Amudaryo tumanida ijtimoiy soha obʼektlari qurilishi jadallashmoqda

Soʻnggi yillarda yurtimizda qishloq joylarni har tomonlama rivojlantirish, aholi punktlarining meʼmoriy qiyofasini zamon talablari asosida yangilash, yoʻl-transport va muhandislik-kommunikatsiya infratuzilmasini takomillashtirish, shuningdek, ijtimoiy soha obʼektlarini barpo etishga qaratilgan keng koʻlamli islohotlar amalga oshirilmoqda. Ushbu chora-tadbirlar qishloq joylarda zamonaviy infratuzilmani shakllantirish, aholi uchun munosib yashash sharoitini yaratish va turmush madaniyatini yuksaltirishda muhim oʻrin tutmoqda. Ayniqsa, xalqaro hamkorlikdagi loyihalar doirasida amalga oshirilayotgan ishlar orqali hududlardagi infratuzilmaviy muammolar bosqichma-bosqich bartaraf etilmoqda.

Xususan, 2021-yil 18-sentyabrda qabul qilingan Oʻzbekiston Respublikasi Prezidentining “Islom taraqqiyot banki va OPEK xalqaro taraqqiyot jamgʻarmasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari toʻgʻrisida”gi Qarori ushbu yoʻnalishda muhim dasturulamal boʻlib xizmat etmoqda.

Loyiha Islom taraqqiyot banki hamda OPEK xalqaro taraqqiyot jamgʻarmasi moliyaviy koʻmagi asosida amalga oshirilayotgan boʻlib, bugungi kunda Amudaryo tumanida bir qator ijtimoiy soha obʼektlarida qurilish ishlari jadal surʼatda olib borilmoqda. Bu jarayonda 4 ta pudratchi tashkilot faol ishtirok etmoqda.

Qurilish jarayonlari tuman prokuraturasi tomonidan belgilangan tartibda oʻrganib chiqilib, obʼektlar doimiy nazoratga olingan. Xususan, “Zamin qurilish trans servis” MChJ tomonidan bir nechta hududda maktabgacha taʼlim muassasalari barpo etilmoqda. Jumladan, Farovon mahallasining oʻzida 90-oʻrinli, Olmazor mahallasining Birdamlik va Yangibogʻ koʻchalari tutashgan nuqtasida 120-oʻrinli, Arna boʻyi mahallasining Pokizalik koʻchasida 150-oʻrinli maktabgacha taʼlim tashkiloti qurilishi yakunlanish arafasida. Ayni paytda ushbu obʼektlarda sinov va texnik nazorat ishlari amalga oshirilmoqda.

Shuningdek, “Xiva qurilish kompleks” MChJ tomonidan Doʻstlik mahallasining Chamanzor koʻchasida 240-oʻrinli bogʻcha qurish ishlarini olib borilmoqda. “Baken qurilish montaj” MChJ tomonidan esa Oʻrta qalʼa va Toshyop ovullarida 3 qavatli mahalla majmualari barpo etilmoqda. “Shoʻraxan qurilish montaj” MChJ tomonidan esa Toshyop ovulida kuniga 50 nafar fuqaroga xizmat koʻrsata oladigan qishloq vrachlik punkti qurilishi davom etmoqda.

Barcha obʼektlarda ish jarayonlari belgilangan muddatga muvofiq, sifat va xavfsizlik talablariga qatʼiy rioya etilgan holda amalga oshirilmoqda. Tuman prokuraturasi, maxsus ishchi guruhlar, masʼul idoralar hamda texnik nazorat xizmati tomonidan qurilish ishlari doimiy monitoring qilib borilmoqda.

Shu bilan birga, inshootlarni belgilangan muddatlarda foydalanishga topshirish yuzasidan pudratchi tashkilotlar hamda mahalliy boshqaruv organlariga aniq vazifalar va topshiriqlar yuklatilgan. Loyihaning toʻliq amalga oshirilishi tumanda taʼlim va tibbiy xizmatlarga boʻlgan ehtiyojni qoplash, aholi farovonligini oshirish, infratuzilmani yanada takomillashtirishga xizmat qiladi.

Natijada, aholi uchun yaqin va qulay shart-sharoitlarda sifatli taʼlim hamda tibbiy xizmatlardan foydalanish imkoniyatlari yaratiladi. Tuman prokuraturasi va tegishli tashkilotlar tomonidan qurilish ishlari ustidan doimiy nazorat amalga oshirilmoqda.

Bundan tashqari, hududlarda zamonaviy shaharsozlik talablari asosida koʻp qavatli uy-joylar, ijtimoiy soha va infratuzilma obʼektlari hamda muhandislik-kommunikatsiya tarmoqlari qurilishini jadallashtirish boʻyicha izchil ishlar amalga oshirilmoqda.

Jumladan, Doʻstlik mahallasi hududidagi “Yangi Oʻzbekiston” massivida 1015 xonadonli 28 ta koʻp qavatli uy-joy qurilishi rejalashtirilgan. Mazkur loyiha nafaqat aholining uy-joyga boʻlgan ehtiyojini qondirish, balki ular uchun zamonaviy va qulay hayot sharoitini yaratish, shu bilan birga, hududning meʼmoriy qiyofasini tubdan oʻzgartirishga xizmat qiladi.

Ayni paytda mazkur massivda 60 xonadondan iborat 2 ta koʻp qavatli uy-joy foydalanishga topshirildi. Mazkur ishlar “2022–2026-yillarga moʻljallangan Yangi Oʻzbekistonning taraqqiyot strategiyasi”da belgilab berilgan ustuvor vazifalarning amaldagi ijrosini taʼminlashga xizmat qilmoqda.

Eng muhimi, har bir barpo etilayotgan uy-joy fuqarolarimiz farovonligi, jamiyat taraqqiyoti timsoli sifatida yurtimiz taraqqiyotiga xizmat qilmoqda.

Sharyar Joldasov, Amudaryo tuman prokurorining katta yordamchisi.