Amudaryo tumanida hayvonlarni identifikatsiya qilish va roʻyxatga olish ishlari sifatli amalga oshirilmoqda

Oʻzbekiston Respublikasida chorvachilik sohasini zamonaviy standartlarga moslashtirish va xalqaro talablarga javob beradigan tizimni joriy etish maqsadida 2025-yil 6-avgustda “Hayvonlarni identifikatsiya qilish, roʻyxatga olish va kuzatish toʻgʻrisida”gi Qonun qabul qilindi. Ushbu qonun mamlakatimiz chorvachilik sohasida tarixiy ahamiyatga ega boʻlgan hujjat hisoblanadi va iqtisodiyotning muhim tarmogʻini yangi rivojlanish bosqichiga olib chiqishga qaratilgani bilan ahamiyatlidir.

Qonuning asosiy maqsadi Oʻzbekiston hududida jismoniy va yuridik shaxslar tomonidan saqlanadigan hamda koʻpaytirilayotgan barcha hayvonlarni belgilangan tartibda identifikatsiya qilish va roʻyxatga olishdan iborat. Bu tizim orqali har bir hayvonning kelib chiqishi, sogʻligʻi, maxsuldorligi va harakati haqida toʻliq maʼlumot olish mumkin boʻladi.

Hayvonlarni identifikatsiya qilish chorvachilik mahsulotlarining sifatini nazorat qilish, kasalliklarning tarqalishini oldini olish va eksport salohiyatini oshirish uchun ham muhim ahamiyat kasb etadi. Shuningdek, bu tizim fermerlarga oʻz qaramogʻidagi hayvonlarni samarali boshqarish va ularning iqtisodiy samaradorligini oshirish imkonini beradi.

Qonun asosida Amudaryo tumanida ham qator amaliy ishlar qilinmoqda. Hozirgi kunga qadar tumanda 10 ming 167 bosh qoramol muvaffaqiyatli identifikatsiya qilindi. Bu raqam mahalliy chorvachilik sohasida qonunning qanchalik tez va samarali amalga oshirilayotganini koʻrsatadi.

Tumanning Toʻlqin ovulida faoliyat yuritayotgan “Ilhom Shohruh” fermer xoʻjaligida ham qoramollarni identifikatsiya qilish va roʻyxatga olish ishlari sifatli tarzda bajarildi. Ushbu xoʻjalik Belorus Respublikasidan 98 bosh “Limuzin” va “Angus” zotli sigirlarni import qilgan boʻlib, ularni amaldagi veterinariya-sanitariya talablariga rioya qilgan holda sifatli parvarish qilmoqda. Qoramollar muntazam ravishda veterinariya koʻrigidan oʻtkazilayotgani va emlash ishlari oʻz vaqtida amalga oshirilayotgani ularning sogʻlom rivojlanishida muhim omil boʻlmoqda. Bu tajriba boshqa fermer xoʻjaliklari uchun namuna boʻlib xizmat qilishi shubhasiz.

Aytish joizki, qonunga muvofiq Qoramol, qoʻylar, echkilar va tuyalar tugʻilganidan oʻn toʻrt kundan keyin, otlar tugʻilganidan toʻrt oydan keyin, itlar va mushuklar esa tugʻilganidan uch oydan keyin identifikatsiya qilinishi hamda roʻyxatga olinishi lozim.

Saqlash yoki koʻpaytirish maqsadida Oʻzbekiston Respublikasi hududiga olib kiriladigan hayvonlar esa olib kirilgan sanadan eʼtiboran yigirma bir kundan kechiktirmay identifikatsiya qilinishi kerak. Oʻzbekiston Respublikasida saqlanadigan va koʻpaytiriladigan hayvonlar soʻyilgan, nobud boʻlgan yoki Respublika hududidan tashqariga olib chiqilgan taqdirda yetti kunlik muddatda hisobdan chiqariladi.

Yangi qonunning qabul qilinishi mamlakatimizda chorvachilik sohasining rivojlanishida muhim qadam hisoblanadi. Bu tizim orqali mahsulot sifatini oshirish, xalqaro bozorlarga chiqish imkoniyatlarini kengaytirish va fermerlarning iqtisodiy faoliyatini yanada yaxshilash mumkin boʻladi. Kelajakda bu qonun asosida chorvachilik sohasida raqamli texnologiyalarning keng joriy etilishi va zamonaviy boshqaruv tizimlarining yaratilishi koʻzda tutilgan.