YeRGA MEHR BERIB, BARAKA TOPAYoTGANLAR

Yoz — azaldan dehqonning sabr-qanoati va matonatini sinovdan oʻtkazadi. Jazirama issiqni ham pisand qilmay birin-ketin, izchillik asosida amalga oshiriladigan agrotexnik tadbirlarni sifatli oʻtkazishni niyat qilgan dehqon ahli uchun bu faslning har bir daqiqasi hisobda. Ayniqsa, chilla kirgach, bajariladigan agrotexnik amallar oʻz vaqtida sifatli amalga oshirilmasa, koʻzlangan maqsadga erishish qiyin. Shuning uchun ham tajribali, omilkor dehqonlar, harorat juda yuqori boʻlgan kezlarda  ham dala yumushlarini aslo ortga surib , "kunning tafti biroz pasaysin", qabilida ish tutishmaydi. Buni biz ijodiy guruhimiz bilan  Amudaryo tumanining Xizr eli mahalla fuqarolar yigʻini hududidagi  "Rajapov Omonboy" fermer xoʻjaligi ishchilari faoliyati bilan tanishish asnosida yaqqol his etdik.

Oʻtgan 2024 qishloq xoʻjalik yilini barcha yoʻnalishlar boʻyicha   muvaffaqiyatli yakunlagan fermer xoʻjaligi aʼzolarining joriy yilgi rejalari ham baland. Omonboy Rajabov rahbarligidagi mazkur fermer xoʻjaligi yerlari 26 nafar ijarachi-dehqonga boʻlib berilgan. Erta bahorda 40 gektar maydonga "Sulton" navli tez pishar chigit  ekilgan  dalalar ayni paytda hosilga kirgan. Xoʻjalik ijarachi-dehqonlarining oʻzaro ahilliklari, agrotexnik tadbirlarni amalga oshirishda hamjihatlik bilan ish yuritishlari natijasida gʻoʻza nihollari baravj rivojlanmoqda. Yoz mavsumining harorat eng yuqori boʻlgan kunlari xoʻjalik ishchilari dala ishlarini ertalabki va kechki salqin paytlarida amalga oshirishgani gʻoʻzaga chilla suvini tarashda muhim ahamiyat kasb etdi. Joʻyaklarda suvning uzoq vaqt turib qolishining oldi olinib, yuqori harorat taʼsirida hosil nishonalarining nobud boʻlishiga yoʻl qoʻyilmadi. Ayni kunlarda esa begona oʻtlardan tozalanib, chilla suviga qondirib sugʻorilgan va tobiga kelgan  dalalarda gʻoʻza qator oralariga   ishlov berish, chilpish ishlari  amalga oshirilmoqda.

Sogʻlom va durkun rivojlanayotgan  gʻoʻzalarning hosil tuganaklari koʻzlarni quvontiradi. Birinchi suvdan keyingi shudgorlash ishlarining sifatli olib borilishini taʼminlash maqsadida mavjud texnika vositalarini taʼmirlash, mavsumiy ishlarga shaylashga alohida eʼtibor qaratilgani bois, bu borada muammo yoʻq hisobi. Fermer xoʻjaligi ixtiyoridagi 2 ta  MTZ—80-11 rusumli va "Orion"  traktorlari  dehqonlar uchun hamisha qoʻl-qanot.

Fermer xoʻjaligida paxtadan tashqari 10 gektar maydonda  bugʻdoy ham yetishtiriladi. Xoʻjalik gʻallakorlari joriy dehqonchilik yilida gʻalladan yuqori hosil oldilar. 62  tonnadan ziyod   aʼlo navli qirmizi don yigʻishtirib olinib,  2025-yilgi kontraktatsiya shartnomasi  rejasiga muvofiq  davlatga 31 tonna  hosil yetkazib berildi.  Yetishtirilgan hosilning 31 tonnadan ziyodi fermer xoʻjaligi ixtiyorida qolgani bois, ijarachi-dehqonlar va ishchilarning manfaatdorligi ham oshdi. Jami 12 tonna bugʻdoy xoʻjalik ishchilariga taqsimlab berildi.  Xoʻjalikda paxta va gʻalladan tashqari,   moyli ekinlar ekishga   ham alohida eʼtibor qaratiladi.

Ayni paytda 3,5 gektar maydondagi kunjut ham moʻl hosildan darak berib    turibdi. Bundan tashqari, 2 gektar maydondagi tarvuz va 1,5 gektar yerdagi   qovun paykallari  hosil  nishonalaridan fermer xoʻjaligi rahbari  Omonboy  Rajabovning ham, ijarachi-dehqonlarning ham  koʻngillari toʻq.    Ishni  "Daladan—dasturxonga" tamoyili asosida  tashkil qilgan xoʻjalik dehqonlari tomonidan yetishtirilgan poliz mahsulotlar har doimgiday bu yil ham xaridorgir. Ayni paytda tarvuz va qovun paykallarida pishib-yetilgan hosilni ichki bozorga yoʻnaltirish orqali xalqimiz dasturxonining toʻkinligiga hissa qoʻshish maqsadida hosil yigʻish ishlari olib borilmoqda.

Yerga mehr bergan inson aslo kam boʻlmaydi, balki baraka topadi. Fidoyi mehnatlari tufayli oʻzininggina emas, xalqning ham hayotiga fayz bagʻishlaydi. Xizr eli mahallasining har bir kuniga, el-yurtga  qut-baraka  baxsh etish maqsadida  mehnat qilayotgan Omonboy Rajabov rahbarligidagi  fermer xoʻjaligi dalalarini oralab, ortga, shaharga qaytarkanmiz, xoʻjalik dalalarida barq urib turgan fayz-u tarovatdan koʻngillarimiz  yanada  yuksaldi.                                                                                                                                                                                                                                                                                                                                  

Robiya Yoʻldosheva.