Maqsadimiz – Yangi Oʻzbekistonning barqaror taraqqiyotini taʼminlashga hissa qoʻshish

30-iyun – Yoshlar kuni

Aholisining 60 foizdan ortigʻini yoshlar tashkil etadigan jannatmakon yurtimiz kelajagini maʼnan va sogʻlom, barkamol avlod yaratadi. Shunday oʻta masʼuliyatli, shu bilan birga butun xalq, millat taqdiri bilan bogʻliq ulkan vazifani zimmasiga olishga qodir barkamol yoshlarni tarbiyalab, voyaga yetkazish uchun mamlakatimizda zarur zamonaviy shart-sharoitlarni yaratishga alohida eʼtibor qaratiladi.

Dunyo hamjamiyati tomonidan “Oʻzbekiston – imkoniyatlar mamlakati” deb tan olinishi ham bejizga emas. Chunki bugungi kunda barcha imkoniyatlardan samarali foydalanib, zamonaviy bilim va tafakkurga, sogʻlom dunyoqarashga ega boʻlayotgan, dunyo yoshlari bilan ilmda, sportda, madaniyat va sanʼatda, qoʻyingki, hayotning barcha jabhalarida bellashishga qodir, “Oʻzbekistonning toza qon tomirlari” – navqiron avlod katta ishonch bilan hayotga dadil kirib kelayotgani qalblarimizga quvonch bagʻishlaydi.

Amudaryolik yoshlar orasida ham bilimdon, intiluvchan va tashabbuskor yoshlar safi tobora kengayib borayotir. Ayniqsa, har bir yoshni oʻz iqtidori va qobiliyatiga muvofiq yoʻnaltirish, kasbiy mahoratini oshirish, ilm-u hunar egallashlari uchun zarur shart-sharoitlar, imkoniyatlar yaratishga qaratilgan chora-tadbirlar muhim ahamiyat kasb etmoqda.

Xususan, Yoshlar agentligi Amudaryo tuman boʻlimi tomonidan 2025-yil davomida yoshlar bilan ishlashning yangicha tizimini joriy etish maqsadida mahallabay oʻrganishlar orqali yoshlarning bandligini taʼminlashga qaratilgan chora-tadbirlar rejasi ishlab chiqildi. Unga koʻra, yoshlarni kasb-hunarga oʻqitish, tadbirkorlikka jalb etish, ular oʻrtasida madaniyat, sport, axborot texnologiyalari va kitobxonlikni rivojlantirish maqsadida yanvar-fevral oylarida 14-30 yosh oraligʻidagi 53 227 nafar yoshlar xatlovdan oʻtkazilib, “Yoshlar balansi” shakllantirildi. Yoshlarning ijtimoiy ahvoli, qobiliyati va qiziqishlaridan kelib chiqqan holda ularning salkam 40 ming nafari “yashil”, 15 408 nafari “sariq,” 300 nafardan ziyodrogʻi “qizil” toifaga ajratildi. “Sariq” toifadagi 750 nafar ishsiz yoshlar tumandagi 24 nafar rahbarga biriktirildi.

Shuningdek, joriy yil 6 oy yakuni boʻyicha “Yoshlar daftari”ga tuman hududidan 210 nafar yoshlar kiritilib, shundan 175 nafariga kasbga oʻqitish, salomatlik va maʼnaviy rivojlanishga qaratilgan amaliy yordamlar koʻrsatildi. Oʻtgan 2024-yil yakunida daftarda qolgan 38 nafar yoshlar hamda 2025-yilning 6 oy yakuni boʻyicha “Yoshlar daftari”ga kiritilgan ehtiyojmand yoshlarga “Yoshlar daftari” jamgʻarmasi tomonidan 624 mln. 874 ming soʻm miqdorida moddiy yordamlar berildi.

Bundan tashqari, yil yakuniga qadar “Yoshlar daftari”ga qoʻshimcha 428 nafar yoshlar kiritilib, ushbu yoshlarning ijtimoiy-iqtisodiy muammolarini hal etish yuzasidan manzilli rejalar ishlab chiqildi. “Bir million dasturchi” loyihasi doirasida yoshlarni professional sertifikatga oʻqitish boʻyicha amalga oshirilgan ishlar tufayli 8 nafar yoshlar xalqaro darajadagi sertifikatga ega boʻldilar. Kambagʻal oilalarning 160 nafar farzandlari IT va axborot texnologiyalari yoʻnalishida oʻqitildi.

