Yoshlar – taraqqiyot tayanchi

Bugungi kunda mamlakatimizda yoshlar salohiyatini roʻyobga chiqarish, ularni qoʻllab-quvvatlash va har tomonlama kamol topishlariga sharoit yaratish davlat siyosatining ustuvor yoʻnalishlaridan biri sifatida alohida eʼtibor qaratilmoqda. Bu boradagi ezgu tashabbus va islohotlarning joylardagi ijrosini, ayniqsa, yoshlar hayotiga qanday taʼsir koʻrsatayotganini amaliy misollar orqali koʻrish mumkin. Amudaryo tumanida oʻtkazilgan navbatdagi media-tur aynan mana shunday yondashuvni yoritishga qaratildi.

Amudaryo tumani hokimligining Axborot xizmati tashabbusi bilan tashkil etilgan media-turda “Amudaryo” telekanali va “Taraqqiyot koʻzgusi” gazetasi jurnalist va muxbirlari ishtirok etib, tumanda yoshlarni qoʻllab-quvvatlash va bandligini taʼminlash yoʻlida amalga oshirilayotgan saʼy-harakatlar bilan bevosita tanishdilar.

Media-tur davomida ishtirokchilar bir qator mahallalarda boʻlib, yoshlarning oʻz tashabbuslari bilan yoʻlga qoʻygan faoliyatini koʻzdan kechirdilar. Jumladan, Boy ovul mahallasida yashovchi Davron Gulmonov faoliyati barchada katta taassurot qoldirdi. Unga yoshlar yetakchisi koʻmagida yumshoq mebellar ishlab chiqarishni yoʻlga qoʻyish uchun 100 million soʻm miqdorida imtiyozli kredit ajratilgan. Bugun Davronning mehnati evaziga besh nafar yoshning bandligi taʼminlangan, bu esa nafaqat uning oilasi, balki jamiyat farovonligi uchun ham xizmat qilmoqda.

Yangiobod mahallasida yashovchi Barno Murodovaning esa pishiriq va shirinliklar ishlab chiqarish tashabbusi qoʻllab-quvvatlangan. U ham 100 million soʻmlik imtiyozli kredit asosida oʻzining tadbirkorlik faoliyatini boshlagan. Hozirda Barno 2 nafar yoshni ish bilan taʼminlagan boʻlsa, qoʻshimcha ravishda 5 nafar shogirdni tayyorlamoqda. U xotin-qizlarni nafaqat ish bilan taʼminlamoqda, balki konditerlik sir-asrorlarini oʻrgatib, kasbga yoʻnaltirmoqda.

Shuningdek, Oq oltin ovulida yashovchi Zarifa Qurolboyeva yoshlarga ajratilgan yer maydonidan samarali foydalanish orqali oilasiga qoʻshimcha daromad olib kirmoqda. Unga ajratilgan 30 sotix yer maydonining 10 sotixiga pomidor, 20 sotixiga tarvuz ekilgan. Hozirda hosil moʻl-koʻl, oilaviy mehnat natijasida xonadonning turmush farovonligi yaxshilanmoqda.

Tashrif davomida jurnalistlar yoshlar bilan muloqot qilib, ularning orzu-rejalari, kelajakdagi maqsadlari xususida suhbatlashdilar. Muloqotlar shuni koʻrsatdiki, bugungi yoshlar oʻz hayotini mustaqil qurishga, jamiyatda munosib oʻrin egallashga, oʻz salohiyatini roʻyobga chiqarishga intilmoqda. Ularga zarur imkoniyat va ishonch berilsa, ular hech kimdan kam emasligini isbotlashga tayyor.

Davlat tomonidan koʻrsatilayotgan eʼtibor va koʻmak, yaratilayotgan imkoniyat va shart-sharoitlar evaziga yuzaga kelayotgan bu kabi tashabbuslar shubhasiz, kelajakda butun jamiyat taraqqiyoti uchun mustahkam poydevor boʻlib xizmat qiladi. Yoshlarga berilgan imkon – kelajakka qilingan sarmoya. Amudaryolik yoshlar esa bu imkoniyatni toʻgʻri anglab, oʻz harakati, mehnati va fidoyiligi bilan farovonlik sari dadil qadam tashlamoqda.

Charos Arslonova, tuman hokimligining Axborot xizmati rahbari.