Sogʻlom ovqatlanish madaniyati

Inson organizmi deyarli barcha zarur moddalarni oziq-ovqat va suv orqali oladi. Oziq-ovqat mahsulotlarining tarkibi va ularning xususiyatlari salomatlik, jismoniy rivojlanish, mehnat qobiliyati hamda umr koʻrish davomiyligi va sifatiga bevosita taʼsir qiladi. Shuning uchun biz, kattalar, oʻzimiz va farzandlarimiz maʼnan ham, jismonan ham sogʻlom tarzda voyaga yetishi uchun toʻgʻri ovqatlanish tamoyillariga rioya qilishimiz zarur. Xalqimizda: «Sogʻ tanda — sogʻlom aql», degan naql bejiz aytilmagan.

Oʻquvchi yoshlarning boʻsh vaqtini unumli va maroqli oʻtkazish maqsadida tumanimizdagi 1-sonli oʻrta taʼlim maktabida 4-iyun kuni «Toʻgʻri ovqatlanish madaniyati» mavzusida davra suhbati boʻlib oʻtdi. Seminarni tabiiy fan oʻqituvchilari — Matyakupova Barno, Urazboyeva Dilfuza, Qodirova Dilnoza, Rustamova Iroda, Ibragimova Inobat, Hojiboyeva Umida va Oʻrazboyeva Dilafruz opalar olib bordi. Unda 5–8-sinf oʻquvchilari ishtirok etdi.

Maktab oʻqituvchilarining maqsadi sogʻlom ovqatlanishning inson organizmiga qay darajada foydali ekanini tushuntirish, oʻquvchi yoshlarga ushbu mavzu boʻyicha toʻgʻri va yetarlicha tushuncha berish, shu orqali ularning bilim va malakasini boyitishdan iborat edi.

Seminarda Matyakupova Barno opa ayniqsa yoz oylarida tavsiya etiladigan mahsulotlar haqida oʻz bilimlarini oʻquvchilarga ulushdi. Xususan, yangi uzilgan mevalar va sabzavotlar, quritilgan yongʻoq, parranda goʻshti (tarkibida A, B, E vitaminlari mavjudligi uchun), sut mahsulotlari va koʻproq asal isteʼmol qilish tavsiya etildi. Shu bilan birga, organizmda yogʻ toʻplanishiga olib keladigan mahsulotlarni ovqatlanish ratsionlaridan qisqartirish kerakligi taʼkidlandi.

Bular qatoriga turli xil chipslar, popkornlar, tuzlangan yongʻoq, fastfudlar, har qanday yarim tayyor mahsulotlar, ayniqsa shakar miqdori yuqori boʻlgan shirinliklar, dudlangan goʻsht va kolbasalar inson salomatligiga zararli ekani qayd etildi.

Seminar yakunida oʻquvchilarning ongida sogʻlom ovqatlanishning tartib-qoidalari ancha mustahkam shakllandi va tadbir foydali hamda mazmunli tarzda yakunlandi.

Mutahassislarning fikricha, insonning qancha umr koʻrishi 60–70 foiz holatda toʻgʻri va tartibli taomlanishga bogʻliq ekan. Shuning uchun umrimizni uzaytirish uchun sogʻligimizga eʼtiborli boʻlishimiz shart. Dono xalqimiz bejizga «Tan salomati — jon rohati» deb taʼkidlamaydi.

Inobat Odilboyeva, 1-sonli maktabning ona tili va adabiyot oʻqituvchisi