40-sonli umumtaʼlim maktabida “Aʼlo maktab” loyihasi doirasida amaliy-uslubiy seminar oʻtkazildi

Amudaryo tuman Maktabgacha va maktab taʼlimi boʻlimi tasarrufidagi 40-sonli umumtaʼlim maktabida “Dolzarb 90 kun” doirasida “Aʼlo maktab – 2025” loyihasining I yarim yillik yakuni boʻyicha amaliy-uslubiy seminar tashkil etildi.

Seminarda Qoraqalpogʻiston Respublikasi maktabgacha va maktab taʼlimi vaziri Gulistan Qojaboyeva, vazirning birinchi oʻrinbosari Aybek Davletbayev, loyiha doirasida ijobiy natijalarga erishgan maktablar direktorlari, tuman Maktabgacha va maktab taʼlimi boʻlimi boshligʻi Yalgʻash Shomuradov hamda boshqa masʼullar ishtirok etdi.

Tadbirda Qoraqalpogʻiston Respublikasi maktabgacha va maktab taʼlimi vaziri Gulistan Qojaboyeva soʻzga chiqib, “Qoraqalpogʻiston tajribasi” sifatida joriy etilgan “Aʼlo maktab – 2025” loyihasining maqsad va vazifalari xususida toʻxtaldi. Shuningdek, 40-sonli umumtaʼlim maktabida erishilgan yutuqlar alohida taʼkidlanib, ushbu taʼlim muassasasi namuna sifatida tilga olindi.

Maʼlumki, 2025-yil mart oyidan boshlab “Aʼlo maktab – 2025” loyihasi “Qoraqalpogʻiston tajribasi” sifatida amalga oshirilmoqda. Uning asosiy maqsadi — maktablar rahbarlari va jamoalarining taʼlimdagi yutuqlarini ragʻbatlantirish, ularni moddiy va maʼnaviy jihatdan qoʻllab-quvvatlashdan iborat.

Loyiha doirasida maktablar 56 ta asosiy koʻrsatkich asosida baholanadi hamda ularning natijalari vazirlikning rasmiy saytida eʼlon qilib boriladi. Gʻoliblar yil yakunida aniqlanib, moddiy va maʼnaviy ragʻbatlantiriladi. Past koʻrsatkich qayd etgan maktablarga esa manzilli metodik yordam koʻrsatiladi.

Tadbir doirasida mehmonlarga maktab jamoasi tomonidan tayyorlangan dasturlar namoyish etildi. Shuningdek, maktab boʻylab ekskursiya tashkil etilib, unda maktab direktori Sanobar Xoʻjamurodova taʼlim maskanining oʻquv-tarbiya jarayoni, fan xonalari, moddiy-texnik baza hamda pedagog va oʻquvchilarning kasbiy-ijodiy faoliyati haqida maʼlumot berdi.

Aytish joizki, hozirda 40-sonli umumtaʼlim maktabida 111 nafar oʻqituvchi faoliyat olib bormoqda. Ulardan 27 nafari oliy, 32 nafari birinchi, 40 nafari ikkinchi toifali, 12 nafari esa mutaxassis oʻqituvchilardir. Maktabda 1604 nafar oʻquvchi tahsil olmoqda. Taʼlim 52 ta sinfda tashkil etilgan boʻlib, shulardan 16 tasi variativ oʻquv rejasi asosida faoliyat yuritadi.

2023–2024 oʻquv yili yakunlariga koʻra, 143 nafar bitiruvchidan 121 nafari, yaʼni 84,6 foizi oliy taʼlim muassasalariga qabul qilingan. Imtihon natijalari boʻyicha oʻrtacha ball 98,3 foizni tashkil etgan.

Xorijiy tillarni oʻqitish borasida ham maktab katta yutuqlarga erishgan. 2021–2025-yillarda maktab “Xorijiy tillarni oʻqitish boʻyicha eng yaxshi maktab” tanlovining tuman bosqichida 1-oʻrin, 2024–2025 oʻquv yilida esa Qoraqalpogʻiston Respublikasi bosqichida 2-oʻrinni qoʻlga kiritib, 200 mln soʻmlik mukofot vaucheri bilan taqdirlandi.

Maktabda 10 nafar oʻqituvchi C1, 5 nafar oʻqituvchi B2, 1 nafar oʻqituvchi B1 darajadagi xorijiy til sertifikatiga ega. Shuningdek, 4 nafar oʻquvchi C1, 48 nafar oʻquvchi B2 va 1 nafar oʻquvchi B1 darajasini tasdiqlovchi xalqaro sertifikat olgan.

