Amudaryo tumanida gʻalladan boʻshagan maydonlarda takroriy ekinlardan yuqori hosil olishning samarali usullari hamda iqtisodiy oʻsish kafolati

Amudaryo tumanida 2025-yilda gʻalla oʻrim-yigʻimi muvaffaqiyatli yakunlanib, hosildorlik koʻrsatkichlari oʻtgan yilga nisbatan yuqori boʻldi. Ayniqsa, fermer xoʻjaliklari tomonidan zamonaviy agrotexnika talablariga rioya qilingani, suv resurslaridan oqilona foydalanish, sifatli urugʻlik va agroqoʻllab-quvvatlash tizimining yaxshilangani natijasida yuqori natijalarga erishildi.

Bu yil tumanda 14 ming gektardan ziyod maydonda gʻalla yetishtirildi va hozirgi kunda ushbu maydonlarning katta qismida takroriy ekinlar ekildi. Xususan, tezpishar va qisqa vegetatsiya davriga ega boʻlgan mahsulotlar – mosh, kungaboqar, sabzavot va poliz ekinlarini ekish ishlari jadal surʼatlarda olib borilmoqda.

Bu borada tuman fermerlar kengashi tomonidan takroriy ekinlarni ekish hamda agrotexnik tadbirlarni toʻgʻri amalga oshirish boʻyicha koʻrsatma va maslahatlar berib kelinmoqda.

Tumanda 3540 gektar maydonda takroriy sabzavot-poliz, dukkakli, moyli ekinlar ekish rejalashtirilgan boʻlib, ishlar jadallik bilan olib borilmoqda.

Amudaryo tumani Toʻlqin hududidagi “Amat Toʻrayev” fermer xoʻjaligi maydonida hududdagi fermer xoʻjaliklar, tegishli soha vakillari ishtirokida takroriy ekinlarni ekishda agrotexnik tadbirlarni toʻgʻri tashkil qilish boʻyicha seminar boʻlib oʻtdi.

“Amat Toʻrayev” fermer xoʻjaligi tomonidan 31,1 gektar maydonda takroriy ekinlar ekish ishlari toʻligʻi bilan yakunlangan boʻlib, 15 gektar dukkakli, 5 gektar moyli ekinlar, 6,1 gektar ozuqa ekinlar, 5 gektar kartoshka ekinlari ekildi. Mazkur ekinlar eksportbop, yuqori hosildorlikka ega navlar asosida tanlab olinib, har bir fermer xoʻjaligi tomonidan agrotexnik tadbirlar belgilangan muddatda va sifatli amalga oshirilmoqda. Ayniqsa, takroriy ekinlar uchun zamonaviy, suvni tejovchi texnologiyalar joriy etilayotgani eʼtiborga molik.

Alohida faollik koʻrsatayotgan quyidagi ilgʻor fermer xoʻjaliklari: “Tajimurotov Ismoil”, “Annamuratov Baqqol”, “Rajab Japaq”, “Usta Allayor”, “Azimjon vaysak”, “Xolbek Elbek”, “Boboniyozov Farxod”, “Saporboy Qodir”, “Gulmira Gulrux”, “Matnazarov Sodiqbek”, “Xidirov Samad”, “Allamberganov Shakirjon”, “Ermanov Urozboy”, “Kuralbay Allamovich”, “Javohir Javlonbek Shaxzodbek”, “Yusuf xoʻja”, “Amat Toʻrayev”, “Feruz Ravshanbek”, “Yakupova Gavhar”, “Erkin Rasulov asalchi” fermer xoʻjaliklari tomonidan takroriy ekinlar nafaqat tuproq unumdorligini oshiradi, balki bozorda talab yuqori boʻlgan mahsulotlar bilan taʼminlashda muhim ahamiyatga ega. Shu bilan birga, oylik daromad oqimini taʼminlashga xizmat qiladi.

Ayni paytda Amudaryo tumani hokimligi, tuman agrar boʻlimi, suv xoʻjaligi va tuman fermerlar kengashi hamkorligida takroriy ekinlar ekish jarayonini qoʻllab-quvvatlash, urugʻ, mineral oʻgʻit va yoqilgʻi bilan taʼminlash ishlari yoʻlga qoʻyilgan. Shu bilan birga, har bir fermer xoʻjaligi bilan alohida “yoʻl xaritasi” ishlab chiqilib, samaradorlikni oshirish choralari koʻrilmoqda.

Amudaryolik fermerlar ekin maydonlaridan ikki karra foyda olishga intilmoqdalar. Bunday saʼy-harakatlar mamlakatimiz agrosanoat salohiyatini mustahkamlashda muhim qadam hisoblanadi.

Amudaryo tumani Fermerlar Kengashi