AMUDARYo IXTISOSLAShTIRILGAN MAKTABIDA “SOʻNGGI QOʻNGʻIROQ” TADBIRI OʻTKAZILDI

Maktab – buyuk orzular ostonasi. Ana shu muqaddas makonda kechgan har bir kun insonga ezgu xotiralar baxsh etadi. Bolalikda uygʻongan doʻstlik, qadrdonlik tuygʻulari hech qachon unutilmaydi. Ayniqsa, ilm olish sari tashlangan qadamlarga, orzularga guvoh boʻlgan jonajon maktab insonning shaxs sifatida shakllanish jarayonida eng samimiy doʻst, eng ulugʻ ustoz kabi aziz va mukarramdir. Shuning uchun ham maktab tahsilini tamomlagan har bir voyaga yetgan oʻgʻil-qiz oʻzlariga oq-qorani tanitgan muqaddas dargoh bilan koʻzlarida yosh, qalblarida cheksiz hayajon, ulugʻvor orzular ila xayrlashadilar.

Joriy 2024-2025 oʻquv yili yakunlariga bagʻishlangan “Soʻnggi qoʻngʻiroq” tadbirlari 24-may sanasida butun mamlakatimizda boʻlgani kabi Amudaryo tumanida ham hayajonli daqiqalarga, yorqin taassurotlarga boy tarzda keng nishonlandi. Shu kuni tumandagi Amudaryo ixtisoslashtirilgan maktabining bayramona bezatilgan hovlisida, “Ilm – eng ulugʻ sharaf!” shiori ostida boʻlib oʻtgan “Soʻnggi qoʻngʻiroq” tadbiri maktab bitiruvchilari uchun biri-biridan shirin, goʻzal daqiqalarni hadya etdi.

Muhtaram Prezidentimizning bitiruvchilarga yoʻllagan tabrigi bilan boshlangan mazkur tadbirda ota-onalar, tadbirga tashrif buyurgan Yangiobod mahalla fuqarolar yigʻini masʼullari hamda maktab oʻqituvchilari bitiruvchi yoshlarga oʻzlarining ezgu tilaklarini bildirdilar.

Ayniqsa, Prezidentimizning tabrigidagi “Bugungi kunda biz oʻz oldimizga qoʻyayotgan buyuk maqsadlarni amalga oshirishda butun xalqimiz qatori, bilimli, hunarli, tadbirkor va vatanparvar, har tomonlama yetuk yoshlarga tayanamiz. Sizlardek oʻz kuchiga ishongan, qatʼiyatli yoshlardan qadrdon maktabingiz, aziz ustozlaringiz va ota-onalaringiz, butun xalqimiz faqat ezguliklar, yorqin natijalar kutadi” – degan soʻzlari yoshlar qalbiga daʼvatkor ruh, ishonch va qatʼiyat bagʻishladi.

Tadbir davomida Amudaryo ixtisoslashgan maktabi oʻquvchilari erishayotgan yutuqlar tilga olinib, maktab oʻquvchilarining OTMlarga oʻqishga kirish koʻrsatkichlari yil sayin ortib borayotgani alohida qayd etildi. Xususan, joriy oʻquv yilida maktabni bitirayotgan 76 nafar oʻquvchilardan 56 nafari milliy va xalqaro darajadagi sertifikatlar egalari boʻlishdi. Ulardan 2 nafari fanlar olimpiadasining tuman va Qoraqalpogʻiston Respublikasi bosqichlarida gʻoliblikni qoʻlga kiritishib, mamlakat bosqichida muvaffaqiyatli ishtirok qildilar. Bitiruvchilardan Jahongir Yoʻldoshev esa nufuzli xorijiy OTMlarining test sinovlaridan muvaffaqiyatli oʻtib, bir yoʻla 6ta OTMning toʻliq grantlarini yutib oldi.

“Soʻnggi qoʻngʻiroq” tadbirida soʻzga chiqqan ota-onalar va tadbirning barcha mehmonlari maktabda yosh avlod taʼlim-tarbiyasiga qaratilayotgan eʼtibor, yaratilgan shart-sharoitlar, oʻqituvchi va murabbiylar tomonidan amalga oshirilayotgan biri-biridan qiziqarli dars-mashgʻulotlari, eng zamonaviy taʼlimiy dasturlardan minnatdor ekanliklarini alohida eʼtirof etdilar va mustaqil hayotga qadam qoʻyish arafasida turgan farzandlariga oʻzlari tanlagan yoʻnalishlar boʻyicha Prezidentimiz, xalqimiz ishongan, ona Vatanga sadoqatli, munosib mutaxassislar boʻlib yetishishlarida samimiy tilaklar tiladilar.

Tadbirning adabiy-musiqiy qismida “Ilm – eng ulugʻ sharaf!” shiori mazmun-mohiyatini oʻzida mujassam etgan kontsert dasturi namoyish etilib, yoshlik, doʻstlik ilm-u ziyo, Vatan va ustozlarni sharaflovchi kuy-qoʻshiqlar yangradi, goʻzal raqslar ijro etildi.

Shundan soʻng ramziy soʻnggi qoʻngʻiroq jaranglab, maktabning 76 nafar bitiruvchi yoshlari mustaqil hayotning ilk sinovlari – davlat test sinovlarini muvaffaqiyatli topshirish sari dadil qadamlarini qoʻydilar.

Robiya Yoʻldosheva.