Amudaryo tumanida aholini koʻmir bilan taʼminlashda muhim qadam – Jumurtov temiryoʻl stantsiyasi ishga tushirildi

Aholi uchun kuz-qish mavsumlarida barqaror va sifatli issiqlik manbaiga ega boʻlish muhim masala sanaladi. Ayniqsa, qishloq joylarida yashovchi isteʼmolchilarni koʻmir bilan oʻz vaqtida va uzluksiz taʼminlash dimiy dolzarb masala. Bu borada esa infratuzilmaning oʻrni alohida.

Amudaryo tumaniga koʻmir daryoning oʻng qirgʻogʻida joylashgan maxsus bazadan keltirilar edi. Bu esa ayni qish mavsumida daryodan oʻtishda maʼlum qiyinchiliklarni, ortiqcha ovoragarchiliklarni keltirib chiqarar edi. Endilikda bu muammoga barham berilib, tumanning Jumurtov shaharchasida yangi temiryoʻl stantsiyasi va koʻmir yetkazib berish markazi ishga tushirildi.

Mazkur stantsiyaning ishga tushirilishi tumanning yoqilgʻi taʼminoti zanjirida uzluksizlikni taʼminlash, vaqt va masofani tejashda muhim rol oʻynaydi. Endilikda koʻmir temiryoʻl orqali toʻgʻridan-toʻgʻri Jumurtovga yetkazib beriladi, bu esa avtomobil transportiga boʻlgan yuklamani, yoʻllardagi tirbandlik va xarajatlarni kamaytirishga xizmat qiladi.

Yangi stantsiya ochilishi bilan aholiga koʻmirni uzoq masofalardan tashib kelish zarurati yoʻqoldi. Endi fuqarolar oʻz hududlariga yaqin manzildan, transport uchun kamroq pul sarflab sifatli koʻmir xarid qilish imkoniyatiga ega.

Maʼlumot oʻrnida aytish joizki, amudaryolik isteʼmolchilarga koʻmir mahsuloti “Koʻmir taʼminoti” MChJning Qoraqalpogʻiston Respublikasi filialiga qarashli ombordan yetkazib beriladi. 2025-2026-yillar kuz-qish mavsumida byudjet tashkilotlari uchun 6 ming 153 tonna koʻmir mahsulotlari yetkazib berish rejalashtirilgan. Shundan hozirgi kunda 279 tonna koʻmir qabul qilib olingan va tarqatish ishlari boshlanmoqda. Shuningdek, aholi uchun 2025-2026-yillar kuz-qish mavsumida 27 ming 706 tonna koʻmir olib kelish rejalashtirilgan.

Yangi stantsiyaning ish boshlashi mahalliy ish oʻrinlarini yaratishga ham xizmat qilmoqda. Yuk tushirish, saqlash va tarqatish jarayonlarida oʻnlab mahalliy aholi ish bilan taʼminlanmoqda. Bu esa iqtisodiy faollikni oshirib, ijtimoiy barqarorlikka hissa qoʻshmoqda.

Yangi tizim orqali yetkazib beriladigan koʻmir mahsuloti sifat jihatidan nazorat qilinadi. Taqsimot jarayonlarida shaffoflik, adolat va samaradorlik tamoyillari asosida ish olib boriladi.

Jumurtov shaharchasida koʻmir yetkazib beruvchi temiryoʻl stantsiyasining ishga tushirilishi – bu aholini barqaror issiqlik bilan taʼminlash va hududiy infratuzilmani rivojlantirish yoʻlidagi muhim qadamlardan biridir. Aholining koʻplab ovoragarchilik va sarson-sargardonliklariga barham berilib, muammolari bartaraf qilinmoqda. Koʻmirni uzoq masofalardan olib kelish, narxning sunʼiy oshishi, yetkazib berishda yuzaga keladigan kechikishlar kabi muammolar aholining kundalik hayotiga sezilarli taʼsir koʻrsatib kelayotgan edi. Endilikda bu muammolar ortda qolmoqda.

Bugun Jumurtov shaharchasida va butun tumanimizda yashovchi aholi yillar davomida yigʻilib qolgan muammoning hal boʻlganidan mamnun. Endilikda har bir xonadon, har bir ijtimoiy muassasa kuz-qish mavsumiga tayyorgarlik koʻrishda ishonchli taʼminot tizimiga ega.

Charos Arslonova, tuman hokimligining Axborot xizmati rahbari.