Joʻqorgʻi Kenges deputati Sanobar Xoʻjamurotova saylovchilar bilan uchrashdi

Qoraqalpogʻiston Respublikasi Joʻqorgʻi Kengesi deputati Sanobar Xoʻjamurotova Qilichboy ovuli hududidagi 83-sonli maktabda oʻz saylovchilari bilan uchrashdi. Uchrashuvda Ayoqchi va Qilichboy mahallalari aholisi vakillari faol ishtirok etdi.

Deputat oʻz faoliyati yuzasidan saylovchilarga hisobot berdi, aholini qiynayotgan muammolarni tingladi va ularga yechim topish boʻyicha amalga oshirilayotgan ishlar haqida maʼlumot berdi.

Deputat oʻz nutqida joriy yilning birinchi yarmi davomidagi deputatlik faoliyati, yuborilgan soʻrovlar va ularga olingan javoblar haqida batafsil toʻxtaldi. Shuningdek, Oʻzbekiston Respublikasi Prezidentining Qoraqalpogʻiston Respublikasiga bagʻishlangan huquqiy-meʼyoriy hujjatlari mazmuni, oilada farzand tarbiyasi, xotin-qizlar odobi kabi ijtimoiy masalalarga ham eʼtibor qaratdi. Deputat keyingi yillardagi jamiyat va insonlar hayotidagi yangilanishlar, xususan, tuman ichki yoʻllarini taʼmirlash boʻyicha qilingan ishlar yuzasidan keng tushuntirishlar berdi.

Mahalla faollari deputatning jonkuyarligini alohida taʼkidlab, uning hisobotini qoniqarli deb baholadilar. Ular, ayniqsa, Qilichboy ovulida ichki yoʻllarga qum-shagʻal aralashmasi toʻshalib, 4-R-181 "Qipchoq-Mangʻit-Turkmaniston chegarasi" avtomobil yoʻlida taʼmirlash ishlari boshlanganidan mamnun ekanliklarini bildirdilar.

Maʼlum qilinishicha, tuman mahallalarida jami 107 km ichki yoʻllar qum-shagʻal aralashmasi bilan qoplangan. Yana 100 km ichki yoʻllarga qum-shagʻal aralashmasi toʻshash rejalashtirilgan boʻlib, faqat Qilichboy ovulining oʻzida yana 13 km ichki yoʻllar taʼmirlanadi.

Uchrashuvdan keyin Xalq deputatlari Amudaryo tuman kengashi kotibiyati mudiri M.Oʻrozboyev, tuman kengashi deputati M.Rahimova, OʻzXDP tuman kengashi rahbari O.Yernafasovlardan iborat deputatlar guruhi Ayoqchi va Qilichboy mahallalarini bogʻlovchi koʻprikni borib koʻrdilar. Ushbu masala boʻyicha tegishli tashkilotlarga qayta murojaat qilishga kelishib olindi.

Shuningdek, fuqaro Jumaniyozov Maxsud Sobirovichning nogironlik nafaqasi qirqilganidan shikoyati ham koʻrib chiqildi. Ushbu murojaat tuman tibbiyot birlashmasi bosh shifokori Sh.Jumaniyozovga murojaat orqali hal qilinadigan boʻldi.

Uchrashuvdan keyin nogironligi boʻlgan ikki nafar fuqarolar holidan xabar olindi.

Deputat Sanobar Xoʻjamurotovaning saylovchilar bilan uchrashuvi ochiq muloqot va muammolarni hal etishga qaratilgan samarali tadbir boʻldi. Bunday uchrashuvlar deputat va aholi oʻrtasidagi ishonchni yanada mustahkamlashga xizmat qiladi.