Jami 23 nafar pedagog milliy sertifikatga ega. 2024–2025 oʻquv yilida oʻtkazilgan attestatsiyada ingliz tili oʻqituvchisi Nurbek Jumaniyazov 94 ball, matematika oʻqituvchisi Sherzod Ashirov esa 90 ball toʻplab, 70 foizlik ustamaga ega boʻldi.

Bundan tashqari, pedagog kadrlarning kasbiy mahoratini baholashga qaratilgan “Qoraqalpogʻiston ustozi – 2025” tanlovida ham maktab oʻqituvchilari muvaffaqiyat qozondi. Jumladan, Sherzod Ashirov aniq fanlar, Sarvar Yaxshimov esa tabiiy fanlar yoʻnalishida gʻolib deb topildi.

Kunning ikkinchi yarmida seminar yakuniga bagʻishlangan yigʻilish boʻlib oʻtdi. Unda loyiha doirasida amalga oshirilgan ishlar tahlil qilindi, mavjud muammolar va ularning yechimlari muhokama qilinib, kelgusidagi ustuvor vazifalar yuzasidan taklif va tavsiyalar bildirildi.

Yigʻilish davomida 40-sonli umumtaʼlim maktabi faoliyati alohida qayd etildi. Ushbu taʼlim maskani “Aʼlo maktab – 2025” loyihasi doirasida erishgan natijalari bilan boshqa maktablar uchun ibrat namunasi sifatida eʼtirof etildi. Xususan, taʼlim sifati, bitiruvchilarning oliy taʼlim muassasalariga kirish koʻrsatkichlari, xorijiy tillarni oʻqitishdagi yutuqlar, oʻqituvchilarning malaka darajasi va xalqaro sertifikatlarga egaligi, shuningdek, maktabning zamonaviy moddiy-texnik bazasi va samarali metodik yondashuvlari loyihaning amaliyotdagi muvaffaqiyatini tasdiqlovchi asosiy koʻrsatkichlar sifatida taʼkidlandi.

Shu bilan birga, 40-sonli umumtaʼlim maktabi rahbariyati va jamoasi tomonidan birinchi yarim yillik yakunida qoʻlga kiritilgan natijalar, Vazirlikning masʼul xodimlari tomonidan esa yangi baholash tizimining mazmun-mohiyati, uning ahamiyati hamda 2024–2025 oʻquv yili yakuniga oid taʼlim sifati boʻyicha tashqi onlayn monitoring natijalari tahliliy taqdimot orqali seminar ishtirokchilariga yetkazildi.

Maʼlumot oʻrnida aytish joizki, yangi baholash tizimida xalqaro tajribalar asosida summativ va formativ baholash turlari joriy etilgan.

Summativ baholash — maʼlum bir davr yoki bob boʻyicha oʻquvchilarning bilim darajasini aniqlashga qaratilgan. Unda oʻqituvchi muayyan mavzularni oʻrgatib boʻlgach, oʻquvchilarning oʻsha mavzular boʻyicha oʻzlashtirgan bilimlari sinaladi. Bu usul oʻquvchini muntazam oʻz ustida ishlashga undaydi.

Formativ baholash esa dars jarayonining oʻzida kechadi. Bu turda asosiy eʼtibor oʻquvchining bilim darajasidan koʻra, oʻqituvchining oʻqitish jarayonini baholash va unda kerakli oʻzgartishlar kiritish imkoniyatiga qaratilgan. Ushbu yondashuv oʻquv jarayonining samaradorligini oshirishga xizmat qiladi.

Mazkur tizimni joriy etishdan avval Yevropa, Osiyo, Markaziy Osiyo davlatlari, shuningdek, Rossiya, Turkiya hamda Kembrij taʼlim dasturlaridagi baholash mexanizmlari atroflicha oʻrganildi va milliy tizimga moslashtirildi.

Muxtasar aytganda, “Aʼlo maktab – 2025” loyihasi doirasida 40-sonli umumtaʼlim maktabida shakllangan tajriba taʼlim tizimidagi yangilanishlar samarasini namoyon etmoqda. Oʻquv va tarbiya jarayonlariga zamonaviy yondashuv, pedagoglarning kasbiy oʻsishiga eʼtibor, oʻquvchilar bilim sifati va koʻnikmalariga qaratilgan aniq mezonlar bugungi natijalarning asosiy omili boʻlib xizmat qilmoqda.

Rayhon Yakubova, tuman Maktabgacha va maktab taʼlimi boʻlimining Maktablar faoliyatini muvofiqlashtirish shuʼbasi metodisti.

Shohzod Qurbonboyev, jurnalist.