TUMAN HOKIMI OLIMPIADASI OʻTKAZILDI

Mamlakatimiz taʼlim tizimida, ayniqsa, maktab taʼlimi sohasida izchil islohotlar olib borilmoqda. Jumladan, taʼlimning barcha bosqichlariga zamonaviy yondashuvlarni joriy etish, yoshlarning salohiyatini roʻyobga chiqarish boʻyicha ustuvor vazifalar belgilanib, amalga oshirilmoqda. Bu kabi choralar yoshlarning ijtimoiy faolligini oshirish, bilim va koʻnikmalarini yanada rivojlantirish, madaniy-maʼnaviy saviyasini yuksaltirishga xizmat qilmoqda.

Aynan ana shu yoʻnalishdagi ishlarni yuqori sifat darajasiga koʻtarish, bilimdon yoshlarni kashf etish maqsadida Amudaryo tumani Maktabgacha va maktab taʼlimi boʻlimi hamda “Brighton school” oʻquv markazi hamkorligida tumandagi umumiy oʻrta taʼlim maktablarining 3-9-sinf oʻquvchilari oʻrtasida ingliz tili fanidan tuman hokimi olimpiadasi tashkil qilindi. Olimpiadada tumandagi 86 ta umumtaʼlim maktablaridan 1200 nafar oʻquvchi ishtirok etdi.

Hokim olimpiadasining ochilish marosimida Amudaryo tuman Maktabgacha va maktab taʼlimi boʻlimi mudiri Yalgʻashboy Shamuratov soʻzga chiqib, oʻquvchilar oʻrtasida bunday olimpiadalarni oʻtkazish ularning iqtidori va bilim darajasini aniqlash hamda chekka hududlarda oʻquv markazlari tashkil qilishga asos boʻlishini taʼkidlab oʻtdi. Qolaversa, hokim olimpiadasini oʻtkazishdagi eng asosiy maqsad alohida qobiliyatli oʻquvchilarning iqtidorlarini yuzaga chiqarishlari uchun zarur sharoitlar yaratish ekanligi alohida qayd qilindi.

“Brighton school” oʻquv markazi direktori Nurbek Jumaniyozov oʻquvchilarga olimpiadaning oʻtkazilish tartibi haqida batafsil tushunchalar berdi va ishtirokchilarga muvaffaqiyatlar tiladi.

Bu kabi olimpiadalar oʻtkazilishi taʼlim muassasalari oʻquvchilari orasidan ingliz tili boʻyicha bilimli, ushbu fanga qiziquvchi, intiluvchan va ijodkor yoshlarni aniqlash, ularning ijodiy qobiliyatlarini roʻyobga chiqarishga koʻmaklashish, qoʻllab-quvvatlash hamda ragʻbatlantirish bilan bir qatorda oʻsib kelayotgan yosh avlodning kelgusida xalqaro miqyosda tashkil qilinadigan fan olimpiadalarida ishtirok etishlari uchun mustahkam zamin yaratadi. Shuningdek, nufuzli xalqaro olimpiadalarda Oʻzbekiston jamoasining natijadorligini oshirish maqsadida yosh bilimdonlarni tayyorlab borish imkonini ham beradi.

Aytish joizki, hozirgi globallashuv davrida ingliz tili dunyo miqyosida eng nufuzli va keng tarqalgan tillardan biriga aylangan. U xalqaro aloqalar, ilm-fan, texnologiya, biznes, madaniyat sohalari va internet maydonida asosiy muloqot vositasi hisoblanadi. Dunyo aholisining katta qismi ingliz tilini bilishi tufayli mamlakatlar oʻrtasidagi hamkorlik va tajriba almashish samarali amalga oshmoqda. Shuningdek, zamonaviy bilimlar va ilmiy manbalarning asosiy qismi aynan ingliz tilida yaratilmoqda.

Shu sababli ham mamlakatimizda chet tillari, xususan ingliz tilini oʻqitishga alohida eʼtibor qaratilmoqda. Maktablarda erta yoshdan boshlab bu tilni oʻrgatish orqali yosh avlodning dunyoqarashini kengaytirish, ularni xalqaro maydonda raqobatbardosh kadr qilib tarbiyalash maqsad qilingan. Ingliz tilini yaxshi oʻzlashtirgan oʻquvchilar xorijiy adabiyotlardan foydalanish, nufuzli universitetlarda tahsil olish va zamonaviy texnologiyalarni tez oʻzlashtirish imkoniyatiga ega boʻladilar.

Shu jihatdan, Amudaryo tumani hokimligi va xususiy oʻquv markazi hamkorligida tashkil qilingan olimpiada maktablarda ingliz tilini oʻqitish darajasini sinovdan oʻtkazish va kelgusida bu boradagi koʻrsatkichlarni tumanning eng olis hududidagi maktablarda ham yaxshilash choralarini koʻrishga zamin yaratadi.