Amudaryo tumanida keng koʻlamli obodonlashtirish ishlari bosqichma-bosqich amalga oshirilmoqda

Amudaryo tumanida soʻnggi yillarda aholining turmush sifatini oshirish, hududlarni obod qilish, infratuzilmalarni yaxshilash borasida keng koʻlamli ishlar amalga oshirilmoqda. Ayniqsa, ichki yoʻllarning holatini yaxshilash boʻyicha amalga oshirilayotgan saʼy-harakatlar eʼtiborga loyiqdir. Tumanda keng koʻlamda ichki yoʻllarga qum-shagʻal aralashmani yotqizish, yoʻl chetlarini tozalash va obodonlashtirish ishlari olib borildi hamda bu boradagi ishlar davom etmoqda. Navbatdagi bosqichda tumanning Bogʻ, Daryo boʻyi, Choykoʻl va Xizr eli ovul hamda mahallalaridagi ichki koʻchalarga qum-shagʻal aralashmasi toʻshash ishlari boshlab yuborildi. Bu tashabbus respublika miqyosidagi rahbarlar ishtirokida bosqichma-bosqich amalga oshirilmoqda.

Mazkur jarayon Oʻzbekiston Respublikasi Prezidenti maslahatchisi Tursunxon Xudoybergenov boshchiligida, vazirlik va idoralar rahbarlari ishtirokida tashkil etildi. Tashrif davomida mutasaddilar bevosita joylarga chiqqan holda, amalga oshirilayotgan ishlar bilan tanishdi, kamchiliklar va imkoniyatlarni joyida koʻzdan kechirdilar. Ularning joylarga chiqib, aholi bilan bevosita muloqot qilgani, mavjud muammolarni oʻrganib, joyida hal etishga qaratilgan harakati aholi tomonidan iliq qarshi olindi.

Taʼkidlash kerakki, ichki yoʻllarning holati har bir mahallaning qiyofasi, har bir fuqaroning kundalik hayotiga bevosita taʼsir koʻrsatadi. Aynan shu jihat inobatga olinib, tumanning eng ogʻriqli nuqtalaridan biri boʻlgan ichki yoʻllarni taʼmirlash masalasi rahbarlar tomonidan ustuvor vazifa sifatida belgilangan. Bu ishlarga mutaxassislar va zarur texnikalar safarbar qilinib, talab qilinadigan qurilish materiallari oʻz vaqtida yetkazib berilmoqda va qisqa muddat ichida bir nechta hududdagi yoʻllarga qum-shagʻal aralashmalari yotqizildi.

Bir kunning oʻzida oʻrtacha toʻrt mahalla hududidagi umumiy uzunligi 2 kilometrdan ortiq boʻlgan ichki yoʻllarga qum-shagʻal aralashmasi yotqizilmoqda. Qolaversa, yoʻl yuzalari tekislanib, aholining harakatlanishiga qulaylik yaratilmoqda. Shuningdek, aholi ham ushbu xayrli ishga oʻz hissasini qoʻshib, yoʻl chetlarini obodonlashtirish, yoʻl atrofini chiqindilardan tozalash, daraxtlar ostini yumshatish, oqova suvlarning toʻgʻri oqishini taʼminlash uchun ariqlarni tozalash kabi ishlarda faol ishtirok qilishmoqda. Zero, yoʻllarning obod boʻlishi ijtimoiy kayfiyatni koʻtarib, transport vositalarining harakatini osonlashtiradi va odamlarning davlatga boʻlgan ishonchini mustahkamlaydi.

Uzoq yillardan beri taʼmir koʻrmagan, qishda loy, yozda chang-toʻzon boʻlib qoladigan yoʻllar endilikda aholi va transport vositalarining emin-erkin harakatlanishga imkon bermoqda. Bu esa tumanning iqtisodiy va ijtimoiy faolligi oshishiga ham xizmat qiladi.

Tumanimizda keng koʻlamda amalga oshirilayotgan ichki yoʻllarni taʼmirlash ishlari islohotlar amalda qanday natija berayotganining yorqin misolidir. Bu muhtaram Prezidentimiz tomonidan ilgari surilayotgan “Inson qadri uchun” tamoyilining amaldagi ifodasidir. Endilikda bu ravon yoʻllar nafaqat manzillarni, balki koʻngillarni bir-biriga bogʻlab, xalqning orzu-umidlari roʻyobi, kelajakka ishonchi sifatida muhim ahamiyat kasb etmoqda.

Charos Arslonova, tuman hokimligining Axborot xizmati rahbari.