Qoraqalpogʻiston dehqonchilik ilmiy-tadqiqot institutiga press-tur tashkil qilindi

Qoraqalpogʻiston Respublikasi Qishloq xoʻjaligi vazirligi matbuot xizmati tashabbusi bilan ommaviy axborot vositalari vakillari uchun Chimboy tumanida joylashgan Qoraqalpogʻiston dehqonchilik ilmiy-tadqiqot institutiga press-tur tashkil etildi. Tadbirdan koʻzlangan asosiy maqsad – jurnalistlarni Orolboʻyi mintaqasi qishloq xoʻjaligi rivojining ilmiy asoslarini yaratayotgan maskan faoliyati, erishayotgan yutuqlari va istiqboldagi rejalari bilan yaqindan tanishtirishdan iborat boʻldi.

1958-yilda tashkil etilgan ushbu ilmiy maskan nafaqat Qoraqalpogʻiston, balki butun mamlakatimiz agrar sohasi uchun muhim ahamiyatga ega. Institut olimlari murakkab tuproq-iqlim sharoitida qishloq xoʻjalik ekinlarining yangi navlarini yaratish, ularning birlamchi urugʻchiligini tashkil etish va resurstejamkor agrotexnologiyalarni ishlab chiqishdek masʼuliyatli vazifani sharaf bilan ado etib kelmoqda. Institut tasarrufidagi 1022 gektardan ortiq yer maydoni, jumladan, qariyb 600 gektar sugʻoriladigan maydonlar ilmiy izlanishlar va yangi navlarni sinovdan oʻtkazish uchun xizmat qilmoqda.

Press-tur davomida jurnalistlar institutning ilmiy laboratoriyalari, tajriba dalalarida boʻlib, bu yerda olimlar uchun yaratilgan sharoitlar, yangi navlarni sinash jarayonlari va erishilgan yutuqlar bilan bevosita tanishdilar. Institut rahbariyati va yetakchi olimlari OAV vakillariga paxta, gʻalla, moyli va yem-xashak ekinlari boʻyicha olib borilayotgan selektsiya ishlari, ularning natijalari haqida batafsil maʼlumot berdilar.

Qishloq xoʻjaligining rivojida ilmiy-tadqiqot muassasalarining, olimlar va ixtirochilarning oʻrni beqiyosdir. Aynan ularning mashaqqatli mehnati tufayli mahalliy tuproq-iqlim sharoitiga mos, kasallik va zararkunandalarga chidamli, serhosil navlar yaratiladi. Bu esa oʻz navbatida, fermer va dehqonlarning mehnatini yengillashtirib, daromadini oshirishga, mamlakat oziq-ovqat xavfsizligini mustahkamlashga xizmat qiladi. Qoraqalpogʻiston dehqonchilik ilmiy-tadqiqot instituti ana shunday muhim vazifani muvaffaqiyatli amalga oshirib kelayotgan yetakchi ilmiy markazlardan biridir.

Institutning ilmiy salohiyati uning eng katta boyligidir. Bugungi kunda bu yerda 51 nafar xodim faoliyat yuritsa, shundan 19 nafari ilmiy xodimlardir. Ular orasida 2 nafar fan doktori va 7 nafar fan nomzodining borligi ilmiy salohiyatning 57,8 foizga teng ekanligidan dalolat beradi. Tajribali va yosh avlod olimlarining hamkorlikdagi faoliyati institutning ilmiy yutuqlari garovi boʻlmoqda.

Soʻnggi yillarda institut olimlari tomonidan yaratilgan gʻoʻzaning “Chimboy-5018” va “KK-3535”, bugʻdoyning “Shimbay” va “Aral” kabi serhosil navlari Davlat reyestriga kiritilib, ishlab chiqarishga muvaffaqiyatli joriy etilmoqda.

Institutda yaratilgan ilmiy natijalar nafaqat selektsiya yoʻnalishida, balki yem-xashak ekinlari boʻyicha ham amaliy samara bermoqda. Jumladan, bedaning bir necha navlari davlat reyestriga kiritilib, Qoraqalpogʻiston, Xorazm va Buxoro viloyatlarida ekish uchun tavsiya etildi. Shuningdek, sudan oʻti va Afrika tarigʻining yangi navlari yaratilib, sinovdan oʻtkazilmoqda. Bundan tashqari, institutda gʻoʻza, bugʻdoy, arpa, joʻxori kabi ekinlarning birlamchi urugʻchiligi yoʻlga qoʻyilgan.

Qoraqalpogʻiston dehqonchilik ilmiy-tadqiqot institutiga uyushtirilgan press-tur juda samarali va mazmunli oʻtdi. Jurnalistlar Orolboʻyi olimlarining mashaqqatli, ammo sharafli mehnati, ularning mamlakat qishloq xoʻjaligi rivojiga qoʻshayotgan ulkan hissasiga yana bir bor guvoh boʻldilar. Bu kabi tadbirlar ilm-fan yutuqlarini keng ommalashtirish, ilmiy xodimlar mehnatini ragʻbatlantirish va yoshlarni ilm-fanga jalb etishda muhim ahamiyat kasb etadi.