Amudaryo tuman prokuraturasi tomonidan “Jamiyatimizni korruptsiyadan birgalikda xalos etaylik!” shiori ostida targʻibot tadbiri oʻtkazildi

Korruptsiyaga qarshi kurashishda davlat organlari, jamoatchilik va fuqarolik jamiyati institutlarining hamkorligi muhim oʻrin tutadi. Xususan, jamoatchilikning xabardorligini oshirish, sohaga oid huquqiy bilimlarni keng ommaga yetkazish, aholi, ayniqsa, davlat xizmatchilari oʻrtasida halollik, masʼuliyat va javobgarlik hissini shakllantirish bugungi kunning dolzarb vazifalaridan biri hisoblanadi.

Masalaning dolzarbligi shundaki, juda koʻp holatlarda oddiy fuqarolar oʻzlarining huquqiy jihatdan bilimsizligi natijasida bilib-bilmay aldov, firibgarlik, tovlamachilik, odam savdosi bilan bogʻliq jinoyatlar va huquqbuzarliklar qurboniga aylanib qolayotganidir. Shu bois huquqni muhofaza qilish organlari xodimlari tomonidan davlat xizmatchilari, jamoat tashkilotlari masʼullari va aholi vakillari bilan joylarga chiqqan holda tushuntirish-targʻibot tadbirlari oʻtkazilib, bu tadbirlarda barcha yosh toifasidagi fuqarolarning ishtiroki taʼminlanmoqda.

Ana shunday tadbirlardan biri Amudaryo tuman elektr taʼminoti va tuman gaz taʼminoti korxonalarida ham oʻtkazildi. “Jamiyatimizni korruptsiyadan birgalikda xalos etaylik!” shiori ostida Qoraqalpogʻiston Respublikasi prokuraturasi tomonidan ishlab chiqilgan tadbirlar rejasi asosida tashkil etilgan mazkur targʻibot tadbirida tuman elektr va gaz taʼminoti korxonalari xodimlari ishtirok etdi.

Tadbir tashkilotchilari dastlab tuman elektr taʼminoti korxonasida masʼullar, muhandis-texnik xodimlari va ishchilari bilan muloqot oʻtkazdilar. Unda Amudaryo tumani prokurorining katta yordamchisi Sharyar Joldasov tadbir ishtirokchilariga korruptsiyaning jamiyat va davlat rivojiga salbiy taʼsiri, uning ijtimoiy va iqtisodiy oqibatlari, fuqarolarning huquqiy ongi va huquqiy madaniyatini oshirish masalalari xususida batafsil maʼlumotlar berdi. Shu bilan birga, hayotimizning barcha jabhalaridagi muammoli masalalarni pora oldi-berdisi, tanish-bilishchilik yoki oshna-ogʻaynigarchilik orqali hal etishga yoʻl qoʻymaslik toʻgʻrisida zarur tushunchalarni yetkazdi.

Tadbirda soʻzga chiqqan Amudaryo tumani elektr taʼminoti korxonasi masʼullari jamiyatimizda eng koʻp uchraydigan korruptsiyaviy holatlar hamda ularning oldini olish boʻyicha oʻz fikrlarini bildirib, atroflicha muhokama olib bordilar. Shuningdek, tadbir davomida ishtirokchilarga korruptsiyaga qarshi kurashish boʻyicha milliy qonunchilik haqida ham keng turda maʼlumotlar berildi. Unda korruptsion holatlarning oldini olish, manfaatlar toʻqnashuvi, shaffoflik va javobgarlikni taʼminlashga oid muhim normalar oʻz ifodasini topgan.

Shu kuni “Jamiyatimizni korruptsiyadan birgalikda xalos etaylik!” shiori ostida Amudaryo tuman gaz taʼminoti korxonasi masʼullari, muhandis-texnik xodimlar va ishchilari ishtirokida ham davra suhbati tashkil qilindi. Tadbirda soʻzga chiqqan korxona rahbari Jasur Yerimbetov va boshqalar jamiyatda korruptsiyaga nisbatan murosasiz munosabatni qaror toptirish, davlat xizmatchilarining halollik va masʼuliyatni oʻz vazifalarining ustuvor tamoyiliga aylantirishi — yurtimizda huquqiy demokratik davlat va kuchli fuqarolik jamiyatini barpo etishda muhim ahamiyat kasb etishini taʼkidladilar.

Aytish joizki, ushbu illatga qarshi kurashishda nafaqat davlat organlari, balki ommaviy axborot vositalari hamda fuqarolik jamiyatining boshqa institutlari ham faol ishtirok etmoqda. “Taraqqiyot koʻzgusi” gazetasi va Amudaryo televideniyesi tahririyatlari Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Biz korruptsiyaga qarshimiz!”, “Korruptsiya — davlat va jamiyat taraqqiyotiga tahdid!” mavzularidagi grant loyihalari doirasida huquqni muhofaza qilish organlari xodimlari bilan hamkorlikda amalga oshirayotgan targʻibot-tashviqot tadbirlari ham oʻzining ijobiy samarasini bermoqda.

Bu kabi targʻibot-tashviqot ishlari va maʼnaviy-maʼrifiy tadbirlarning ahamiyati beqiyos. Chunki barcha boʻgʻinlardagi davlat xizmatchilari va mansabdor shaxslarning oʻz xizmat vazifalarini halol va vijdonan bajarishi koʻp jihatdan ular rahbarlik qilayotgan korxona va tashkilotlarda faoliyat yuritayotgan xodimlar, qolaversa, oddiy fuqarolarning ham bu borada zarur huquqiy bilimga ega boʻlishlariga bogʻliq. Jamiyatning barcha boʻgʻinlarida fuqarolar ongida korruptsiyaga nisbatan murosasizlik tuygʻusini shakllantirish esa bugungi kunning eng dolzarb masalasidir.

Robiya Yoʻldosheva