Yoshlarning muammo va takliflarini atroflicha oʻrganish maqsadida 2025-yil yanvar-may oylarida yoshlar bilan 5-marta onlayn, 5 marotaba yuzma-yuz uchrashuvlar oʻtkazildi. Uchrashuvlar davomida yoshlar tomonidan 30 ta muammo va takliflar kelib tushdi va ularning barchasi ijobiy hal qilindi.

Prezidentimizning “Yosh­lar tadbirkorligini rivojlantirish va bandligini taʼminlashga doir qoʻshimcha chora-tadbirlar toʻgʻrisida”gi 62-sonli Qarori asosida 7-yil muddatga, 2-yillik imtiyozli davr bilan jismoniy shaxslarga garovsiz 100 mln soʻmgacha, yakka tadbirkor sifatida faoliyat yurituvchi yoshlarga, shuningdek, taʼsischilari yosh fuqarolar boʻlgan yuridik shaxs tashkil etgan holda faoliyat yurituvchi kichik tadbirkorlarning kamida 20 ta ish oʻrni yaratishni nazarda tutuvchi loyihalariga imtiyozli davr bilan 7-yilgacha muddatga 5 mlrd soʻmgacha mablagʻlar ajratilishi belgilangan. Mazkur Qaror asosida tadbirkorlik faoliyatini boshlash istagida boʻlgan 50 nafardan ortiq yoshlardan ayni paytda 12 nafariga imtiyozli kreditlar ajratilib, oʻz bizneslarini yoʻlga qoʻydilar.

Yoshlarni harbiy vatanparvarlik ruhida tarbiyalash maqsadida tashkil etilayotgan turli sport musobaqalari, kitobxonlik kechalari, milliy-maʼnaviy qadriyatlarni asrab-avaylashga qaratilgan, millatlararo totuvlik targʻibotiga bagʻishlangan sheʼriyat kechalari, “Uch avlod uchrashuvi” tadbirlariga tumanning deyarli barcha hududlaridagi yoshlar qamrab olinmoqda. Xususan, joriy yilning oʻtgan davri davomida tashkillashtirilgan harbiy vatanparvarlik mavzusidagi “Yosh chegarachilar”, “Yosh qutqaruvchilar” va “Yosh gvardiyachilar” musobaqalariga salkam 800 nafar yoshlar jalb etildi.

Bundan tashqari, tumanimiz hududida joylashgan harbiy qismlarda 3-marta "Ochiq eshiklar kuni" tashkil qilinib, ushbu tadbirlarga 250 nafardan ortiq yoshlar qamrab olindi. Shuningdek, yoshlar oʻrtasida jinoyatchilikning oldini olish maqsadida 24-marta tungi reyd tadbirlari oʻtkazilib, voyaga yetmagan yoshlarning ota-onalar va vasiylar qaramogʻisiz tungi paytlarda koʻngilochar kafe va restoranlarga chiqish­larining oldi olindi.

Yoshlar hayotiga oid muammolar yechimini topishda tashabbuskor yoshlarning oʻzlari ham ishtirok etayotgani eʼtiborga munosib. Oʻzlarining umummanfaati uchun foydali taklif va gʻoyalari bilan eng chekka qishloqlarda ham sport-sogʻlomlashtirish inshootlarini barpo etish, yoshlarning boʻsh vaqtlarini mazmunli oʻtkazishga koʻmaklashish istagidagi tadbirkor va volontyor yoshlar safi oshib borayotganidan ayonki, yoshlar kelajagiga daxldorlik hissi bilan yashash amudaryoliklar uchun hayot mazmuniga aylangan. Chunki har bir oilaning farovon va baxtiyor turmush tarzi, ona Vatan farovonligi bugungi yosh avlod taʼlim-tarbiyasiga qaratilgan eʼtibor va ragʻbatga bogʻliq. Farzandlari sogʻlom va barkamol yurt esa zamon bilan hamnafas, barqaror taraqqiy etaveradi. Maqsadimiz – Yangi Oʻzbekistonning barqaror taraqqiyotini taʼminlashga munosib hissa qoʻshish.

Fursatdan foydalanib, mamlakatimiz va amudaryolik yoshlarni 30-iyun – Yoshlar kuni bilan chin dildan tabriklayman. Ezgu orzular, buyuk imkoniyatlar mamlakati – Yangi Oʻzbekistonni bunyod etish, mustaqilligimizni mustahkamlash yoʻlidagi ulugʻvor ishlarida muvaffaqiyatlar tilayman.

Behzod Oʻrinboyev, Yoshlar ishlari agentligi Amudaryo tuman boʻlimi rahbari.