Amudaryo tumanida korruptsiyaga qarshi kurashish masalalari muhokama qilindi

Bugungi kunda korruptsiya nafaqat bir tizimning, balki butun jamiyatning eng asosiy muammolaridan biriga aylangan. U jamiyat taraqqiyotini sekinlashtiradi, insonlar orasidagi ishonchni yemiradi, davlat va fuqarolar oʻrtasida masofa paydo qiladi. Aynan shuning uchun ham mamlakatimizda korruptsiyaga qarshi kurashish davlat siyosatining ustuvor yoʻnalishiga aylantirilgan.

Shu maqsadda Amudaryo tumanida keng qamrovli chora-tadbirlar amalga oshirilmoqda. Yaqinda tuman hokimligida oʻtkazilgan navbatdagi yigʻilish ham aynan shu dolzarb masalaga bagʻishlandi. Mazkur yigʻilishda Qoraqalpogʻiston Respublikasi Vazirlar Kengashining Korruptsiyaga qarshi ichki nazorat boʻlimi boshligʻi Batir Matmuratov hamda Bosh prokuratura huzuridagi Iqtisodiy jinoyatlarga qarshi kurashish departamenti Qoraqalpogʻiston Respublikasi boshqarmasi boʻlim boshligʻi Rashid Sadikov ishtirok etdi va mavzu yuzasidan atroflicha maʼruza qildi. Yigʻilishga tuman Iqtisodiy jinoyatlarga qarshi kurashish departamenti masʼullari, hokim oʻrinbosarlari, deputatlar, mahallalar raislari, hokim yordamchilari jalb etildi.

Batir Matmuratov oʻz chiqishida korruptsiyaga qarshi kurashish borasida davlatimiz rahbari tomonidan ilgari surilgan strategik vazifalarga alohida eʼtibor qaratdi. U korruptsiya – jamiyat rivojiga qarshi qaratilgan yashirin toʻsiq ekanini, unga qarshi faqat qogʻozdagi chora-tadbirlar bilan emas, balki amaliy ishlar, ochiqlik va halollik orqali kurashish zarurligini taʼkidladi.

Qayd qilinganidek, korruptsiyaning ildizi koʻp hollarda oddiy befarqlikdan, loqaydlikdan boshlanadi. Har bir xodim oʻz vijdoni oldida masʼuliyatni his qilmasa, hech qanday qonun uni halol boʻlishga majbur qila olmaydi.

Tadbir davomida yigʻilish ishtirokchilariga korruptsiyaga qarshi kurashishga oid maxsus videorolik namoyish etildi. Unda korruptsiyaning davlatga, iqtisodiyotga, eng muhimi oddiy insonlar hayotiga qanday taʼsir oʻtkazishi aniq misollar bilan yoritildi.

Videorolik namoyishidan keyin ochiq muloqot boʻlib oʻtdi. Unda mutasaddilar va tashkilot rahbarlari oʻz fikrlarini bildirdilar, mavjud muammolar va ularni bartaraf etish yoʻllari xususida bahs-munozara yuritildi. Yigʻilish ishtirokchilari korruptsiyaga qarshi kurashish borasida har bir xodimning shaxsiy masʼuliyati muhim oʻrin tutishini yana bir bor anglab yetdilar.

Batir Matmuratov Amudaryo tumanidagi korruptsiyaga qarshi kurashish holatini nafaqat yigʻilish doirasida, balki joylarga chiqqan holda ham oʻrgandi. Xususan, u 36-sonli umumtaʼlim maktabi, Boyovul mahallasi va Tuman tibbiyot birlashmasida boʻlib, bu yerda davlat xizmatlarining shaffofligi, murojaatlar bilan ishlash tartibi, ichki nazorat tizimining samaradorligi kabi jihatlarni oʻrgandi.

Tashrif davomida tibbiyot muassasasida aholiga koʻrsatilayotgan xizmat sifati, navbatlarni samarali boshqarish, dorixona va laboratoriya tizimining ochiqligi, tibbiy xodimlarning halollik meʼyorlariga amal qilishi alohida tahlil qilindi. Joylardagi muloqotlar davomida aniqlangan muammolar yuzasidan mutasaddilarga aniq koʻrsatmalar, tavsiyalar va takliflar berildi.

Bugun har bir mutasaddining oldida turgan eng katta vazifa halollik tamoyillarini shunchaki targʻib qilish emas, balki amalda unga rioya etish, halol mehnat qilish va el ishonchini oqlashdir. Amudaryo tumanida oʻtkazilgan ushbu yigʻilish va joylardagi oʻrganishlar aynan shu yondashuvni amalda taʼminlashga xizmat qildi.

Charos Arslonova, tuman hokimligining Axborot xizmati rahbari.