Prokuratura xodimlari kutubxonaga aʼzo boʻlishdi

Maʼnaviy-maʼrifiy hayotni rivojlantirish, aholining kitobxonlik madaniyatini oshirish bugungi kunning eng muhim vazifalaridan biridir. Oʻzbekiston Respublikasi Prezidentining 2019-yil 7-iyundagi qarori bu borada yangi bosqichni boshlab berdi. Ushbu qarorga muvofiq, respublika boʻylab aholiga axborot-kutubxona xizmati koʻrsatishni takomillashtirish maqsadida tizimli ishlar amalga oshirilmoqda. Ana shunday ezgu maqsadlar bilan Amudaryo tumanida ham yangi Axborot-kutubxona markazi tashkil etilgan edi. Tumanning Oybek mahallasi, Qipchoq koʻchasida joylashgan mazkur markaz qisqa vaqt ichida tuman aholisining maʼrifiy ehtiyojlarini qondirishga xizmat qilayotgan maʼrifat maskaniga aylandi.

Joriy yilning 27-avgust kuni Amudaryo tuman prokurori Bahrom Masharipov boshchiligidagi prokuratura xodimlari Axborot-kutubxona markaziga tashrif buyurishdi. Tashrifdan asosiy maqsad nafaqat kutubxonaning faoliyati bilan tanishish, balki kitobxonlikni keng targʻib etishga hissa qoʻshishdan iboratdir. Mehmonlar kutubxonaning boy kitob fondi, xususan, Prezident asarlari, Oʻzbekiston tarixiga oid kitoblar va yangi adabiyotlar bilan yaqindan tanishdilar.

Tuman prokurori Bahrom Masharipov kitob oʻqishning inson hayotidagi oʻrni haqida alohida toʻxtalib oʻtdi. Taʼkidlanganidek, kitob inson dunyoqarashini kengaytiradi, uning huquqiy savodxonligini oshiradi va shaxsiy kamolotida hal qiluvchi rol oʻynaydi. Prokurorning bu kabi fikrlari kutubxonaga tashrif buyurgan kitobxonlarni yanada ruhlantirdi va ularda mutolaaga boʻlgan ishtiyoqni yanada kuchaytirdi.

Tashrif yakunida prokuratura xodimlari kutubxonaga aʼzo boʻlib, oʻzlarini qiziqtirgan kitoblarni oʻzlari bilan olib ketdilar. Bunday tashabbus jamiyatning boshqa soha vakillari uchun ham ibratli namuna boʻla oladi.

Aytish joizki, Amudaryo tumani Axborot-kutubxona markazi bugungi kunda katta hajmdagi fondga ega boʻlib, uning kitob fondi 65 ming 138 nusxani tashkil qiladi. Bundan tashqari, markazning faol foydalanuvchilari soni ham tobora ortib bormoqda. Hozirgi kunda 5 ming 74 nafar kitobxon kutubxona xizmatlaridan foydalanadi. Bu abonentlarning 2 ming 438 nafarini erkaklar, 2 ming 636 nafarini esa ayollar tashkil etadi. Bu koʻrsatkichlar tumanda kitobxonlikka boʻlgan qiziqishning yuqori darajada ekanligini koʻrsatadi.

Ushbu tashrif, xususan, davlat organlari vakillarining kitobxonlikni targʻib qilishdagi faol ishtiroki mamlakatimiz rahbarining maʼrifatga boʻlgan eʼtibori va hurmatining natijasidir. Zero, kitob oʻqish – jamiyatni yangilash va taraqqiy ettirishning eng samarali yoʻlidir. Kitobxon insonlarning dunyoqarashi keng, fikri teran boʻladi, bu esa oʻz navbatida jamiyatning umumiy intellektual salohiyatini oshirishga xizmat qiladi.

Qolaversa, davlat organlari rahbarlari va xodimlarining kitobxonlikka shaxsiy qiziqishi va bu borada tashabbus koʻrsatishi jamiyatning boshqa qatlamlari uchun ham ibratli namuna boʻladi. Odamlar ularga ergashishga intiladi, chunki bunday insonlar jamiyat tomonidan huqubuzarlar va jinoyatchilarni jazolovchi shaxslar emas, balki qonunni himoya qiluvchi maʼrifatli va madaniyatli shaxs sifatida qabul qilinadi. Bundan tashqari, huquqni muhofaza qiluvchi organlar xodimlarining kitob oʻqishga, ayniqsa, huquqiy adabiyotlar, tarixiy va ijtimoiy-siyosiy asarlarni oʻrganishga eʼtibor qaratishi ularning kasbiy faoliyati samaradorligini ham sezilarli darajada oshiradi.