Mangʻit dehqon bozori atrofida savdo faoliyati tartibga keltirilmoqda

Amudaryo tumani hokimligi tashabbusi bilan aholiga qulaylik yaratish va bozor infratuzilmasini yaxshilash maqsadida Mangʻit dehqon bozori yopiq binosi atrofida oʻzboshimchalik bilan noqonuniy tarzda savdo qilib kelayotgan sotuvchilar faoliyati tartibga keltirilib, ularning qonuniy faoliyat olib borishlari uchun sharoitlar yaratildi.

Uzoq yillar davomida dehqon bozori yopiq binosi atrofida ayrim tadbirkorlar va savdogarlar turli hajmdagi qoʻlbola stol, eski seyf va vaqtinchalik bostirmalarda savdo qilib kelishgan edi. Bu esa bozor atrofida tartibsizlik, tirbandlik va sanitariya-gigiyena talablariga mos kelmaslik kabi muammolarni yuzaga chiqarardi. Qolaversa, bu holatlar yongʻin xavfsizligi talablariga ham javob bermas edi.

Mazkur muammoga yechim sifatida tuman hokimligi sotuvchilar bilan uchrashib, tushuntirish ishlarini olib bordi va barcha qulayliklarga ega yangi savdo maydonini tashkil qildi. Shu sababli noqonuniy va talabga javob bermaydigan savdo nuqtalarining faoliyati toʻxtatilib, sotuvchilar eski buyum bozori hududida yangidan tashkil qilingan, barcha sharoitlarga ega savdo nuqtalariga koʻchirilmoqda.

Yangi tashkil etilgan savdo rastalari 400-oʻringa moʻljallangan boʻlib, rastalar tagi va yoʻlaklarga beton yotqizilgan, ustiga esa mustahkam bostirmalar qurilib, savdogarlar va xaridorlar uchun barcha qulayliklar yaratilgan. Bu esa, nafaqat tartibli va shinam muhit yaratish, balki kelgusida kuz-qish mavsumida yuzaga kelishi mumkin boʻlgan noqulaylik va favqulodda vaziyatlarning oldini olishga ham xizmat qiladi.

Shuningdek, tuman hokimligi tomonidan tegishli tashkilotlarni biriktirgan holda maxsus ishchi guruh tuzildi. Ushbu ishchi guruh qisqa vaqt ichida savdogarlarning yangi bostirmali bozorchaga koʻchirilishi, savdo joylarining adolatli taqsimlanishi va zarur sharoitlarning yaratilishini taʼminlaydi.

Ushbu tashabbus Mustaqillik bayrami arafasida amalga oshirilayotgani bejiz emas. U shahar qiyofasini obodonlashtirish, savdo-sotiq jarayonini tartibga solish va eng asosiysi, shahar tozaligi hamda tartibini taʼminlash kabi ustuvor maqsadlarga xizmat qilmoqda.

Savdogarlar ham, xaridorlar ham yangi bozor maydonining qurilib, foydalanishga topshirilganidan mamnun. Sababi, endilikda savdo qilish yanada qulaylashib, xaridorlar uchun ham tartibli, xavfsiz va shinam muhit yaratildi.

Amudaryo tumani hokimligi tomonidan amalga oshirilayotgan bunday tashabbuslar savdo madaniyatini yuksaltirish, aholiga yanada sifatli xizmat koʻrsatish va qulay hayot sharoitlari yaratish yoʻlidagi muhim qadamlardan biridir. 

Charos Arslonova, tuman hokimligining Axborot xizmati rahbari.