“Ishbilarmon ayol – 2025” koʻrik-tanlovining tuman bosqichi boʻlib oʻtdi

Bugungi kunda mamlakatimizda xotin-qizlarning jamiyatdagi oʻrni va nufuzi yil sayin mustahkamlanmoqda. Ularning iqtisodiy faolligini kuchaytirish, tadbirkorlik salohiyatini roʻyobga chiqarishga alohida eʼtibor qaratilmoqda. Ayniqsa, “Ayollar daftari” orqali moddiy va maʼnaviy qoʻllab-quvvatlanayotgan ayollarning oʻz yoʻlini topishi, tadbirkorlik faoliyatini boshlab, boshqalarga ham yoʻl koʻrsatishi amaldagi islohotlarning samarasidir. Bugun tadbirkor ayollar nafaqat oʻz oilasi, balki butun jamiyat rivojiga hissa qoʻshayotgan katta kuchga aylanmoqda.

Ana shunday ezgu maqsadlarning amaliy ifodasi sifatida Tadbirkorlar va ishbilarmonlar harakati – Oʻzbekiston Liberal-demokratik partiyasi Amudaryo tuman Kengashi tashabbusi hamda Oila va xotin-qizlar tuman boʻlimi hamkorligida “Ishbilarmon ayol – 2025” koʻrik-tanlovining tuman bosqichi yuqori saviyada tashkil etildi. Ushbu tanlov ayollarni tadbirkorlikka keng jalb etish, ularning ijtimoiy-siyosiy faolligini oshirish, mamlakat taraqqiyotidagi oʻrni va masʼuliyatini yuksaltirishda muhim platforma vazifasini bajardi.

Tanlovda tuman hokimi oʻrinbosari, Oila va xotin-qizlar boʻlimi rahbari Goʻzal Saburova, partiyaning tuman Kengashi rahbari Yaxshimurod Ahmedov, shuningdek, partiyadan tuman Kengashiga saylangan deputatlar Madamin Kazakov va Muyassar Rahmatullayeva hamda tumandagi yetakchi tadbirkor ayollar ishtirok etdi.

Tadbir davomida xotin-qizlarning iqtisodiy-ijtimoiy jarayonlardagi oʻrni, faolligi, tashabbuskorligi alohida eʼtirof etildi. Darhaqiqat, ayollarning tadbirkorlikka jalb etilishi oila daromadini oshiradi, farzandlar taʼlimi va sogʻligʻi, yashash darajasiga ijobiy taʼsir koʻrsatadi, kambagʻallikni kamaytirishga xizmat qiladi.

Tanlov doirasida ishbilarmon, tashabbuskor ayollar tomonidan ishlab chiqarilgan mahsulotlar koʻrgazmasi ham tashkil etildi. Unda tadbirkor, hunarmand va tomorqa yer egalari oʻz mahsulotlarini namoyish qildi. Mahalliy ishlab chiqaruvchilar tomonidan tayyorlangan brendlar, toʻquvchilik, badiiy bezak sanʼati, qishloq xoʻjaligi mahsulotlari, qoʻl mehnati buyumlari va milliy anʼanalarni ifoda etuvchi hunarmandchilik namunalari ishtirokchilar va mehmonlarda katta taassurot qoldirdi.

Ayniqsa, koʻrgazmada milliy obrazlar aks etgan qoʻgʻirchoqlar, yumshoq oʻyinchoqlar, esdalik sovgʻalari, toʻquvchilik va tikuvchilik mahsulotlari, har xil non va non mahsulotlari, uy-roʻzgʻor buyumlari keng namoyish etildi.

Taʼkidlash joizki, bugungi kunda Amudaryo tumanida 70 nafardan ortiq tadbirkor ayol turli yoʻnalishlarda faoliyat yuritmoqda. Tanlovda esa 30 nafar tashabbuskor va faol tadbirkor ayol ishtirok etdi. Ular orasida “Ayollar daftari”da turib, davlat tomonidan koʻrsatilgan yordam orqali oʻz tadbirkorligini boshlagan, boshqa xotin-qizlarga hunar oʻrgatayotgan, ularning iqtisodiy mustaqilligiga yordam berib kelayotgan ayollar borligi alohida eʼtirof etildi.

– Bu koʻrik-tanlovda “Ayollar daftari”da turgan, moddiy va maʼnaviy qoʻllab-quvvatlanish natijasida oʻz tadbirkorlik faoliyatini yoʻlga qoʻyib, boshqalarga ham hunar oʻrgatish orqali jamiyat ravnaqiga hissa qoʻshayotgan ayollar ishtirok etmoqda, – deydi tuman hokimi oʻrinbosari Goʻzal Saburova. – Bu – yurtimizda xotin-qizlarga qaratilgan eʼtibor va amalga oshirilayotgan keng qamrovli islohotlarning yorqin samarasidir.

Tanlovni baholash jarayonida hakamlar hayʼati tomonidan belgilangan mezonlar asosida ishbilarmon ayollarning faoliyati xolis baholandi. Ayniqsa, yangi ish oʻrni yaratish, “Ayollar daftari”dagi xotin-qizlarni kasb-hunarga oʻrgatib ularning bandligini taʼminlash, biznesini eksportga yoʻnaltirish kabi omillar muhim mezon sifatida koʻrildi.

Tanlovda ishtirok etgan har bir ayol oʻzining amaliy ishlanmalari, yutuqlari, yangi gʻoyalari va kelajakdagi rejalarini taqdim etdi. Natijalarga koʻra, Dildora Xaytboyeva faxrli 1-oʻrinni egallab, Qoraqalpogʻiston Respublikasi bosqichiga yoʻllanma oldi. 2-oʻringa Toʻlganoy Xudaybergenova va Malika Xudaybergenova loyiq deb topildi. 3-oʻrin esa Fatima Davletova, Nilufar Xoʻjaniyozova va Saida Esenbayevalarga nasib etdi.

Tanlov yakunida gʻolib va sovrindorlarga Tadbirkorlar va ishbilarmonlar harakati – Oʻzbekiston Liberal-demokratik partiyasi Amudaryo tuman Kengashi tomonidan diplom va esdalik sovgʻalari topshirildi. Shuningdek, bir guruh faol tadbirkor ayollar “Tashakkurnoma”lar bilan taqdirlandi.

“Ishbilarmon ayol – 2025” koʻrik-tanlovi tuman bosqichi ayollar tadbirkorligini ragʻbatlantirish, ularning salohiyatini yuzaga chiqarish, ijtimoiy-iqtisodiy faolligini oshirishga xizmat qiluvchi samarali maydonga aylandi. Bunday tadbirlar orqali har bir ayol oʻzini namoyon etish va boshqalar uchun namuna boʻlish imkoniga ega boʻlmoqda.

Shohzod Qurbonboyev tayyorladi.