HUDUDLARDA BARPO ETILAYoTGAN BINO VA INShOOTLAR SIFATI YuZASIDAN NAZORAT TADBIRLARI OʻTKAZILMOQDA

Qurilish va kommunal xoʻjalik sohasi har bir fuqaroning hayoti va farovonligi bilan bogʻliq boʻlgan muhim sohalardan biri hisoblanadi. Shu bois, soʻnggi yillarda xalqimizning didiga, milliy-maʼnaviy qadriyatlariga mos, yashash uchun qulay sharoitlarga ega uy-joylar barpo etish borasida keng koʻlamli islohotlar olib borilmoqda va shunga mos ravishda qurilish sifatini oshirishga alohida eʼtibor qaratilmoqda.

Xususan, faqat oʻtgan 2024-yilning oʻzida mamlakatimizda 40 mln. kvadrat metrdan ziyod bino va inshootlar qurilib, foydalanishga topshirilgan. Hududlarda 100 mingdan ziyod xonadonga ega 2044 ta koʻp kvartirali uy-joylar barpo etilgan. Bu kabi bunyodkorlik ishlari joriy 2025-yilda ham davom ettirilib, yil oxirigacha 120 ming xonadonga moʻljallangan koʻp qavatli uylar qurilishi rejalashtirilgan.

Ushbu keng koʻlamli dasturiy bunyodkorlik ishlarini moliyalashtirishga 15 trillion 500 mlrd soʻm, “Ipotekani qayta moliyalashtirish kompaniyasi” tomonidan 2,3 trillion soʻm mablagʻ yoʻnaltirilgan. Buning yordamida 70 mingta xonadonni ipoteka krediti orqali sotish rejalashtirilgan va kam daromadli oilalar uchun 30 ming xonadonga boshlangʻich badal davlat byudjetidan subsidiya orqali toʻlab berilishi koʻzda tutilgan.

Albatta, amalga oshirilayotgan bu kabi bunyodkorlik ishlari davlatimiz tomonidan qatʼiy belgilangan tartib-qoidalar asosida nazoratga olingan boʻlib, qurilish ishlari olib borilayotgan va foydalanishga topshirilayotgan obʼektlarning sifatiga jiddiy eʼtibor qaratiladi. Shunday boʻlsa-da soʻnggi 2-yilda qurilish va uy-joy kommunal xoʻjaligi sohasida 5,5 mingdan ortiq qoidabuzarlik holatlari aniqlanib, aybdorlarga nisbatan tegishli jazo choralari koʻrilgan.

Oʻzbekiston Respublikasi Prezidentining 2025-yil 14-apreldagi “Qurilish va uy-joy kommunal xoʻjaligi sohasida davlat nazoratini samarali tashkil qilish chora-tadbirlari toʻgʻrisida”gi 66-sonli Farmoni ijrosini taʼminlash, Qoraqalpogʻiston Respublikasi hududlarida amalga oshirilayotgan bino va inshootlar qurilishida sifat va samaradorlik holatini oʻrganish, sohada yoʻl qoʻyilayotgan kamchiliklarni aniqlash va ularni joyida bartaraf etish maqsadida ayni kunlarda Qoraqalpogʻiston Respublikasi Qurilish, uy-joy kommunal xoʻjaligi sohasida hududiy nazorat Inspektsiyasi tomonidan nazorat tadbirlari amalga oshirilmoqda.

Beruniy tumani Toʻqimachi mahallasi hududidagi Kat koʻchasida “Beruniy agroqurilish” MChJ tomonidan barpo etilayotgan 5 qavatli, 30 xonadonli turar joy binosi qurilishi obʼektida hududiy nazorat Inspektsiyasi inspektorlari tomonidan monitoring oʻtkazilganda, obʼekt qurilishida qoidabuzarliklar aniqlandi. Olib borilgan monitoring natijalariga koʻra, binoning eshik va deraza toʻsinlari uchun loyihada belgilangan 22 santimetrli monolit kamar oʻrniga boshqa sifatsiz materialdan foydalanilgan. Loyihaga zid ravishda qalinligi 22 santimetr emas, 16 santimetr qilib oʻrnatilgan. Shuningdek, binoning 3-qavatidagi devoriga 31 kubometr sifatsiz gʻisht terilgan.

Aniqlangan kamchiliklarni bartaraf etish maqsadida sifatsiz terilgan gʻishtlar joyida buzdirildi va binoning eshik hamda deraza toʻsinlarini loyihada belgilangan tartibda oʻrnatish taʼminlandi. Ushbu holatlar boʻyicha masʼullarga bajarilishi majburiy boʻlgan yozma koʻrsatma berildi.

Beruniy tumani Toʻqimachi mahallasi Kat koʻchasida “Usta Bozorboy” xususiy qurilish korxonasi quruvchilari tomonidan barpo etilayotgan 5 qavatli 20 xonadonli turar joy qurilishi obʼektida ham hududiy nazorat Inspektsiyasi inspektorlari tomonidan monitoring oʻtkazildi.

Nazorat tadbirlari jarayonida obʼektning 1-qavatidagi eshik va derazalar uchun moʻljallangan monolit toʻsin-kamarlar oʻrniga loyihaga zid ravishda yigʻma temir-beton toʻsinlar oʻrnatilgani aniqlandi. Masʼullarga bino qurilishi loyihasida belgilangan materiallardan foydalanish zarurligi tushuntirilib, olib borilgan sifatsiz qurilish joyida buzdirildi va qurilishni tegishli loyiha boʻyicha bajarish majburiyligi toʻgʻrisida yozma koʻrsatma berildi.

Ayni paytda Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat Inspektsiyasi xodimlari tomonidan Respublikamiz hududlarida barpo etilayotgan bino va inshootlar qurilishida yuksak sifat va samaradorlikni taʼminlashga qaratilgan nazorat tadbirlari davom etmoqda. Maqsad – aholining har tomonlama qulay va yaxshi sharoitlarga ega uy-joylarda yashashlarini, turmush farovonligini oshirishni taʼminlashdir.

Robiya Yoʻldosheva.