi. Unda 148 nafar fuqaro, jumladan, ishsizlar, probatsiya hisobiga olinganlar, aliment toʻlovchilar, nogironligi boʻlgan shaxslar, maktab va texnikum bitiruvchilari ishtirok etdi. Yarmarka yakunida 21 nafar fuqaro doimiy ishga joylashtirildi, shundan 2 nafari probatsiya hisobidagilardir. Shuningdek, 7 nafar ishsiz fuqaro kasb-hunarga oʻqishga yoʻnaltirildi.

“Ochiq eshiklar kuni” tadbiri doirasida 9–11-sinf bitiruvchilari va ularning ota-onalari texnikumdagi taʼlim yoʻnalishlari, amaliy ustaxonalar, taʼlim jarayoni va yaratilgan sharoitlar bilan yaqindan tanishish imkoniga ega boʻldilar. Shuningdek, ularga maxsus bukletlar tarqatildi.

Ayni paytda texnikum 936-oʻringa moʻljallangan boʻlib, 100-oʻrinli yotoqxona va 100-oʻrinli oshxona faoliyat koʻrsatmoqda. Hozirda 1-kursda 4 ta, 2-kursda esa 10 ta yoʻnalish boʻyicha jami 448 nafar oʻquvchi kunduzgi, sirtqi va dual taʼlim shakllarida tahsil olmoqda. Ularning 156 nafari davlat granti, 292 nafari esa toʻlov-shartnoma asosida taʼlim olmoqda.

Taʼlim muassasasida 7 nafar rahbar xodim, 6 nafar umumtaʼlim va 26 nafar maxsus fan oʻqituvchilari, 4 nafar ishlab chiqarish taʼlimi ustalari hamda 22 nafar texnik xodim faoliyat olib bormoqda. Oʻquvchilarning nazariy bilimlarini amaliy koʻnikmalar bilan boyitish maqsadida 12 ta mutaxassislikka mos zamonaviy oʻquv xonalari va laboratoriyalar tashkil etilgan.

Jumladan, avtomobil tuzilishi, yoʻl harakati qoidalari, avtotrenajyor, agronomiya, veterinariya, elektr va gaz payvandlash, chilangarlik, elektromontaj, tikuvchilik, traktor tuzilishi, qishloq xoʻjalik mashinalari va kompyuter xonalari zamonaviy uskunalar bilan jihozlangan. Shu bilan birga, oʻquvchilarning boʻsh vaqtlarini mazmunli oʻtkazishlari uchun 8 ta kasbiy, 6 ta sport va 5 ta fan toʻgaraklari muntazam faoliyat yuritmoqda.

Texnikum taʼlim mazmunini takomillashtirish maqsadida qator oliy taʼlim muassasalari bilan hamkorlik yoʻlga qoʻygan. Qoraqalpoq davlat universiteti, Qoraqalpogʻiston qishloq xoʻjaligi va agrotexnologiya instituti hamda Samarqand davlat veterinariya meditsinasi universiteti Nukus filiali bilan tuzilgan shartnomalar asosida professor-oʻqituvchilar tomonidan mahorat darslari oʻtkazilib, metodik yordamlar koʻrsatilmoqda.

Amudaryo muhandislik-texnologiyalar texnikumida taʼlimni ishlab chiqarish bilan uzviy bogʻlash, bitiruvchilarni ish bilan taʼminlash, oʻrta boʻgʻin mutaxassislariga boʻlgan ehtiyojni oʻrganish ishlari tizimli amalga oshirilmoqda. Bu borada tuman hokimligi va Kambagʻallikni qisqartirish va bandlikka koʻmaklashish boʻlimi bilan hamkorlikda 10 ta yirik tashkilot va korxonalar bilan shartnomalar imzolangan. Ular qatorida Amudaryo tuman elektr tarmoqlari korxonasi, qishloq xoʻjaligi boʻlimi, tabiatni muhofaza qilish qoʻmitasi, tuman Fermerlari kengashi, moliya boʻlimi va “Tamara TEXTIL” MChJ kabi tashkilotlar bor.

2025–2026 oʻquv yili uchun texnikumda oʻquvchilarni qabul qilish boʻyicha aniq yoʻnalishlar va qabul rejalari tasdiqlangan. Qabul kunduzgi, sirtqi va dual taʼlim shakllarida amalga oshiriladi.

9-sinf bitiruvchilari uchun 11 ta yoʻnalish boʻyicha 450 ta oʻrin ajratilgan. Ular qatorida agrobiznes va marketing, ekologiya, grafika va dizayn, dasturiy taʼminot sozlovchisi, elektromontyor, avtomobil taʼmiri, tikuvchilik, agrokimyo va oshpazlik kabi kasblar va yoʻnalishlar bor.

11-sinf bitiruvchilari uchun esa kunduzgi taʼlimda 14 ta yoʻnalish boʻyicha 420 ta oʻrin, sirtqi taʼlimda 5 ta yoʻnalishda 150 ta oʻrin, dual taʼlimda esa 3 ta yoʻnalishda 90 ta oʻrin ajratilgan. Ular orasida dasturiy injiniring, ekologiya, elektr stantsiyalari, oziq-ovqat texnologiyasi, metallurgiya, veterinariya, maktabgacha taʼlim tarbiyachisi kabi sohalar mavjud.

Amudaryo tumanidagi Muxandislik texnologiyalari texnikumida oʻtkazilgan “Ochiq eshiklar kuni” va “Karera kuni” tadbirlari yoshlarning taʼlimga boʻlgan qiziqishini oshirish, ularni kasbga yoʻnaltirish va ish bilan taʼminlash borasida muhim ahamiyat kasb etdi.

Shohzod Qurbonboyev.