"HAPPY KIDS"da bayram shukuhi: bolajonlar mustaqillikni nishonladi

Amudaryo tumanida joylashgan, yaqinda oʻz faoliyatini boshlagan “HAPPY KIDS” nodavlat maktabgacha taʼlim tashkilotida 27-sentyabr kuni unutilmas bayram tadbiri boʻlib oʻtdi. Bolajonlar va murabbiylar “Mustaqil Oʻzbekiston – 34 yoshda” shiori ostida tashkil etilgan tantanada jonli va quvnoq chiqishlar bilan ishtirok etib, hammaning qalbiga bayram shodiyonasini olib kirdi.

Tashkilot mudirasi Shahlo Iskandarova rahbarligida oʻtkazilgan ushbu tadbir bolalarning ijodiy qobiliyatlarini namoyon etish uchun ajoyib imkoniyat yaratdi. Bogʻchada mavjud ikki guruhga boʻlingan jajji tarbiyalanuvchilar kuy-qoʻshiq va raqslar bilan tadbirga oʻzgacha fayz bagʻishladilar. Bayram davomida bolalar Vatanga boʻlgan mehrlarini ifoda etuvchi sheʼrlar oʻqidilar, bu esa kattalarning ham qalbini junbushga keltirdi.

Tadbirning eng yorqin lahzalaridan biri qizlarning mashhur “Barbi” qoʻshigʻiga mohirona raqsga tushishi boʻldi. Ularning shoʻx va shirin harakatlari tomoshabinlarning olqishlariga sabab boʻldi. Oʻgʻil bolalar esa karate ustozi Xursandbek Madrahimov boshchiligida oʻz mahoratlarini namoyish etishdi. Ularning bajargan turli murakkab tryuklari, kuch va chaqqonlik bilan bajarilgan harakatlari ota-onalar va mehmonlarni hayratda qoldirdi.

Bogʻcha kichkintoylari ham bayramdan chetda qolmadi. Ular “Jon Vatan” qoʻshigʻiga shoʻx-shodon raqsga tushib, oʻzlarining samimiy quvonchlarini namoyon etdilar.

Aytish joizki, 2025-yilning iyun oyida ish boshlagan "HAPPY KIDS" nodavlat maktabgacha taʼlim tashkiloti qisqa vaqt ichida oʻz faoliyatini yoʻlga qoʻyib, sifatli taʼlim va tarbiya berishning uddasidan chiqmoqda. Hozirda ushbu bogʻchada 2 yoshdan 7 yoshgacha boʻlgan bolajonlar tarbiyalanmoqda. Tashkilotda bolalarning har tomonlama rivojlanishi uchun barcha sharoitlar yaratilgan.

Bogʻchada 6 nafar malakali xodim faoliyat yuritib, bolalar bilan alohida yondashuv asosida shugʻullanadi. Taʼlim dasturiga ingliz tili, rus tili, logoped mashgʻulotlari kiritilgan boʻlib, bular bolalarning til koʻnikmalarini erta yoshdan shakllantirishga yordam beradi. Bundan tashqari, jismoniy rivojlanishga katta eʼtibor qaratilib, haftasiga ikki marta karate va gimnastika mashgʻulotlari oʻtkaziladi. Bu mashgʻulotlar bolalarning sogʻlom va tetik oʻsishida muhim ahamiyat kasb etmoqda.

Mustaqillik bayrami munosabati bilan oʻtkazilgan tadbir bolalarning nafaqat jismoniy va ijodiy rivojlanishiga xizmat qildi, balki ularning qalbida Vatanga muhabbat, uning tarixi va qadriyatlariga hurmat tuygʻularini shakllantirishda ham muhim ahamiyat kasb etdi.

Mazkur bayram tadbiri “HAPPY KIDS” nodavlat maktabgacha taʼlim tashkiloti jamoasi va tarbiyalanuvchilarining birgalikdagi ishlarining amaliy natijasi boʻlib, ularning hamjihatligi va yuksak tashkilotchiligini yana bir bor namoyon etdi.

Bu kabi tadbirlar bolalar uchun bayramlarning, ayniqsa eng ulugʻ, eng aziz boʻlgan mustaqillik bayramining ahamiyatini tushuntirib, ularni jonajon Vatanimizga muhabbat, ona yurtga sadoqat ruhida, milliy va umuminsoniy qadriyatlar asosida tarbiyalashda muhim amaliy vosita boʻlib xizmat qiladi. “HAPPY KIDS” nodavlat maktabgacha taʼlim tashkiloti rahbariyati kelajak avlodning har tomonlama yetuk, vatanparvar va salohiyatli insonlar boʻlib yetishishi yoʻlida barcha imkoniyatlarni ishga solgan holda samarali mehnat qilmoqdalar.