Joʻqorgʻi Kenges Raisi Amudaryo tumaniga tashrif buyurdi

16-sentyabr kuni Qoraqalpogʻiston Respublikasi Joʻqorgʻi Kengesi Raisi Amanbay Orinbayev Amudaryo tumanida aholining turmush farovonligini oshirish borasida amalga oshirilayotgan ishlar bilan yaqindan tanishish maqsadida tumanga tashrif buyurdi.

Soʻnggi yillarda Qoraqalpogʻistonning barcha hududlarida boʻlgani kabi Amudaryo tumanida ham aholi turmush darajasini yaxshilash, yangi ish oʻrinlari yaratish va infratuzilmani rivojlantirish boʻyicha qator loyihalar muvaffaqiyatli amalga oshirilmoqda.

Tashrif davomida Joʻqorgʻi Kenges Raisi Choykoʻl ovuli hududidagi “Choykoʻl Doʻstlik” fermer xoʻjaligi dalasida boʻlib, Xitoy davlatidan olib kelingan paxta terish mashinasining ish jarayoni bilan tanishdi. Ushbu zamonaviy texnikaning imkoniyatlarini koʻzdan kechirar ekan, uning samaradorligiga alohida eʼtibor qaratildi. Mazkur xoʻjalikda Xitoyning “Fm Word” kompaniyasi tomonidan ishlab chiqarilgan paxta terish mashinasidan samarali foydalanilmoqda. Ushbu texnika qoldiq tolalarni samarali ajratishi, maydondagi qoʻshimcha ishlarni tez amalga oshirishi va operatorlar uchun qulay ekanligi bilan fermer va ishchilarga manzur boʻlmoqda.

Zamonaviy mashinalarning paxta yigʻim-terimini qisqa muddatlarda yakunlash va iqtisodiy samaradorlikni oshirishdagi ahamiyati beqiyosdir. Bunday texnikalar mehnat unumdorligini oshiribgina qolmay, balki fermer xoʻjaliklarining xarajatlarini kamaytirishga, hosilni tez va yoʻqotishlarsiz yigʻib-terib olishga xizmat qiladi.

Joʻqorgʻi Kenges Raisi tumanning Beshtom mahallasi hududidagi “Amu karavan hotel” MChJ tomonidan tashkil etilgan mehmonxona xizmati loyihasi, Oybek mahallasidagi “Oybek mebel” MChJ tomonidan yoʻlga qoʻyilgan mebel ishlab chiqarish loyihasi, shuningdek, “Yoqubboy Ashirov” fermer xoʻjaligi tomonidan Xitoy texnologiyasi asosida ishga tushirilgan paxta, gʻalla va boshqa donli ekinlar urugʻlarini qayta ishlash loyihasi bilan ham yaqindan tanishdi. Bundan tashqari, “Bekman Allaberganov” fermer xoʻjaligining ekin maydonidagi terimchilar holidan ham xabar olinib, ilgʻor terimchilarga sovgʻalar topshirildi. Doʻrman ovulida yangidan tashkil etilgan issiqxonalar faoliyati ham koʻzdan kechirildi. Shu kuni Joʻqorgʻi Kenges Raisi boshchiligida “Yangi Oʻzbekiston” massivi hududida 600 xonadonli koʻp qavatli uylarni qurish loyihasiga start berildi.

Tashrif soʻngida Amudaryo tumanini ijtimoiy-iqtisodiy rivojlantirish, aholi bandligini taʼminlash, davlat dasturlari doirasidagi belgilangan vazifalar, amalga oshirilishi lozim boʻlgan chora-tadbirlar hamda avval berilgan topshiriqlar ijrosiga bagʻishlangan majlis oʻtkazildi.

Majlisda respublika miqyosidagi vazirliklar, idora, tashkilot va muassasalar rahbarlari, tuman mutasaddilari, mahalla faollari ishtirok etdi.

Majlisda mahallalarni obod qilish, infratuzilma bilan bogʻliq muammolarni hal etish, davlat dasturlari doirasida loyihalarni amalga oshirish, yangi korxonalar tashkil etish, qayta tiklanuvchi energiya manbalarini keng joriy etish, kambagʻallikni qisqartirish, fuqarolar turmush darajasini yaxshilash borasidagi vazifalar ijrosi tanqidiy koʻrib chiqildi.

Mamlakatda amalga oshirilayotgan islohotlarning samaradorligi eng avvalo quyi darajadagi rahbarlarning masʼuliyatiga bogʻliq ekani yana bir bor taʼkidlandi. Har bir rahbar oʻz hududidagi muammolarni chuqur oʻrganishi, aholi bilan doimiy muloqotda boʻlishi va ularning ehtiyojlarini qondirish uchun aniq chora-tadbirlarni amalga oshirishi lozimligi qayd qilindi. Bu esa islohotlarning joylardagi ijrosini taʼminlashda hal qiluvchi ahamiyat kasb etadi.

Joʻqorgʻi Kenges Raisi fuqarolarning qoʻshimcha daromad olishiga koʻmaklashish, yoshlar bandligini taʼminlash, tadbirkorlikni rivojlantirish, korxonalar faoliyatiga yaqindan koʻmaklashish, bank xizmatlari va bozor infratuzilmasini yaxshilash boʻyicha ham berilgan topshiriqlarning ijrosi xususida soʻz yuritib, bu boradagi kamchiliklarni bartaraf qilish, rejalashtirilgan koʻrsatkichlarga oʻz muddatida erishish uchun masʼuliyat bilan yondoshish lozimligi xususida toʻxtaldi.

Yigʻilishda shuningdek, mazkur ishlarni amalga oshirishda ayrim mutasaddilarning oʻz vazifasiga sovuqqonlik bilan qarayotgani tanqid qilinib, kamchiliklar koʻrsatib oʻtildi. Shu bilan birga, oʻz vazifasini bajarishda qoloqlikka yoʻl qoʻygan ayrim masʼullarga intizomiy jazo qoʻllash, zarur boʻlsa, lavozimiga loyiqligi masalasini koʻrib chiqish boʻyicha topshiriqlar berildi.

Yigʻilishda berilgan topshiriqlar mavjud muammolarni aniqlash va ularni hal etish boʻyicha aniq mexanizmlarni ishlab chiqishda ham muhim vosita boʻldi. Asosiy maqsad – aholining turmush farovonligini oshirish va hududning barqaror taraqqiyotini taʼminlashdir. Qoraqalpogʻiston Respublikasining har bir fuqarosi uchun munosib turmush sharoitini yaratish yoʻlidagi bu kabi saʼy-harakatlar kelajakda oʻz samarasini berishi shubhasiz.