OʻQITUVChILAR OLIMPIADASINING TUMAN BOSQIChI OʻTKAZILDI

Umumiy oʻrta taʼlim tashkilotlarining matematika, informatika va axborot texnologiyalari, biologiya fanlari oʻqituvchilari bazasini shakllantirish maqsadida Oʻzbekiston Respublikasi Maktabgacha va maktab taʼlimi vazirligining 2025-yil 2-iyuldagi buyrugʻiga asosan Vazirlik tizimidagi barcha umumtaʼlim maktablarining ushbu fanlar oʻqituvchilari oʻrtasida Respublika olimpiadasining tuman bosqichi tashkillashtirilib, muvaffaqiyatli tarzda oʻtkazilmoqda.

Joriy yilning 22-23-avgust kunlari Amudaryo tumani Maktabgacha va maktab taʼlimi boʻlimi tasarrufidagi 1-sonli maktab binosida ham mazkur olimpiadaning tuman bosqichi boʻlib oʻtdi.

Oʻqituvchilar olimpiadasida tumandagi 86 ta umumiy oʻrta taʼlim maktabi va ixtisoslashtirilgan maktabdan jami 143 nafar, jumladan, matematika fani boʻyicha 72 nafar, informatika va axborot texnologiyalari fani boʻyicha 35 nafar, biologiya fani boʻyicha 36 nafar oʻqituvchilar qatnashdi.

Ochilish marosimida Qoraqalpogʻiston Respublikasi Maktabgacha va maktab taʼlimi vazirligining Fan olimpiadasi boʻyicha Iqtidorli bolalar bilan ishlash sektor metodisti Fazilat Zarifova, Amudaryo tumani Ixtisoslashtirilgan maktab direktori Otabek Yoʻldoshev, tuman Maktabgacha va maktab taʼlimi boʻlimi boshligʻi Yalgʻashboy Shamuratov, Maktablar faoliyatini muvofiqlashtirish shuʼbasi metodistlari Rayhon Yakubova, Habibulla Davletyarov, olimpiada auditoriya rahbarlari, kuzatuvchilar ishtirok etdilar.

Aytish joizki, nazorat materiallari Agentlik huzuridagi Fan olimpiadalari markazi tomonidan tuzilgan boʻlib, olimpiadaning hududiy tashkiliy qoʻmitasi tomonidan chop etilgan va maxfiyligi taʼminlangan holda joylarga yetkazilgan.

Tuman Maktabgacha va maktab taʼlimi boʻlimining maktablar faoliyatini muvofiqlashtirish shuʼbasi metodistlari olimpiada ishtirokchilariga javoblar varaqasini toʻldirish qoidalari, test sinovlarini oʻtkazish tartibi haqida batafsil tushunchalar berdilar.

Ikki kun davom etgan olimpiadaning tuman bosqichi yuqori ishchanlik va shaffoflik asosida oʻtkazildi.

Mazkur oʻqituvchilar olimpiadasini oʻtkazishdan maqsad mamlakatimizda matematika, informatika va axborot texnologiyalari, biologiya sohalarida ilm-fanni rivojlantirish, taʼlim muassasalarida faoliyat yuritayotgan oʻqituvchilar bilimini yangi sifat bosqichiga olib chiqish, jamiyatda oʻqituvchi maqomi va nufuzini oshirish, pedagoglar uchun qulay ijtimoiy sharoitlar yaratish va ularning mehnatini munosib ragʻbatlantirish hamda oʻqituvchilarning yoshlarga taʼlim va tarbiya berishdagi masʼuliyatini, doimiy kasbiy rivojlanishdagi talabchanligini oshirishdan iboratdir.

Olimpiadaning tuman bosqichida gʻolib boʻlgan oʻqituvchilar hududiy bosqichda ishtirok etadilar va Qoraqalpogʻiston Respublikasi bosqichiga yoʻllanma oladilar. Hududiy bosqich yaqin kunlarda oʻtkazilishi rejalashtirilgan.

Rayhon Yakubova, Amudaryo tumani Maktabgacha va maktab taʼlimi boʻlimi Maktablar faoliyatini muvofiqlashtirish shuʼbasi metodisti.